Read turkana 1 Ngikapolok 16 Bible Online

1 Ngikapolok 16 - turkana bible

1 Ngikapolok 16

¹Kisuruor Ekapolon Akuj ekadwaran Yeu lokookeng a Anani, tolimok ngakiro a Baacha ebala,

²“Kalemuni kolong ayong iyong irai itwaan pasit ketiliwo ekapolon a ngitunga kang Ngisirael. Isech tokona iyong loger a Yeroboam, nabo ilomak ngitunga kang nakisech, sodi ketongoa ngasechesea kech ayong ketilileta.

³Kamunyari tokona ayong iyong ka ngitunga a awi kon loger lokolong asubea ayong Yeroboam.

⁴Itwaan a awi kon daang ni etoani alore, enyamete ngingokwo, ani ni etoani alomoding enyamete ngataruk.”

⁵Ngakiro nache daang nakolong asubi Baacha, ka ajwonu keng, igiritae nakitab na enyaritae Ngakiro a Ngikapolok a Isirael.

⁶Totoan Baacha tonukakinae Tirisa, sodi kilunyokin lokookeng lo anyaritae Ela nados keng toliwor ekapolon.

⁷Ekadwaran Yeu lokookeng a Anani ngesi ayauni ngakiro nguna ani a Ekapolon Akuj. Araakasi ngakiro nguna na emunyarete Baacha ka ngitunga a awi keng, kotere ngasechesea kech daang na asubete kesi alongaren Ekapolon Akuj. Meere akisech keng bon etongoea Baacha Ekapolon Akuj kitilili loger lokolong a Yeroboam, pearai etongoit ngesi Ekapolon Akuj tani ani kolong amunyarea ngitunga a awi a Yeroboam daang.

⁸Ekaru lo a ngitomwon-arei ka ngikan-kapei lo araakar Asa ekapolon a Yuda, toliwor lokookeng a Baacha lo anyaritae Ela ekapolon a Isirael, alo Tirisa. Topolok ngesi Isirael a ngikaru a ngiarei.

⁹Abu epei a ngikapolok a arieng keng lo anyaritae Simri totuk akiar ngesi. Aweikinit Simri epewae a ngaurukukui a ekapolon ana irito ngangolei. Akolongit apei alo Tirisa, abu epurot kiraka Ela anawi a Arsa alo aweikinit akai a ekapolon.

¹⁰Tolom Simri tooma kai sodi taar Ela, dio kilunyokin napolou. Asubasi nguna ekaru lo a ngitomwon-arei ka ngikan-kaarei lo araakar Asa ekapolon a Yuda.

¹¹Napei aliworor Simri ekapolon, taar ngitunga a awi a Baacha. Taar ngesi ngikiliok daang aloyenet ka ngipaalon a Baacha.

¹²Taar Simri ngitunga a awi a Baacha daang itemem ka ngakiro nakolong alimuni Ekapolon Akuj, kisitoru nia ekadwaran Yeu.

¹³Apot Baacha ka lokookeng lo anyaritae Ela, kitongoa Ekapolon Akuj na erai Akuj a Isirael, kitilileta kotere ngasechesea kech na elipitotor ngakujo nasubuna, ka ni elomakineta Ngisirael nakisech.

¹⁴Ngakiro nache daang na asubi Ela, igiritae nakitab na enyaritae Ngakiro a Ngikapolok a Isirael.

¹⁵Ekaru lo a ngitomwon-arei ka ngikan-kaarei lo araakar Asa ekapolon a Yuda, toliwor Simri ekapolon a Isirael alo Tirisa. Topolok ngesi Isirael a ngirwa a ngikan-kaarei. Eriamito ngasigerea a Ngisirael ere a Gibeson, anakwap a Ngipilisti.

¹⁶Ani iirarete kesi ebeyo, “Atuk Simri akinger ekapolon, nabo aar ngesi,” apot kesi tolimut kaneni jik atamar ekarikon a ngasigerea kech lo anyaritae Omri ngesi eliwor ekapolon a Isirael.

¹⁷Tonyout Omri ka ngasigerea keng alo Gibeson toloto kiriama Tirisa.

