Read turkana 1 Ngikapolok 15 Bible Online

1 Ngikapolok 15 - turkana bible

1 Ngikapolok 15

¹Ekaru lo a ngitomon ka ngikan-kauni lo araakar Yeroboam ekapolon a Isirael, toliwor Abija ekapolon a Yuda.

²Toliwor ngesi ekapolon a ngikaru a nguuni alo Yerusalem. Anyaritae itiokeng Maaka, na arai nakookeng a Abusalom.

³Tosub Abija ngasechesea daang nakolong asubi apakeng. Peamuno ngesi Ekapolon Akuj na erai Akuj keng loger lokolong a Daudi alo arai apaakeng.

⁴Nakaneni kotere Daudi, nak Ekapolon Akuj na erai Akuj keng ngesi edia lo ilunyokin napolou keng alo Yerusalem, kitowea Yerusalem.

⁵Asubi Ekapolon Akuj nguna, kainyo asubi Daudi ngakiro na ajoikinito ngesi, nabo nyichwangakina ngesi ngakiro na adungunit Ekapolon Akuj tani apei mati ngakiro a Uria alo a ekitela a Ngiiti.

⁶Ejie lokolong esiakini ngirwa lu araakatar Reoboam ka Yeroboam ngikapolok, abu torubak ejio ngirwa daang lu araakar Abija ekapolon.

⁷ Ngakiro nache daang na asubi Abija, igiritae nakitab na enyaritae Ngakiro a Ngikapolok a Yuda.

⁸Totoan Abija sodi tonukakinae lore a Daudi. Kilunyokin lokookeng lo anyaritae Asa nados keng toliwor ekapolon.

⁹Ekaru lo a ngitomwon-arei lo araakar Yeroboam ekapolon a Isirael, abu Asa toliwor ekapolon a Yuda.

¹⁰Toliwor ngesi ekapolon a ngikaru a ngitmwon-omwon ka epei alo Yerusalem. Anyaritae ataakeng Maaka na arai nakookeng a Abusalom.

¹¹Tosub Asa ngakiro na etalakarito Ekapolon Akuj loger lokolong asubea apaakeng Daudi.

¹²Kitwarak ngesi anakwap ngitunga lumalaae daang lu asubete etich ani ilipeenere ngakujo nagelayek. Tachaka ngesi ngakujo nagelayek daang nakolong asubete taapaakeng lungorok.

¹³Tolema ngesi tani ataakeng nabe Maaka anapolou ana araakar itiokeng a ekapolon kainyo asubakinit akuj nasubuna naaronon na anyaritae Achera, na erai akuj naberu a aur. Totubutubu Asa akuj nasubuna ngina sodi kinom anadipo a Kidiron.

¹⁴Nakaneni abu Asa nyiinyasu ngasenon na ilipeenere. Tani ikoni neni, amuno Asa Ekapolon Akuj ngirwa daang lu ayarea ngesi.

¹⁵Tolem Asa ngiboro daang lukolong etaleunit apakeng kotere Akuj, kiwaak kai a Akuj aapei ka ngiboro lua egolit ka lukwangae lu etaleunit ngesi elope.

¹⁶Asa lo arai ekapolon a Yuda, ka Baacha lo arai ekapolon a Isirael, ajienete jiik ngirwa daang lu araakatar kesi ngikapolok.

¹⁷Kitijik Baacha akwap a Yuda, kisiak akiduk ngawasea a ere a Rama, sodi nyeelomuneta ngitunga lore ngolo kori nyeepudoreta alore.

¹⁸Tolem ekapolon Asa ngakwangae daang, ka egolit lo edongit kai a Akuj, ka kai a ekapolon, sodi nak ngikasubak etich keng ngiche yaasi Damasko nia ekapolon Benadad alo a Siria, alo arai lokookeng a Tabrimon, tarai etatait a Esion. Yaarae ngiboro ngulu, tomearitetei atamar kiruor kona,

¹⁹“Kimiek atachamakin loger lokolong achamatar taapaayok. Eraakasi ngakwangae nugu ka egolit logo ngainakinet kon. Tongeros tokona ka ekapolon Baacha loa Isirael, sodi tolemarea ngesi ngasigerea keng anakwap kang.”

