Read turkana 2 Samuel 8 Bible Online

2 Samuel 8 - turkana bible

2 Samuel 8

¹Ani ekisidi, tolot ekapolon Daudi nabo akitojwore Ngipilisti sodi kidwang. Todema kesi ere a Metegama.

²Ani erumor kidwang ngesi Ngimoab. Kiteperik ngesi ngitunga lu eenitae kwap, sodi toliwor alotunga cha kadaang aluuni eperete, taar ngesi ngitunga ngiarei. Apot Ngimoab toliworos ngitunga lu epolokinit ngesi, sodi tobukonokis ngesi echur.

³Kidwang ngesi ekapolon a Siria lo apolokinit ni enyaritae Soba. Ekapolon ngolo ngesi Adadeser lokookeng a Reob. Edwangio Adadeser esaa lo alosio akidodiun atamar arai ekapolon a ewae alo alokuju angolol a Eupurate.

⁴Abu Daudi torem ngasigerea abunget ka ngamiae ngakan-kaarei ani a Adadeser. Araakasi ngasigerea nguna na emeto ngangolei. Torem nabo ngasigerea ngabunge ngatomwon-arei. Araakasi ngasigerea nguna na eloose a ngakejen. Kimiek ngesi ngangolei na iriyete ngaurukukui amiat apei, sodi tonged ngesi ngangolei nache daang ngamori na a ngakejen tongwala.

⁵Ani emeunete ngitunga a Siria lu ayakasi Damasko ajore na ingarakini ekapolon Adadeser alojie, abu Daudi kitijik ajore ngina taar ngitunga ngabunge ngatomwon-arei ka ngaarei.

⁶Ani erumor kiwaak ngesi ngadakarin na ejie nakwap kech. Apot kesi toliworos ngitunga lu epolokinit Daudi, tobukonokis ngesi echur. Abu Ekapolon Akuj kisidwang Daudi ngimoe keng awadaang.

⁷Tolema Daudi ngaupwala a egolit na atingito ngikapolok a arieng a Adadeser, sodi yaa Yerusalem.

⁸Tolema ngesi tani asuat nanyang nakaalan alo Beta, ka Berosai, alu araakasi ngirerea lu apolokinit Adadeser.

⁹Kiira Toi lo arai ekapolon a Amas atamar edwang Daudi ngasigerea daang a Adadeser.

¹⁰Sodi tomea ngesi lokookeng anyaritae Yoram akimalare ekapolon Daudi ka abuakin ngesi alakara ani edwangea Adadeser. Ajito sek Toi ka Adadeser ngajiet nakaalak. Inaa Yoram Daudi ngiboro lu asubunitae a egolit ka akwangat, ta asuat nanyang.

¹¹Kitaleu ekapolon Daudi kesi toliworos ilepeenere. Kimorik aapei ka akwangat, ta egolit lo alemuni ngesi alobukui alu edwangi.

¹² Ngibukui ngulu kesi Ngiedomae, ka Ngimoab, ka Ngiamon, ka Ngipilisti, ta Ngiamalek. Tolem Daudi tani epewae a ngiboro alu alemuni ngesi ani a Adadeser.

¹³Apon Daudi kipuruunoe noi abongunio ani aarea Ngiedomae ngabunge ngatomon ka ngakan-kauni anadipo a Amakat.

¹⁴Kiwaak ngesi ngadakarin a ejie lowaitin daang a Edom. Toliwor ngesi epolokinit ngitunga lu Edom. Kidwang Daudi ngimoe keng awadaang kotere Ekapolon Akuj.

¹⁵Topolok Daudi akwap a Isirael daang, sodi tosubea ngitunga keng daang ngakiro itemokino toriyan.

¹⁶Yoab lo anyaritae itiokeng Seruya, ngesi arai ekarikon a ngasigerea. Yeochapat lokookeng a Ailud ngesi aweikinit ekimar.

¹⁷Sadok lokookeng a Aitud ka Aimelek lokookeng a Abiasar kesi araakasi ngimurok a Akuj. Seraya ngesi arai ekegiran ngikesio.

¹⁸Benaya lokookeng a Yeoyada ngesi arai ekarikon a ngasigerea ana eteete Daudi. Araakasi talokookeng a Daudi ngimurok a Akuj.