Read turkana 2 Samuel 9 Bible Online

2 Samuel 9 - turkana bible

2 Samuel 9

¹ Akolongit apei, kingis Daudi tama, “Eyei itwaan ni eyanasi ka Saul ni eringa eyari a? Ani keyei a, asaki ayong atosubea niajokon kotere Yonasan.”

²Ayei ekasuban etich a awi a Saul anyaritae Siba. Aponi ngesi tolimokinae atamar tolot nia Daudi. Kingit Daudi ngesi tama, “Iyong irai Siba a?” Tatachak Siba tama, “Ayong ekasuban etich kon ngesi logo.”

³ Kingit ekapolon ngesi tama, “Eyei itwaan idio eyanasi ka Saul ni eringa eyari, ni apedori ayong asubea niajokon loger lokolong echikakinea ayong Akuj atamar ekokini neni a?” Tatachak Siba tama, “Eringa lokookeng a Yonasan epei eyari. Engwalit ngesi ngakejen.”

⁴Kingit ekapolon ngesi tama, “Aliwae eyei ngesi?” Tatachak Siba tama, “Eyei nawi a Makiri alo erai lokookeng a Amiel alo elomit Lodebar.”

⁵Abu ekapolon Daudi tomea itwaan anyaraun ngesi.

⁶Ani edoluni Mepiboches lo arai lokookeng a Yonasan, tarai etatait a Saul, toriedik ngesi kijuuru alongaren Daudi idodiunit arimatoi. Tanyara Daudi tama, “Mepiboches,” sodi tatachak ngesi tama, “Ayong ekasuban etich kon ngesi logo.”

⁷Tatachak Daudi ngesi tama, “Wara nyiem. Kasubea ayong iyong naajokak kotere apakon Yonasan. Kabuakini ayong iyong akwap daang nakolong arai aka apaakon Saul. Nakaneni iliwor iyong kimujeene ka ayong ngirwa daang.”

⁸Abu Mepiboches kijuuru sodi tama, “Nyo tokona ayong dang ekasuban etich kon, ekapolon? Nyoni isakea iyong asubea ayong lo ekoni nyiingok nikatoan naajokak?”

⁹Sodi tanyara ekapolon ekasuban etich a Saul lo anyaritae Siba tolimok tama, “Ainakini ayong Mepiboches lo erai etatait a ekapolon kon ibore daang nikolong arai ikeng ka ngitunga a awi keng.

¹⁰Itaate iyong, ka talokookon, ta ngikasubak etich kon amana a ngiyenet a ekapolon kon sodi tolema, taanyuneta kesi akimuj na enyamete. Ani lo erai Mepiboches, kimujeene ka ayong ngirwaa daang.” (Ayakasi Siba talokookeng ngitomon ka ngikan, ta ngikasubak etich ngitomwon-arei.)

¹¹Tatachak Siba tama, “Asubi ayong ibore daang ni ilimuni iyong, ekapolon.” Abu Mepiboches toliwor imujeenete ka ekapolon[9] ngirwa daang, loger a lokookeng a ekapolon.

¹²Ayei Mepiboches lokookeng anyaritae Mika. Toliworos ngitunga a awi a Siba daang ngikasubak etich a Mepiboches.

¹³Sodi Mepiboches lo angwalit ngakejen daang kibooyeene alo Yerusalem imujeenete ka ekapolon ngirwa daang.