²⁰Tacham ekapolon Benadad ngakiro na alimuni Asa. Tomea Benadad ngikarikok a ngasigerea keng ka ngasigerea kech alosit akitijwore ngitunga a ngirerea a Isirael. Tolemasi kesi ngirerea a Ijon, ka Dan, ka Abel Bes Maaka, ka ewae lo alodiye anam a Galilaya, ta akwap daang a Naputal.

²¹Ani iirari ekapolon Baacha ngakiro na asubakinosi, kimiek ngesi akiduk ngawasea a ere a Rama, sodi tolot Tirisa.

²²Ani erumor todung ekapolon Asa akiroit alo Yuda kadaang esaki itwaan daang, emam ni imiekinitae, kiritosi ngamoru ka ngakito nasek adukio Baacha ngawasea alo Rama, sodi todukio ekapolon Asa ngiboro ngulu ngawasea a ngirerea a Misipa, ka Geba lo ayei nakwap a Benjamen.

²³Ngakiro nache daang nakolong asubi ekapolon Asa, ajwonu keng, ka ngakiro daang na asubi ngesi, ta ngirerea lu aduki ngesi ngawasea, igiritae nakitab na enyaritae Ngakiro a Ngikapolok a Yuda. Nakaneni anamojongu keng, abu edeke a ngakejen kingwal ngesi.

²⁴Totoan Asa tonukakinae nalielin a ngikapolok alore a Daudi, sodi kilunyokin lokookeng Yeochapat nados keng toliwor ekapolon.

²⁵Ekaru lo a ngiarei lo araakar Asa ekapolon a Yuda, toliwor Nadab lo arai lokookeng a Yeroboam ekapolon a Isirael. Topolok ngesi Isirael a ngikaru a ngiarei.

²⁶ Loger lokolong a apakeng, abu ngesi tosechak Ekapolon Akuj, nabo kilomak Ngisirael nakisech.

²⁷Abu Baacha lo arai lokookeng a Aija, lo a ekitela a Isakar, totuk akiar Nadab, sodi taar Baacha Nadab alore a Ngipilisti alo anyaritae Gibeson. Nadab ka ngasigerea keng, eriamito Gibeson a ngiwaitin kadaang.

²⁸Taar Baacha Nadab ekaru lo a nguuni lo araakar Asa ekapolon a Yuda, sodi kilunyokin Baacha napolou a Nadab.

²⁹Napei cha aliworor ngesi ekapolon, abu taar ngitunga a awi a Yeroboam daang. Emam tani ipei ni abu kidong eyari anawi a Yeroboam, itemem ka ngakiro nakolong alimuni Ekapolon Akuj kisitoru nia ekadwaran Aija alo abunit alo Chilo.

³⁰ Asubakinosi ngakiro nguna kainyo etongoi sek Yeroboam Ekapolon Akuj na erai Akuj a Isirael kitilil, ani asechea ngesi, nabo kilomak Ngisirael nakisech.

³¹Ngakiro nache daang nakolong asubi Nadab, igiritae nakitab na enyaritae Ngakiro a Ngikapolok a Isirael.

³²Ekapolon Asa lo a Yuda, ka ekapolon Baacha lo a Isirael, ajienete jiik ngirwa daang lu araakatar kesi ngikapolok.

³³Ekaru lo a nguuni lo araakar Asa ekapolon a Yuda, toliwor Baacha lokookeng a Aija ekapolon a Isirael. Topolok ngesi Isirael alo Tirisa a ngikaru a ngitomwon-arei ka nguomwon.

³⁴Loger a Yeroboam alosek engareni ngesi, abu Baacha tosechak Ekapolon Akuj, nabo kilomak Ngisirael nakisech.