Read turkana 1 Ngikapolok 1 Bible Online

1 Ngikapolok 1 - turkana bible

1 Ngikapolok 1

¹Tomojong Daudi noi toliwor tani kimukokin ngesi ngiworui luapotiok nyemoner akwaan keng.

²Sodi tolimokis ngikasubak etich keng ngesi tamasi, “Ekapolon kosi, kimiek atasakutu apese na irukete ka iyong, kitan. Inapanakin ngesi nakook kon kitomonu akwaan kon.”

³Apot kesi kirimo akwap a Isirael daang esakete apese nakebusean. Toriamunae apese na anyaritae Abichag alo Chunem, sodi torikoroe ngesi lokapolon.

⁴Arai apese ngina nakebusean noi. Kibooyoto apese ngina ka ekapolon itani, nakaneni abu ekapolon nyeepudosi ka ngesi.

⁵Abu Adonija lo arai lokookeng a Daudi ka Agis kipuruun bon ebala, “Aliwor ayong ekapolon.” Kitonyou ngesi bon ngaurukukui ka ngangolei, dio aseun ngikiliok ngitomwon-kan lu eliworosi ngasigerea na ingarenete ngesi.

⁶Emam akolongit etongolopea apakeng ngesi kingit tama, “Kotere nyo isubea iyong kona?” Arai ngesi ekile lokebusean noi. Ngesi atupit Abusalom idounio.

⁷Atukosi ngesi ka Yoab (itiokeng a Yoab ngesi Seruya), ta Abiasar lo arai emuron a Akuj. Tachamut kesi akingarakin Adonija.

⁸ Nakaneni Sadok lo arai emuron a Akuj, ka Benaya lokookeng a Yeoyada, ka Nasan lo arai ekadwaran, ka Chimei, ka Rei, ta ngasigerea naketeok Daudi, peebakito alowae a Adonija.

⁹Akolongit apei, abu Adonija, kipeye ngakipeyos a ngimesekin, ka ngimongin, ta ngitak lukoatumak anataaba a Emun, diyete elelea a Enirogel. Tanyarau ngesi talokookeng a ekapolon luche, ka ngikasubak etich a ekapolon lu aponito alo Yuda pot nakipeyos keng.

¹⁰Nakaneni nyenyarauna ngesi Nasan lo arai ekadwaran, kori Benaya, kori ngasigerea naketeok ekapolon, kori Solomon lo arai lokaatokeng lo aberu anache.

¹¹Sodi tolot Nasan nia Basicheba ana arai itiokeng a Solomon kingit tama, “Nyiirara iyong atamar aliwor Adonija lo erai lokookeng a aberu anabe Agis ekapolon a? Eringa ekapolon Daudi nyeyena ngakiro nguna!

¹²Kimiek tokona kesuruor kisaki iyong alope ayuun, toyuu tani lokookon Solomon.

¹³Tolot tokona atipei nia ekapolon Daudi tolimok kona, ‘Ekapolon kang, abe kolong bo kilimokini iyong ayong kikong atamar lokookang Solomon irumi apolou kon, kiboikin lokicholong kon. Ani ekokini bo Adonija eliwor ekapolon ai?’ ”

¹⁴ Tolim nabo Nasan tama, “Sodi ani eringa iyong iruorosi ka ekapolon, alomuni ayong neni atolim nabo ngakiro napei nguna.”

¹⁵Sodi tolot Basicheba aanyun ekapolon alokai ana aperio. Amojongit Daudi noi arai Abichag na abunit alo Chunem ngesi etani ngesi.

¹⁶Kijuuru Basicheba a arimatoi alongaren ekapolon. Kingit ekapolon ngesi tama, “Nyo isaki iyong?”

¹⁷Tatachu Basicheba tama, “Ekapolon kang, ikongi kolong iyong anikang alokiro a Ekapolon Akuj ana erai Akuj kon kitolimok ayong tama, ‘Lokookon Solomon ngesi irumi apolou kang. Iboikin ngesi lokicholong kang.’

¹⁸Nakaneni aliwor tokona Adonija ekapolon, tarai bo nyiyeni iyong ekapolon ngakiro nguna.

¹⁹Alemu ngesi ngakipeyos nakaalak a ngimongin, ka ngimesekin, ta ngitak lukanakunak. Epeyou ngesi talokookon, ka Abiasar lo erai emuron, ta Yoab lo erai ekarikon a ngasigerea. Nakaneni nyipeyouno ngesi lokookon Solomon.

²⁰Ekapolon kang, ingoliunito Ngisirael daang nikon, kidarito iyong tolimok kesi atamar ngae iboikin lokicholong kon kirum apolou.

²¹Ani pekisubak iyong kongina, ketoronio ayong ka lokookang Solomon akolongit na itoanea iyong.”

²²Ani eringa Basicheba iruorosi ka ekapolon, tolomu Nasan lo arai ekadwaran kai a ekapolon.

²³Tolimokinae ekapolon tamarae, “Eyei ekadwaran Nasan nege.” Ani ebuni Nasan nia ekapolon, kijuuru ngesi noi a arimatoi alongaren ekapolon.

²⁴Tolim Nasan tama, “Ekapolon kang, ilimu iyong atamar irumi Adonija apolou kon, kiboikin lokicholong kon a?

²⁵Akolongit na tokona naga, alot ngesi akipeyore ngakipeyos nakaalak a ngimongin, ka ngimesekin ta ngitak lukanakunak. Epeyou ngesi talokookon daang, ka Yoab lo erai akarikon a ngasigerea kon,[1] ta Abiasar lo erai emuron. Imujete tokona kesi iremasi ebalasi, ‘Ekapolon Adonija toyei!’

