Read turkana 1 Ngikapolok 10 Bible Online

1 Ngikapolok 10 - turkana bible

1 Ngikapolok 10

¹Ani iirari akapolon a Cheba ekipur a Solomon ka eger lo ayenea ngesi Ekapolon Akuj, abu ngesi tolot nia Solomon aroanar kingitana ngakiro nakaagongok.

²Tanangu ngesi Yerusalem erukito ka ngimeanara lukaalak, ta ngikaala lu ewokito ngikito lukitukukunyet akimuj, ka asir, ta egolit lotikaalan. Ani ebuni ngesi nia Solomon, kingitana ngesi ngakiro daang nacha apedori akitamun.

³Tatachu Solomon ngakiro nguna daang, emam ibore abu tokuruwo akisisaun.

⁴Kiira akapolon ngina ngakiro a Solomon na aosou. Kingolik akai a ekapolon na aduki Solomon.

⁵Kingolik ngesi akimuj na emujio alomeesa a Solomon, ka ngakais a ngikapolok a arieng keng. Kingolik nabo eger lo arekinitere ngikasubak etich a akai a Solomon, ka ngiworui lu ikwaan lu anapito kesi. Kingolik ngikasubak etich lu esumujeenete Solomon. Kingolik ngakipeyos na inomio na epeyoene Solomon alokai a Akuj. Ani ingolikini ngesi ngakiro nguna daang, tatalasi tolilimiyo.

⁶Tolimok ngesi ekapolon Solomon tama, “Ikwa ngaka iteni ngakiro nakolong eirari ayong anakwap kang, ngakiro na isubi iyong ka na aosou kon!

⁷Nakaneni nyenupa sek ayong ngakiro nguna jik, mati been kabu ayong engolik a ngakonyen kang. Ikwa keringa kolong ayong nyiirara tani epewae a aosou kon. Etiono aosou kon noi ka ebari kon, idwangit eger lokolong kalimokinitae ayong.

⁸Abe ngika ekeny ajokon ngitunga kon! Abe ngika ekeny ajokon ngikasubak etich kon lu irukito ka iyong jiik epupete ngakiro kon a aosou!

⁹ Kipuroe Ekapolon Akuj na erai Akuj kon! Edodiu ngesi alakara keng kotere iyong ani kitiliworea iyong ekapolon a Isirael. Aloger eminar ngesi Isirael jik, kitiliwo ngesi iyong ekapolon sodi kirichakinea etal ka ngakiro na iteni.”

¹⁰Ani erumor nak akapolon ngina ekapolon Solomon ngainakinet na ainunit ngesi Solomon na araakasi egolit lo eporit ngakiloi ngabunge ngoomwon, ka ngikito lukitukukunyet akimuj lukaalak, ta ngamoru nakaalak a ngaropiyae. Ngikito lu itukukunyete akimuj lu ainakini ngesi Solomon, alalak noi nyeriamuna Solomon lu etia ngulu a ache. (

¹¹Ngatubwae a Iram nasek ayauniyete egolit alo Opir, apot yaut ngakito a ngimusandali nakaalak ka ngamoru nakaalak a ngaropiyae.

¹²Todukio Solomon ngakito ngadoket a akai ka akai keng, tosubea nabo tani ngagitae na eeotor ngikaeok. Tani nakolongit naga, emam ngakito a ngimusandali naajokak noi ayaun Isirael. Nabo emam ngache na ikote nguna na engolikin nabo jik.)

¹³Abu ekapolon Solomon nak akapolon a Cheba ibore daang nicha asaki, peimaritae ngainakinet napalem a etal na achamakinitae einakinio ngesi. Apot ngesi ka ngimeanara keng tobongosi nakwap a Cheba.

¹⁴Alokaru a epei, ariamununi Solomon egolit lo esibit ngakiloi ngabunge ngatomwon-arei ka ngauni

¹⁵toyei echur[14] lo atachete ngimuchurus, ka ngaropiyae na ariamunitae alomuchuruseenu, ta ngaropiyae na alemununete ngikapolok a Arabia, ta ngikapolok a ngiwaitin alugelagelae a Isirael.

¹⁶Tosubak Solomon ngaupwala naapolok ngamiae ngaarei alogolit. Egolit lo esibit ngakiloi ngakan-kaarei ngesi asubere aupwal apei.

¹⁷Tosubak ngaupwala naachik ngamiae ngauni alogolit. Egolit lo asibit ngakiloi ngaarei ngesi asubere aupwal apei. Kiwaak ngesi ngaupwala nguna daang tooma akai a Amoni a Lebanon.[15]

¹⁸Abu ngesi nabo tosubak ekicholong a ekapolon lotiapolon, ewae epewae aburuchiarit a ekelae a etom, toburuchia ewae loche a egolit bon.

¹⁹Ayakasi ekicholong ngolo ngadoket ngakan-kapei. Ayei ekisikwaane a akou a itaok lowae lo aabor a ekicholong. Ewae lopalem idokonokinio ngakan, ayei ekisikwaane a engatuny lowaitin daang.

²⁰Anadoket anakan-kapei ayei ekisikwaane a engatuny losal a adoket a apei, arai daang ngingatunyo ngitomon ka ngiarei. Emam ekicholong eche napei kanuan ikwaan ka ngolo anapolou a ache.

²¹Ngikopoi lu amasea Solomon daang asubitae a egolit. Ngiboro lukimujet lu ayakasi kai a Amoni a Lebanon daang, asubitae a egolit bon. Amam ngiboro lukwangae kainyo arai ngasua nakwangae ibore pasit ngirwa lua Solomon.

²²Ayakasi ngesi ngatubwae nakaalak na ametae ananam aapei ka ngatubwae a Iram. Arai nacha edaunotor ngikaru nguuni, tobongut ngatubwae keng yaut egolit, ka ngasua nakwangae, ka ngikel a etom, ta ngichomin ta ngikadokoi.

²³Edwangit Solomon ngikapolok luche a ngakwapea daang kotere ebari ka aosou.

²⁴Tasaka ngitunga a ngakwapea daang aponere akiirar aosou a Solomon na ainakini Akuj ngesi.

²⁵ Itwaan cha daang ni ebuni nikeng, inu ngainakinet a ngiboro alukwangae ka egolit, ka ngiworui, ka ngiboro lujiet, ka ngikito lukitukukunyet akimuj, ka ngangolei ta ngisikiria. Asubasi ngakiro nguna loger ngolo ekaru daang.

²⁶Tochunak Solomon ngaurukukui na irito ngangolei ngamiae ngatomon ka ngoomwon ka ngikameak ngangolei ngabunge ngatomon ka ngaarei. Kiwaak ngesi ngiche lorerea ngiche, sodi kiruko ngesi ka ngiche alo Yerusalem.

²⁷Ngirwa lu araakar Solomon ekapolon, asojunito ngasua nakwangae alo Yerusalem loger a ngalup. Alalak nabo ngakito a ngichekereng alo Yerusalem loger lo elalaketa ngakito a ngikuno anaukon a akwap a Yuda.

²⁸Aweikinito ngimuchurus a ekapolon egielit a ngangolei ana ayauniyo alo Misiri[16] ka Kilikia.

²⁹ Aweikinito kesi tani egielit a ngaurukukui ana iritae ana aponeenete alo Misiri. Agialanakinete kesi ngikapolok a Ngiiti, ka Siria, ngaurukukui a ngaropiyae a ngamiae a ngakan-kapei, ani ngangolei a ngaropiaye a amiat a apei ka ngatomwon-kan apei kech daang.