Read turkana 1 Ngikapolok 11 Bible Online

1 Ngikapolok 11 - turkana bible

1 Ngikapolok 11

¹Amina Solomon ngaberu nakaalak a ngakwapea anache. Eusit ngesi nakookeng a ekapolon a Misiri. Abu nabo kiut ngaberu a akwap a Ngiiti, ka na Ngimoab, ka na Ngiamon, ka na Ngiedomae ta Ngisidon.

²Abu Solomon kiut ngaberu a ngakwapea ana kolong alimokini Ekapolon Akuj Ngisirael tama, “Nyiuta ngapesur kech, kori nyiutasi kesi ngapesur kus kainyo kibatarete kesi esi kilipa ngakujo nagelayek.”

³Ayakasi Solomon ngaberu ngamiae ngakan-kaarei na araakasi tanakookech a ngikapolok, ayakasi nabo ngapesur a ngabwes ngamiae ngauni. Apot ngaberu keng kibatasi ngesi ani a Akuj.

⁴Ani enangi ngirwa lu amojongea Solomon, apot ngaberu keng kibatasi ngesi sodi kilip ngakujo nagelayek. Peamuno ngesi Ekapolon Akuj na erai Akuj keng loger lokolong amunor apakeng Daudi Ekapolon Akuj.

⁵Kilip Solomon Achitaros na erai akuj naberu a Ngisidon, kilip nabo Molek[17] na erai akuj a Ngiamon nakikadakini.

⁶Tosechak Solomon Ekapolon Akuj, nyeesub nguna a iteni ani a Ekapolon Akuj loger lokolong asubea apakeng Daudi.

⁷Todukok Solomon ngasenon na ilipeenere Kemoch na erai akuj nakikadakini a Ngimoab moru lo eyei kide Yerusalem. Todukok nabo ngasenon na ilipeenere Molek na erai akuj nakikadakini a Ngiamon.

⁸ Toduk nabo ngesi ngasenon na ilipeeneta ngaberu keng daang na ngakwapea anache, kinomeeneta emitina, ta ngakipeyos kotere ngakujo kech.

⁹Tongoik Ekapolon Akuj Solomon ani ebataror anikeng ana erai Akuj a Isirael, nakolong abuni nikeng ngabunet ngaarei,

¹⁰todungok ngesi atamar nyiilip ngakujo nagelayek. Nakaneni abu Solomon nyiira ngakiro na adungokini Ekapolon Akuj.

¹¹Sodi tolimok Ekapolon Akuj Solomon tama, “Aloger iyechakinea iyong kichwangak akichikakinet kang, ta ngakitatamet kang, iteni kademari ayong iyong apolou, ainak ekasuban etich kon.

¹²Ani kotere apakon Daudi, nyasubakini ayong nguna ngirwa lu iyarea iyong, pearai atiakatiakari ayong apolou ngina anakan a lokookon.

¹³Nyademari ayong ngesi apolou daang, pearai aisikinea ngesi ekitela epei, kotere ekasuban etich kang Daudi, ka ere a Yerusalem lokolong aseuni ayong etiliwo ekang a ilope.”

¹⁴Abu Ekapolon Akuj kitiliwo Adad emoit a Solomon. Auriunitae Adad anawi a ngikapolok a Edom.

¹⁵Kolong sek, na etijio Daudi Edom, abu Yoab lo arai ekarikon a ngasigerea a Daudi tolot nakwap a Edom akinuk ngikatoak. Abu Yoab taar ngikiliok daang kaina.

¹⁶Kainyo apot Yoab ka ngitunga keng kiboyoto alo Edom ngilapio ngikan-kapei, tanang ni aareta itwaan nikile daang alo Edom,

¹⁷nakaneni apot Adad ka ngikasubak etich a apakeng ngiche lu araakasi Ngiedomae tosiwa toloto Misiri. (Ngirwa ngulu, aringa Adad edit.)

¹⁸Tonyout kesi alo Midian toloto Paran. Kirumut kesi ngitunga ngiche kaneni, kirukosi tananga Misiri. Nak ekapolon ngolo Adad akai, nak akimuj ta amana.

¹⁹Toelokin Adad ka ekapolon a Misiri noi, sodi nak ekapolon ngesi nakaatokeng a aberu keng kiut. Arai ngina nakaatokeng a akapolon anabe Tapenes.

²⁰Kidou aberu ngina idia ni anyarao Genubas, sodi kitanu aberu a ekapolon anawi a ekapolon, kiruko ka talokookeng a ekapolon luche.

²¹Ani iirari Adad alo Misiri atamar atoana Daudi, kiira nabo atamar atoana Yoab lo arai ekarikon a ngasigerea, abu Adad tolimok ekapolon tama, “Kimiekinae ayong atobong nakwap kang.”

²²Kingit ekapolon ngesi tama, “Kotere nyo? Nyooni kingopik iyong anikang isakea iyong akibong nakwap kon?” Tatachu Adad tama, “Kimiekinae cha ayong atolot.” Adad lo arai ekapolon a Edom, arai itwaan niaronon ni aremokino Ngisirael noi.

