Read turkana 2 Samuel 7 Bible Online

2 Samuel 7 - turkana bible

2 Samuel 7

¹Ani elomi ekapolon Daudi kai keng, abu Ekapolon Akuj kisianga ngesi, toyuu alomoe keng kadaang,

²abu ekapolon Daudi tolimok Nasan lo arai ekadwaran a Akuj tama, “Kingolik mono tokona iyong a, abe alomit ayong kai ana adukio a ngakito a ngichekereng, tarai iwaakinitae asaduku a Achamunet na erai aka Akuj, loeam!”

³Tatachak Nasan tama, “Tosub ibore nicha isaki iyong akisub daang kainyo irukito iyong ka Ekapolon Akuj.”

⁴Nakaneni akwaar napei ngina nakwaare, tolimok Ekapolon Akuj Nasan tama,

⁵“Kape tolimok ekasuban etich kang Daudi tama, ‘Meere iyong kidukokini ayong akai na eboikin.

⁶Napei kolong ayuunea ayong Ngisirael alo Misiri tani tokona, nyiboikino ayong kai. Erimit ayong akwap eboi aloeam.

⁷Ngirwa daang lu kirimitor ayong ka Ngisirael akwap, emam tani epei a ngikarikok[7] alu aseuni ayong lo engit ayong atamar nyo ko pekadukinea ayong akai na a ngakito a ngichekereng.’

⁸“Kotere ngakiro nguna, tolimok ekasuban etich kang Daudi atamar ayong Akuj Namerikanyer, alimokinit ngesi kona, ‘Kaseuni kolong ayong iyong anachokor ana iyokiyo ngamesekin, sodi ketiliwo ekapolon a ngitunga kang alu eraakasi Ngisirael.

⁹Kiruki ayong ka iyong ani ilosi kadaang, sodi edwang ngimoe kon daang esaa lo ilosio iyong ngaren. Ketiliwori ayong iyong lokipuruunitoe loger a ngikarikok alu eyenikinitae noi anakwapea.

¹⁰Nakaneni aseuni ayong akwap na eliwor aka Ngisirael alu eraakasi ngitunga kang, sodi etak kesi, tolometa nakwap na erai akech a ngikulepek, nyiichanere nabo. Nyewanete kesi ngitunga luaronok loger lokolong sek a ekingaren,

¹¹ka na etijioto kesi ngitunga lukadedengak napei kolong alomuneta nakwap naga. Kesianguni ayong esi alomoe kus kadaang, kainak nabo tani ngalesea.

¹²Ani itoani iyong kitonukakin ni enukakinitae taapakus, etiliwori ayong epei kata lokookeng ekapolon, sodi etogogong apolou keng.

¹³Lokookon ngolo ngesi kadukokini ayong akai, nakaneni eturubi ayong apolou keng toliwor akajik.

¹⁴Aliwor ayong apakeng, toliwor ngesi lokookeng. Ani esechi ngesi, erirae ayong, loger lo iriraa apa lokookeng.

¹⁵Nakaneni nyawouni nyawouni ayong akingarakin ngesi loger lokolong awounea akingarakin Saul, lokolong alemari ayong toliworor iyong ekapolon.

¹⁶ Epete iyong ngalesea ngirwa daang, nakaneni etiliwori ayong apolou kon akajik. Nyedaun apolou kon jik.’ ”

¹⁷Tolimok Nasan Daudi ngakiro daang na edodikinit ngesi Akuj.

¹⁸Sodi toloma Daudi loeam a Akuj, kiboikin sodi kilip tama, “Nyo tokona lo ayong dang, nyo tani ngitunga a awi kang, kisubakinea iyong Ekapolon lo erai Ekapolon Akuj ngakiro na ikote nugu?

¹⁹Tarai imenit iyong Ekapolon lo irai Ekapolon Akuj ngakiro nguna. Kichikak iyong ayong ngakiro a ngalesea kang kotere ngikaru lu monan isidiunosi. Nakaneni Ekapolon lo irai Ekapolon Akuj, kimiek iyong ayong lo arai itwaan engolikini ngakiro nugu!

²⁰Anukiro nabo ngache kalimokini ayong iyong? Kiyeni iyong ayong lo arai ekasuban etich kon.

²¹Kotere akichikakinet kon ka ngakiro isaki iyong asubakin, isub iyong ngakiro nakatalarak nugu daang isaki akitatam ayong.

²²Ipol iyong dir, Ekapolon Akuj na irai Akuj! Emam tani ipei ni ikwaan ka iyong. Kiyen sua ngirwa daang atamar iyong bon irai Akuj.

²³Emam nabo ebukut eche anakwapea lo ikwaan ka Ngisirael, lukolong iyuuni iyong ani araakatar ngikedalak, kitiliwo ngitunga kon a alope. Ngakiro nakatalarak ka naketubulok isubi iyong anikech, apetakis ekipur kon wadaang a ngakwapin. Itwarakini[8] iyong ngibukui luche ka ngakujo kech na alooso ngitunga kon ngaren. Ngitunga ngulu kesi lu ilachakini iyong alo Misiri, toliworos ngitunga kon.

²⁴ Itiliwo iyong Ngisirael ngitunga kon nakajik. Ani iyong Ekapolon Akuj, iliwor Akuj kech.

²⁵“Tokona bocha Ekapolon Akuj na irai Akuj, kitemok akichikakinet nakolong kichikakini iyong ayong ka ngalesea kang, sodi tosub ngakiro nakolong ilimuni iyong atamar isubi.

²⁶Eyenikinio ekipur a ekiro kon nakajik, sodi tolimuunut ngitunga jiik ebalasi, ‘Akuj Namerikanyer, ngesi erai Akuj a Isirael!’ Nakaneni itiliwori iyong apolou kang akajik.

²⁷Akuj Namerikanyer, na irai Akuj a Isirael! Apedori ayong akilip iyong loger logo, kainyo kidodik iyong ayong ekasuban etich kon ngakiro nugu daang, ilimu tani atamar itiliwori iyong ngalesea kang ngikapolok.

²⁸“Tokona bocha Ekapolon lo irai Ekapolon Akuj, iyong irai Akuj. Iyoonokini iyong ngakichikakinet kon jiik, kichikak iyong ayong akichikakinet naajokon noi naga.

²⁹Kelipit iyong atamar topia ngalesea kang sodi torubakis eanyunito ngakiro naajokak anikon. Iyong, Ekapolon lo erai Ekapolon Akuj, ngesi ilimu nguna, nakaneni eliwor apiaro kon aka ngalesea kang jik.”