²⁶Nakaneni ekapolon nyipeyouno ngesi ayong, ka Sadok lo erai emuron, ka Benaya lokookeng a Yeoyada, ta lokookon Solomon.

²⁷Iyong ekapolon itiakuni ngakiro nugu, sodi nyiilimok ngikasubak etich kon atamar ngae iboikin lokicholong kon kirum apolou a?”

²⁸Sodi tatachu ekapolon Daudi tama, “Tanyarau Basicheba tobongu nege.” Tolomu Basicheba towo alongaren ekapolon.

²⁹Kikong ekapolon tama, “Alokiro a Ekapolon Akuj ana eyari, ana kolong kayuuni ayong alochan kadaang,

³⁰ekongi ayong abala, ‘Lokookon Solomon ngesi irumi apolou, kiboikin lokicholong, kilunyokin nados kang.’ Asubakini ayong akolongit naga ngakiro nakolong kechikakini iyong.”

³¹Kijuuru Basicheba noi idodiunit arimatoi tama, “Toyar ekapolon kang Daudi jik.”

³²Tolim Daudi tama, “Tanyarakinae Sadok, ka Nasan, ta Benaya.” Ani epote kesi,

³³tolimok ekapolon kesi tama, “Torikosi ngikasubak etich kang, kimiekis lokookang Solomon todoka losikiria lopalem kang, sodi kitenasi ngesi tolot lolelea a Gion.

³⁴Neni ngesi iwasakineta Nasan, ka Sadok ngesi akimiet toliwor ekapolon a Isirael. Ani erumor tokutakis aburuch kiremasi tamasi, ‘Ekapolon Solomon toyei!’

³⁵Kiwapuut ngesi na ebunio akiboikin lokicholong kang a apolou. Aseu ayong ngesi kilunyokin napolou kang toliwor ekapolon a Isirael ka Yuda.”

³⁶Tatachu Benaya tama, “Ikokinete neni! Kimiek Ekapolon Akuj na erai Akuj a ekapolon kang Daudi kiyook ngakiro nguna.

³⁷Loger lo ngoon arukitotor Ekapolon Akuj ka iyong, irukete tani ka Solomon, kitiliwo apolou keng na epiaritae noi akidwang nakon.”

³⁸Apot Sadok, ka Nasan, ka Benaya, ta ngasigerea naketeok ekapolon kidokokis Solomon losikiria a Daudi, sodi kitenasi tanang lolelea a Gion.

³⁹Tolem Sadok aamwara na eturakinitae akimiet, sodi kiwasak Solomon akimiet ngina aloeam a Akuj. Tokutakis kesi aburuch, kiremasi ngitunga daang tamasi, “Ekapolon Solomon toyei!”

⁴⁰Sodi kiwapuut ngitunga daang ngesi iremasi a alakara, ekusete ngibunei. Amaranete ngalup kotere echale lokech ngolo.

⁴¹Ani esaa lo arumoreta Adonija ka ngipeyok keng akimuj, kiirasi kesi echale. Ani iirari Yoab erue a aburuch, kingis tama, “Eka inyo echale lo eyei lore ngolo?”

⁴²Ani eringa ngesi iruoro, todolu Yonasan lokookeng a Abiasar alo arai emuron. Tolim Adonija tama, “Tolom irai iyong itwaan ajokon. Iyaunit tokona ngon ngakiro naajokak.”

⁴³Tatachak Yonasan Adonija tama, “Nyikote neni, kainyo etiliwo ekapolon yok Daudi Solomon ekapolon.

⁴⁴Ameari ngesi Sadok, ka Nasan, ka Benaya lokookeng a Yeoyada, ta ngasigerea naketeok ekapolon, sodi kitenasi Solomon. Kidokokis kesi Solomon losikiria a Daudi

⁴⁵sodi kiwasakis Sadok ka Nasan ngesi akimiet alolelea a Gion, toliwor ekapolon. Ani erumor toloto kesi lore iremasi a alakara, echalasi tokona ngitunga. Echale ngolo ngesi iirasi esi.

⁴⁶Ibooyi tokona Solomon alokicholong a apolou.

⁴⁷Ani eya daang, aloto ngikasubak etich a ekapolon Daudi nia Daudi ebalasi, ‘Kimiekisi Akuj kon kitiliwo ekiro a Solomon lo eyenikinitae akidwang lokon, nabo kitiliwo apolou keng na epiaritae noi akidwang nakon.’ Sodi kijuuru ekapolon Daudi alokitanda keng ilipit

⁴⁸ebala, ‘Epuruutu Ekapolon Akuj na erai Akuj a Isirael, na etiliwo akolongit naga ipei a ngide kang ekapolon, kiboikin lokicholong kang a apolou eringa ayong ayari etee!’ ”

⁴⁹Sodi toema ngipeyok a Adonija daang, tonyout taman itwaan daang anakodet keng tolot.

⁵⁰Toem Adonija Solomon. Tolot loeam a Akuj toting ngaamwar a ekeno[2] a ngakipeyos.

⁵¹Tolimokinae Solomon kona, “Eemit Adonija ekapolon Solomon. Arwakin ngesi ngaamwar a ekeno a ngakipeyos ebala, ‘Asaki ayong kikong mono ekapolon Solomon anikang atamar nyakaari ayong.’ ”

⁵²Tolim Solomon tama, “Ani kidodiu ngesi atamar arai itwaan nikamunoi, emam itwaan etapi tani etimot epei a akou keng, nakaneni ani kerai ngesi itwaan aronon, etoani.”

⁵³Tomea Solomon ngitunga arikun Adonija. Sodi torikunoe ngesi alokeno a ngakipeyos. Tolot ngesi nia ekapolon, kijuuru alongaren keng idodiunit arimatoi, sodi tolimok ekapolon ngesi tama, “Kape nawi kon.”