Read turkana 1 Ngikapolok 17 Bible Online

1 Ngikapolok 17 - turkana bible

1 Ngikapolok 17

¹ Abu ekadwaran Elija lo abunit alo Tichibe anakwap a Gilead tolimok ekapolon Aab tama, “Alokiro a Ekapolon Akuj ana erai Akuj a Isirael ana eyari, ana asubi ayong etich keng, kalimokinit ayong iyong atamar nyepete ngakop, kori nyerami akiru a ngikaru a ngiarei, kori nguuni lu isidiuno, mati kalimu ayong atamar erami.”

²Tolimok Ekapolon Akuj Elija tama,

³“Tonyou kane tolot kide toduk alodiyete ayanae a Keris, alo kide Yorudan.

⁴Imasi iyong ngakipi anayanae kangina, nabo adungok ayong ngikuruka atamar kitan iyong kaina.”

⁵Sodi kiwap Elija ngakiro na adunguni Ekapolon Akuj, tolot ngesi tolom lokwaas a ayanae a Keris, ana eyei kide Yorudan.

⁶Inuunut ngesi ngikuruka ngamugati ka akiring ataparach ka atabong. Tamat ngesi ngakipi a ayanae kangina.

⁷Adaunet a ngirwa a ngiche, toon ayanae ngina kotere angopit a akiru.

⁸Sodi tolimok Ekapolon Akuj Elija tama,

⁹“Tonyou tokona tolot lore a Sarepas, diyete Sidon, tolom neni. Adungok ayong apuserut ache kaina atamar kitan iyong.”

¹⁰Dio Elija tolot Sarepas, ani enanguni ngesi lokidor a ere, kingolik apuserut ikeyeni ngakito, sodi tanyara tama, “Kitamatae kare.”

¹¹ Ani eringa elosi ayaun ngakipi, tanyara Elija ngesi nabo tama, “Kiinu kare tani ngamugati ngadi.”

¹²Tolim apuserut ngina tama, “Ekong tani Ekapolon Akuj na eyari, na erai Akuj kon, emam ayong ngamugati eyakasi. Daang na atingit ayong ngesi akan apei a ngakiria ana eyakasi natubwa ka ikimiet nidiochichi eyei lobur. Abunit ayong akikeyen ngakito sodi atolot edorok akimuj nidiochichi ngini, atanyama ka lokookang edareta erogo kiriyori.”

¹³Tolimok Elija ngesi tama, “Nyiem. Kape kidorok akimuj kon. Nakaneni tosubakinae mono ayong amugati nadiochichi kiinu, ani erumor kidorok nakon ka lokookon.

¹⁴Kainyo alimu Ekapolon Akuj na erai Akuj a Isirael kona, ‘Nyedaun ngakiria anatubwa kori nyedaun akimiet alobur eringa akolongit na etaramea ayong Ekapolon Akuj akiru.’ ”

¹⁵Tolot apuserut ngina tosub loger lo abalar Elija, sodi min kesi daang akimuj na itemokino ngirwa lukaalak.

¹⁶Nyedauna ngakiria anatubwa, kori nyedauna akimiet alobur, itemem ka ngakiro nakolong alimuni Ekapolon Akuj kisirotu nia Elija.

¹⁷Ekisidi a ngakiro kanguna, todeakakin lokookeng a apuserut kangina. Toroner edeke noi tanang ni atoanea.

¹⁸Tolimok apuserut ngina Elija tama, “Itwaan a Akuj, kotere nyo kisubea iyong ayong kona? Ibunit iyong akisitamun ayong akisech kang sodi totoanea lokookang a?”

¹⁹Tolimok Elija ngesi tama, “Tadakakinae pan idia.” Tadaka Elija idia anakan a apuserut kangina sodi todokarea namaniyat na alokidiama na apereene ngesi, dio akiperikin idia lokitanda.

²⁰Kikaloik ngesi Ekapolon Akuj ebala, “Ee Ekapolon Akuj na irai Akuj kang, kotere nyo isubakinea ayong ngakiro naaronok anapuserut kana? Kedodikini ngesi ayong apatanu ketepeyon anawi keng. Kotere nyo iarea iyong lokookeng?”

²¹Sodi torwaa Elija alokidiama idia ngarwaaret ngauni ilipit ebala, “Ee Ekapolon Akuj na irai Akuj kang, kiteyaru idia en!”

²² Kiira Ekapolon Akuj akilip a Elija, sodi toyaru idia kisiak akianga.

²³Totiyaaror Elija idia kwap, sodi kikobak itiokeng ebala, “Kingolik a, eyari lokookon!”

²⁴Tolimok aberu ngina ngesi tama, “Ayen tokona atamar irai iyong itwaan a Akuj. Ayen nabo atamar iruoro Ekapolon Akuj dir anikon!”