¹⁸Ani ingolikini Simri atamar alemar ere, toloma ngesi namaniyat na eyuunere alotooma akai a ekapolon, sodi kichunyak akai a ekapolon akim totoanik ngesi nasarae a akim.

¹⁹Asubakinosi nguna kainyo asechakini ngesi Ekapolon Akuj. Loger lokolong a Yeroboam, abu ngesi tosub naaronok alongaren Ekapolon Akuj, nabo kilomak Ngisirael nakisech.

²⁰Ngakiro nache daang nakolong asubi Simri, ka eger lo atukio ngesi akiar ekapolon, igiritae nakitab na enyaritae Ngakiro a Ngikapolok a Isirael.

²¹Totiakas Ngisirael ngatiaket ngaarei, kiwapakis epewae Tibini lokookeng a Ginas esakete akitiliwor ekapolon, kiwapakis epewae Omri.

²²Apot ngitunga lu asakete Omri kidwanga ngitunga a Tibini. Sodi totoan Tibini, toliwor Omri ekapolon.

²³Ekaru lo a ngitomwon-uni ka epei lo araakar Asa ekapolon a Yuda, toliwor Omri ekapolon a Isirael. Topolok ngesi Isirael a ngikaru a ngitomon ka ngiarei. Ngikaru ngikan-kapei lu a ekingaren, apolokinit ngesi Isirael alo Tirisa.

²⁴Togiel ngesi imukura a Samaria ani a Chemer a ngaropiyae ngabunge ngakan-kapei. Toduk ngesi ngawasea kisiriam imukura ngini sodi toduk ere neni, tanyara ere ngolo Samaria. Erai ekiro ngolo eka Chemer alo kolong arai ilope a imukura.

²⁵Tosechak Omri Ekapolon Akuj noi akidwang ngikapolok luche daang lukolong engarenete ngesi.

²⁶Loger a Yeroboam, abu Omri kitongo Ekapolon Akuj na erai Akuj a Isirael kitilili, kotere akisech keng a ilope ka akisech na elomakinea ngesi Ngisirael nakisech ka akilipit ngakujo nasubuna.

²⁷Ngakiro nache daang nakolong asubi Omri, ka ngakiro daang na abu ngesi kitemok, igiritae nakitab na enyaritae Ngakiro a Ngikapolok a Isirael.

²⁸Totoan Omri tonukakinae Samaria, sodi lokookeng lo anyaritae Aab kilunyokin napolou.

²⁹Ekaru lo a ngitomwon-uni ka ngikan-kauni lo araakar Asa ekapolon a Yuda, toliwor Aab lokookeng a Omri ekapolon a Isirael. Topolok ngesi Isirael a ngikaru a ngitomwon-arei ka ngiarei alo Samaria.

³⁰Tosechak Aab Ekapolon Akuj noi akidwang ngikapolok daang lukolong engarenete ngesi.

³¹Takad ngesi tani akisech na etia nakolong a Yeroboam alo arai lokookeng a Nebat. Kiut Aab Yesebel na arai nakookeng a Esibaal alo arai ekapolon a Sidon, sodi Aab kilip Baal.

³²Toduk ngesi akai na ilipeenere Baal Samaria, toduk ekeno lo ipeyoore sodi kiwaak tooma kai ngina.

³³Tosubak ngesi nabo ekisikwaane a Akuj anaberu anabe Achera. Asubit ngesi nakaalak na etongoyete Ekapolon Akuj na erai Akuj a Isirael kitilileta, akidwang ngikapolok a Isirael daang lu engarenete ngesi.

³⁴ Ngirwa lu araakar Aab ekapolon, abu Iel lo abunit alo Besel tobongok akiduk Yeriko. Itemem ka akiroit nakolong alimuni Ekapolon Akuj kisitoru nia Yochua lokookeng a Nun, abu lokookeng a Iel lo ekingaren lo anyaritae Abiram totoan na adukere ngateak a Yeriko, sodi totoan lokookeng loochi lo anyaritae Segub na adukere ngidorin a Yeriko.