Read turkana 1 Ngikapolok 13 Bible Online

1 Ngikapolok 13 - turkana bible

1 Ngikapolok 13

¹Awei Yeroboam alokwaas a ekeno esaki akipeyore ngakipeyos. Sodi todolu ekadwaran a Akuj alo Yuda bu Besel eyaunit ngakiro na adungokinit Ekapolon Akuj.

²Loger losek adungunitor Ekapolon Akuj, abu ekadwaran ngolo kilam ekeno ngolo irema ebala, “Ee ekeno, ekeno, ebala Ekapolon Akuj kona, ‘Idounio idia anawi a Daudi ni enyarao ekiro keng Yosia. Engolakini ngesi kidiama kon ngimurok lu esubete etich alokenoi alugelayek, lu ipeyoote ngakipeyos alokidiama kon. Inomi Yosia ngakoyo a ngitunga alokidiama kon.’ ”

³ Torubak ekadwaran ngolo iruoro ebala, “Ibore en idodiuni atamar eponito ngakiro nugu ani a Ekapolon Akuj, ‘Eukor ekeno logo sodi kiealar ekuron keng.’ ”

⁴Ani iirari ekapolon Yeroboam ngakiro nguna, todod ekadwaran ngolo tama, “Kirumutu itwaan ngin!” Atipei tolilimiyo akan a Yeroboam kitenar, tokuruwo akudokin.

⁵Atipei toukor ekeno sodi tobukokin ekuro keng nalup loger losek adwaritor ekadwaran ngolo itemem ka ngakiro a Ekapolon Akuj.

⁶Tolimok ekapolon Yeroboam ekadwaran tama, “Kilipakinae kare ayong ani a Ekapolon Akuj ana erai Akuj kon, sodi ketangalek akan kang!” Kilip ekadwaran Ekapolon Akuj sodi kitangalekinoe akan a ekapolon.

⁷Tolimok ekapolon ekadwaran ngolo tama, “Bua erukosi ka ayong nawi kang kimuj. Kainakini ayong iyong ebachit kotere ngakiro na kisubea iyong ayong.”

⁸Tolimok ekadwaran ekapolon tama, “Arai tani kiinak iyong ayong epewae a ebari kon, pekiruko ayong ka iyong nawi kon. Nyikimuji ayong ka iyong kori nyikimasi,

⁹kainyo kadungokini Ekapolon Akuj ayong ngakiro nugu ebala, ‘Nyiimuj kori nyiimat idiobore, nabo ani ibonguni nyiitoru lorot lotete ibunio.’ ”

¹⁰Abu ngesi todepa erot losek etoruni, sodi kitor lorot eche ebongori.

¹¹Ngirwa ngulu ayei ekadwaran lo amojongit Besel. Pot talokookeng[21] tolimokis ngesi ngakiro daang na asubi ekadwaran a Akuj alo Besel akolongit ngina. Tolimokis apakeng tani ngakiro na alimokini ekadwaran a Akuj ekapolon.

¹²Kingit apakech kesi tama, “Etori ngesi lorot ali ebongi?” Kidodikis kesi ngesi[22] erot,

¹³sodi tolimok ngesi talokookeng tama, “Topetakinae ngiboro losikiria.” Topetakis kesi ngiboro losikiria dio ngesi adokar tolot.

¹⁴Kiwap ngesi ekadwaran a Akuj toriam ibooyi alokwap echoke, dio akingit tama, “Iyong ekadwaran lobe ibuni alo Yuda a?” Tatachu ngesi tama, “Ee.”

¹⁵Sodi tolimok ekadwaran lomojong ngesi tama, “Bua apana nawi emuja.”

