Read turkana 1 Ngikapolok 12 Bible Online

1 Ngikapolok 12 - turkana bible

1 Ngikapolok 12

¹Tolot Reoboam Chekem ni achunakina ngitela a Ngisirael lua lokwap daang akitiliwor ngesi ekapolon.

²Abu Yeroboam lo arai lokookeng a Nebat, lokolong sek asii ani a ekapolon Solomon tolot Misiri, kiira ngakiro nguna, tobongu alo[19] Misiri.

³Tanyarata ngitunga a ngitela alu alokwap Yeroboam sodi kirukosi nia Reoboam tolimokis tamasi,

⁴“Kiboliar kolong apakon sua, kitusub etich loationon. Ani kitiliwo iyong etich kosi lo nyetiono sodi tojoker eboyor kosi, kiliwor sua ngitunga kon lu kimuno iyong.”

⁵Tolimok Reoboam kesi tama, “Kapesi tasala ngirwa nguuni sodi pot katatachak ngakiro nguna.” Apot kesi torotokis.

⁶Tolot Reoboam lokasukou lukolong araakasi ngiketutukok a Solomon alo arai apakeng, kingit kesi tama, “Ibalasi esi ayong tatachak ngitunga lugu anukiro?”

⁷Tatachakis ngikasukou ngesi tamasi, “Ani kisaki iyong akisub etich a ngitunga kalu niajokon, tatachanak kesi ngakiro naajokak nakingiseta iyong ngakiro, sodi tosuba kesi etich kon kimunosi iyong.”

⁸Nakaneni nyeekachik Reoboam ngakiro na alimokinete ngikasukou. Tolot ngesi losorok lukolong apolounete ka ngesi lu araakasi ngiketutukok keng.

⁹Kingit kesi tama, “Anukiro ibalasi esi ayong atolimok ngitunga lugu, lu ebalasi ayong, ‘Kitiliwo etich lokolong kiinakini apakon sua lo nyetiono’?”

¹⁰Tatachakis ngesi ngisorok tamasi, “Tolimok kesi kona, ‘Elangir ekimoin kang loochi idwangit aabor a apakang!

¹¹Kitusubi kolong apakang esi etich loationon, etiliwori tokona ayong etich ngolo lo etiono noi. Kidesi kolong apakang esi a ngalita, kedesi tokona ayong esi a ngarega!’ ”

¹²Adaunet a ngirwa a nguuni, tobongut Yeroboam ka ngitunga nia ekapolon Reoboam loger losek alimokinitor ngesi kesi ebala, “Tobongutu nikang adaunet a ngirwa a nguuni.”

¹³Nyeekachik ekapolon ngakiro nasek alimokinete ngikasukou ngesi, dio kisuruoria ngitunga niaronon.

¹⁴Kiruor ngesi loger losek alimokinitotor ngisorok. Tolim tama, “Kitusubi kolong apakang esi etich loationon, nakaneni eatakini tokona ayong totioner noi. Kidesi kolong ngesi esi a ngalita, nakaneni kedesi tokona ayong esi a ngarega!”

¹⁵Asaki Ekapolon Akuj akiyookin ngakiro nakolong sek alimokini Yeroboam lo arai lokookeng a Nebat kisitoru nia Aija alo abunit alo Chilo. Ngakiro nguna kesi peapupokinea ekapolon Reoboam ngakiro a ngitunga.

¹⁶ Ani ingolikinete ngitunga daang atamar awou ekapolon apupokin kesi, tatachakis kesi ekapolon tamasi, “Nyo ibore ajokon kiriamuni ngoni anapolou a Daudi? Emam ibore kirumi ngoni ani a lokookeng a Yese. Ee Ngisirael, toloto nawiyei kus! Kimiekisi Reoboam kirichak ngakiro a awi keng a ilope.” Sodi tolungakinos Ngisirael tobongosi nawiyei.

¹⁷Topolok Reoboam Ngisirael lu ayakasi nakwap a Yuda make.