²³Abu Akuj nabo kitiliwo Reson lo arai lokookeng a Eliada emoit a Solomon. Asiit sek Reson ani eyei ekapolon keng Adadeser lo arai ekapolon a akwap a Soba.

²⁴Tochunak Reson ajore a ngirukooi, toliwor ngesi ekarikon a ngirukooi kangulu. (Asubasi nguna kejwoto Daudi ka Adadeser sodi kidwang. Taar Daudi Ngisiria lu aikinito Adadeser.) Toloto Reson ka ajore keng toloma Damasko. Kitiliwosi ngitunga ngulu Reson ekapolon a Siria.

²⁵Arai Reson emoit a Ngisirael ngirwa daang lua apolou a Solomon.

²⁶Itwaan iche ni abu tonger Solomon ngesi epei a ngikapolok a arieng keng lo anyaritae Yeroboam, lokookeng a Nebat, lo abunit alo Sereda anakwap a Epiraim. Arai itiokeng apuserut na anyaritae Serua.

²⁷Ngakiro angerio ngesi Solomon kesi nugu. Emuleleari Solomon ewae lo alo kide Yerusalem ka asubanakin ngawasea a ere.

²⁸Arai Yeroboam esorokit lo ayeni etich. Ani ingolikini Solomon eger lo asubea Yeroboam etich lokojokon, kitiliwo ngesi eweikinit etich lo edesikinitae ngitunga lo asubio anakwap a ngitela a Manase ka Epiraim.

²⁹Akolongit apei, tonyou Yeroboam alo Yerusalem, kiriamun ngesi ka ekadwaran lo anyaritae Aija lo abunit alo Chilo. Kiriamun kesi aluarei naroatin.

³⁰Tobut Aija eworu lokitetet anapit ngesi tochilichili, tochilun ngawarui ngatomon ka ngaarei.

³¹Tolimok ngesi Yeroboam tama, “Tolema ngawarui ngatomon toliworos ngakon, kainyo kilimokinit iyong Ekapolon Akuj na erai Akuj a Isirael ebala, ‘Kingolik a, edikino ayong atiakatiakari apolou anakan a Solomon sodi kainak iyong ngitela ngitomon.

³²Etingi Solomon ekitela epei bon kotere ekasuban etich kang Daudi, ka ere a Yerusalem lo aseu ayong toliwor ekang alorerea kadaang anakwap a Ngisirael.

³³Asubakini ayong nguna kainyo kanger Solomon ayong nabo elip ngesi ngakujo nagelayek na enyaritae Achitaros na erai akuj a Ngisidon, ka Kemoch na erai akuj a Ngimoab, ta Molek na erai akuj a Ngiamon. Awou Solomon[18] akiwap ngirotin kang, tosub na iyookino alongaren kang, ka akirichakin ngakitatamet kang, ka ngakiro kang, loger lo kolong erichakinitor apakeng Daudi.

³⁴Nakaneni nyademari ayong ngesi apolou daang, nabo etiliwori ayong ngesi ekapolon ngirwa daang lu eringaakar ngesi eyari. Asubakini ayong nguna kotere ekasuban etich kang Daudi lokolong aseuni ayong, kiwap ngesi ngitalio kang, ka ngakitatamet kang.

³⁵Ademari ayong lokookeng a Solomon apolou kainak iyong ngitela ngitomon.

³⁶Nakaneni ainakini ayong lokookeng a Solomon ekitela epei, sodi toliwor ngirwa daang, epolokini alesit a ekasuban etich kang Daudi Yerusalem, lo erai ere lo aseu ayong kelipeenere.

³⁷Kaseu ayong iyong Yeroboam topolok wadaang nicha isaki iyong, toliwor ekapolon a Isirael.

³⁸Ani kiwap iyong ngakiro kang dir kirichak nguna kadungokinit, kiwap ngirotin kang, tosub na etee ayong atamar iyookino, kirichak ngakitatamet kang ka ngitalio, loger lokolong asubea ekasuban etich kang Daudi, kiruki ayong ka iyong jiik. Ketiliwori ayong iyong ekapolon a Ngisirael, nabo erichak atamar irumete ngalesea kon apolou kon loger lokolong asubea ayong Daudi.

³⁹Kotere akisech a Solomon, erirae ayong ngalesea a Daudi, nakaneni meere jik.’ ”

⁴⁰Sodi tasak Solomon akiar Yeroboam, nakaneni tosii Yeroboam tolot nia ekapolon a Misiri alo anyaritae Chichak, kiboi kaina tanang ni atoanea Solomon.

⁴¹Ngakiro nache daang na asubi Solomon, na eraakasi ngaka aosou keng, ka eger lo asubea ngesi etich, igiritae nakitab na enyaritae Ngakiro a Solomon.

⁴²Ebooyi ngesi alo Yerusalem apolokinit Isirael daang a ngikaru a ngitomwon-omwon.

⁴³Totoan ngesi sodi tonukakinae lore a Daudi. Kilunyokin lokookeng lo anyaritae Reoboam napolou keng.