¹⁶Tatachu ekadwaran lo a Yuda tama, “Nyikirukori ayong ka iyong nawi kon kori nyachamuni aliwor epeyonon kon. Nyikimuji ayong kori nyikimasi ka iyong idiobore kane,

¹⁷kainyo kadungokini Ekapolon Akuj ayong tama, ‘Nyiimuj kori nyiimat idiobore kaina, nabo ani ibonguni, nyiitoru lorot lobeen ibunio.’ ”

¹⁸Sodi tolim ekadwaran lomojong a Besel tama, “Arai ayong dang ekadwaran loger kon. Ameuni been Akuj emalaikat katodungok ayong tama, ‘Tobuu ngesi nawi kon sodi kisumuj nabo tamat idiobore.’ ” Nakaneni engalae ekadwaran lomojong ngolo loche.

¹⁹Abu ekadwaran lo a Yuda kirukosi ka lomojong nawi keng kimuja aapei.

²⁰Ani eringa kesi ibooyete alomeesa imujete, kisuruorik Ekapolon Akuj ekadwaran lomojong,

²¹sodi kikaloik ngesi ekadwaran lo a Yuda tama, “Ebala Ekapolon Akuj kona, ‘Aloger iwounea iyong akiwap ngakiro a Ekapolon Akuj sodi towou akirichakin ngitalio lu kidungokini ngesi iyong,

²²nakaneni ibongu iyong kimuj ani kolong kitengeritoe imujea. Ani kona ikokinea iyong neni, kiario iyong, nabo nyikinukakinio iyong naliel kata apaakon.’ ”

²³Ani erumorete kesi akimuj, topetak ekadwaran lomojong ngiboro losikiria a ekadwaran a Yuda,

²⁴taram ekadwaran a Yuda esikiria keng tolot. Ani enangi lorot, kiriamun ka engatuny, taar engatuny ngesi. Toper akwaan keng alorot, towaas esikiria ka engatuny alodiyete akwaan ngina.

²⁵Kitorut ngikiliok ngiche neni kingolikis akwaan eperi alorot, towei engatuny alodiyete. Toloto kesi kisisata ngakiro nguna alo Besel.

²⁶Ani iirari ekadwaran lomojong ngakiro nguna tolim tama, “Erai itwaan ngini ekadwaran lo ngoon awouni akiwap ngakiro na adungunit Ekapolon Akuj! Kotere ngakiro nguna, ameu Ekapolon Akuj engatuny lo anyilinyilaa ngesi taar, itemem ka akiroit nakolong alimokini Ekapolon Akuj ngesi.”

²⁷Sodi tolimok ekadwaran ngolo talokookeng tama, “Topetakinae ngiboro losikiria.” Sodi topetakis kesi.

²⁸Todoka ngesi losikiria tolot toriam akwaan a ekadwaran kangolo eperi alorot towaas esikiria ka engatuny alodiyete. Aringa engatuny nyenyama akwaan a ekadwaran kangolo, nabo aringa nyenyilinyilaara esikiria.

²⁹Tadaku ekadwaran lomojong ngolo akwaan a ekadwaran aloche, kidokok losikiria, tobuu lore a Besel, sodi kigoror ani erumor tonuk.

³⁰Tonukak ngesi akwaan ngina naliel a ngitunga a awi keng a ilope. Sodi kigoro ngesi ka talokookeng ebalasi, “Wae, lokaatokang, lokaatokang!”

³¹Ani erumori ngesi akinuk ekadwaran ngolo, tolimok talokookeng tama, “Ani atoani ayong, tonukakinae naliel na ekadwaran kalo naga, kisibaka akwaan kang ka nakeng.

³²Iyookinosi ngakiro daang nakolong adungokini Ekapolon Akuj ngesi, sodi tolim ngesi ilami ekeno lo eyei Besel, ta ni ilipeenere ngasenon daang alorerea a Samaria.”

³³Abu Yeroboam lo arai ekapolon a Isirael nyeeisik ngakiro naaronok asubi ngei. Torubak ngesi eseununi ngimurok anawiyei cha kadaang, lu esubete etich alokenoi alu adukit ngesi. Abu ngesi kitaleu itwaan cha daang ni asaki aliwor emuron.

³⁴Akisech ngina alowae keng ngesi abu yau nginyas luapolok lu atuborete awi keng anapolou.