¹⁸Ani erumor tomea ekapolon Reoboam Adoniram losek aweikinit etich lo edesikinitae ngitunga tolot nia Ngisirael, nakaneni kimasa ngitunga Adoniram a ngamoru taara. Ani ikokinete ngakiro neni, kikirikirakin Reoboam todoka naurukuk keng na irito ngangolei tosii tolot Yerusalem.

¹⁹Tani tokona, engerito ngitela lua lokwap Isirael apolou a awi a Daudi.

²⁰Ani iirarete Ngisirael atamar abongu Yeroboam alo Misiri, apot tanyarata ngesi bu ni eriamiriamito ngitunga kitiliwosi ngesi ekapolon a Isirael. Ekitela a Yuda bon ngesi abu kidong epolokinito ngalesea a Daudi.

²¹Ani enanguni Reoboam Yerusalem, tochunak ngesi ngitunga a ngitela a Yuda ka Benjamen lu araakasi ngasigerea nakajwok ngabunge amiat apei ka ngatomwon-kauni. Asaki ngesi alosit akitijwore ngitela lua lokwap Isirael topolokinio tani kesi.

²²Nakaneni kisuruor Akuj ekadwaran Chemaya tama,

²³“Tolimok Reoboam lokookeng a Solomon, lo erai ekapolon a Yuda, tolimok tani ngitunga daang a ngitela a Yuda ka Benjamen kona,

²⁴‘Ebala Ekapolon Akuj esi nyiitijikis ngitunga a Isirael lu eraakasi ngikaitotoi kus. Kapesi esi daang nawiyei kainyo eraakasi ngakiro na asubakin ngakang.’ ” Kiirasi kesi daang ngakiro na adunguni Ekapolon Akuj, sodi tobongosi nawiyei.

²⁵Toduk ekapolon Yeroboam ngawasea a ere a Chekem anakwap ana a ngimukur a Epiraim, sodi tolom neni a ngirwa. Torotok kaneni toduk ngawasea a ere a Penuel.

²⁶Tolim Yeroboam alotau tama, “Edikino tokona apolou ebongori nawi a Daudi.

²⁷ Ani kelosieneto ngitunga lugu Yerusalem akipeyore ngakipeyos alokai a Ekapolon Akuj, kangerete ayong ekapolon kech, tachamut Reoboam lo erai ekapolon a Yuda, sodi kataar ayong.”

²⁸Ekisidi a akitamanar ngakiro nugu, abu ekapolon tosubak ekisikwaane a ngitak a ngiarei alogolit sodi tolimok ngitunga keng tama, “Iloseenete esi Yerusalem akilip nakanuan. Ee Ngisirael, ngakujo kus nugu, nakolong kipudunete esi alo Misiri!”

²⁹Kiwaak ngesi ngitak ngulu ipei Besel, kiwaak niche Dan.

³⁰Apot ngitunga kikokis esechete neni, tolosieneto akilip apei alo Besel, toloto akilip nache alo Dan.[20]

³¹Todukok Yeroboam ngasenon na ilipeenere nabo kidiama ngimukur, sodi toseu ngimurok anawiyei ana pearaakasi ngaka ekitela a Lawi.

³²Abu Yeroboan kiwaak esukukuu akolongit na ngatomon ka ngakan a elap alo a ngikan-kauni. Ekwaan ka esukukuu lo asubeeneo alo Yuda. Epeyoene Yeroboam ngakipeyos a ngitak alu a egolit alu asubuni ngesi, epeyoene alokeno alo ayei Besel, sodi kiwaak neni ngimurok lu asubete etich ani elipeenere anisek aduki ngesi.

³³ Tolot ngesi lokeno lo ayei Besel akolongit na ngatomon ka ngakan a elap alo a ngikan-kauni, alosek aseuni ngesi ilope, sodi kipeye ngakipeyos nasek ewaakini ngesi kotere Ngisirael.