Read turkana 1 Ngikapolok 18 Bible Online

1 Ngikapolok 18 - turkana bible

1 Ngikapolok 18

¹Adaunet a ngirwa alukaalak, ekaru lo a nguuni a akamu, abu Ekapolon Akuj tolimok Elija tama, “Kape kitoodikin ekapolon Aab, sodi atalakak ayong akiru taram.”

²Abu Elija tonyou tolot. Toroner eron a akoro noi alo Samaria.

³Sodi tanyara Aab Obadia lo aweikinit akai a ekapolon. (Arai Obadia itwaan ni elipit Ekapolon Akuj lokojokon.

⁴Ngirwa lukolong aarea Yesebel ngikadwarak a Akuj, abu Obadia toriko ngikadwarak amiat apei, kidaa ngitomwon-kan anaburibur a apei, kidaa nabo ngitomwon-kan anaburibur a ache. Sodi kitan kesi kaneni kitamasi ngakipi.)

⁵Tolimok Aab Obadia tama, “Kapana atorebo[23] ngileleae daang ka ngadipoe daang anakwap keyakasi nginyia lu epedorete ngangolei yok ka ngisikiria adaka toyareta.”

⁶Sodi tachamakin kesi ni elosi ipei kech daang akireb, toten Aab lowae epei, toten Obadia lowae loche.

⁷Ani eringa Obadia elosi alorot, atipei tanangakin Elija, toyen. Kijuuru Obadia idodiunit arimatoi ani a Elija, sodi kingit tama, “Ekapolon, iyong dir itwaan a?”

⁸Tatachu Elija tama, “Ee, ayong itwan. Kape tolimok ekapolon kona, ‘Eyei Elija nege!’ ”

⁹Tolim Obadia tama, “Anukiro asechit ayong isakea iyong ekapolon Aab kataar ayong?

¹⁰Ekong jik tani ekiro a Ekapolon Akuj ana eyari, ana erai Akuj kon, erim ekapolon kang akwap daang kisaki iyong. Toliwor na elimokinere ngesi kona, ‘Emam kane,’ kisikong ngesi ekapolon ngolo atamar ingop iyong dir.

¹¹Abe ibala tokona iyong ayong atolot atolimok ngesi atama, ‘Eyei Elija nege.’

¹²Ani bo tokona kebu etau a Ekapolon Akuj napei arotokinio ayong, kitoriko iyong wache ni nyayeni ayong? Ani kalimok ayong Aab atamar iyei iyong nege, kitasak ngesi iyong tongop, dio ngesi kataar ayong, tarai na elipit ayong Ekapolon Akuj lokojokon, napei kolong eringa arai idia.

¹³Nyiirara iyong ngakiro nakolong asubi ayong ngirwa lu aarea Yesebel ngikadwrak a Ekapolon Akuj a? Abu ayong edaa ngikadwarak amiat a ngatiaket a ngaarei, ngitomwon-kan naburibur apei, ngitomwon-kan naburibur nache, sodi etan kaneni ka akitamat.

¹⁴Ekokini tokona ayong alosi alimokin ekapolon atama, ‘Eyei Elija nege’ ai? Kaari ngesi ayong!”

¹⁵Tatachak Elija ngesi tama, “Alokiro a Akuj Namerikanyer ana eyari, ana asubi ayong etich keng, iteni jik etoodikin ayong akolongit naga ekapolon.”

¹⁶Sodi tolot Obadia alimokin Aab, tolot Aab akisiriam Elija.

¹⁷Ani ingolikini Aab Elija tolim tama, “Iyong itwaan a? Ekechanan a Isirael a?”

¹⁸Tolim Elija tama, “Meere ayong arai ekechanan. Iyong ka apakon iraakasi ngikechanak a Ngisirael. Iwout esi akiwap ngitalio a Ekapolon Akuj, nakaneni ilipito ngakujo nasubuna a Baal.

¹⁹Tochunak tokona Ngisirael daang eriamariama ka ayong moru a Karimel. Toriku tani ngikadwarak a Baal lu eraakasi ngamiae ngoomwon ka ngitomwon-kan, ka ngikadwarak a akuj anaberu anabe Achera lu eraakasi ngamiae ngoomwon, ngulu ibakit akapolon Yesebel alowae kech.”

²⁰Sodi tanyarau Aab Ngisirael daang ka ngikadwarak a Baal tochunakin moru a Karimel.

²¹Bu Elija lotunga tolimok tama, “Itubonorosi esi anakiro anaarei tanang ori? Ani kerai Ekapolon Akuj erai Akuj, kilipa ngesi, nakaneni ani kerai Baal erai Akuj, kilipa ngesi!” Nyelimuno ngitunga akiroit tani apei.

²²Sodi tolimok Elija ngitunga tama, “Ayong bon edongit alokadwarak a Ekapolon Akuj, nakaneni eyakasi ngikadwarak a Baal ngamiae ngoomwon ka ngitmwon-kan.

²³Yautu ngimongin ngiarei. Toseasi ngikadwarak a Baal emong epei, taara, sodi totubutuboto kiwaakis kidiama nakito, nakaneni nyiinokakis akim. Atosubakinea ayong emong loche ngakiro napei nguna.

²⁴Ani erumor kilipa ngikadwarak a Baal akuj kech, sodi elip ayong Ekapolon Akuj. Ani Akuj na etachuni akilip yau akim, ngesi erai Akuj.” Tatachut ngitunga daang tamasi, “Alimun na itemokino.”

²⁵Dio Elija alimokin ngikadwarak a Baal tama, “Aloger ilalaketa esi, toseutu emong, kisieut tosubakis. Kilipa akuj kus nakaneni nyiinokakis akim nakito.”

²⁶Tolemasi kesi emong lo ainakinio tosubakis, sodi kilipa Baal napei nataparach tanang naparan lotingilan ebalasi, “Ee Baal, tatachu ngakiro kosi!” Nakaneni tongop tani nia kabek, emam ni eik! Toporoporoto kesi kirimo ekeno lo erokonyikinete kesi.

²⁷Ani enangi naparan lotingilan, tolomak Elija akianar kesi ebala, “Kiremasi kilipa! Abe erai bo akuj! Iani tokona ngon, kori elosit kinga! Elosit tokona ngon wache, kori ejotoe, ejoikinit esi itekienyunete!”

²⁸Sodi kilipa kesi iremasi, nabo todungudungos a ngilengea ka ngamorokin toleleut ngaakot. Asubeenete kesi kongina alotal kech.

²⁹ Tachala kesi tanang asonget a akolong, nakaneni emam ngakiro atachakin, emam tani nia etoil eirasi.

³⁰Ani erumor tolimok Elija ngitunga daang tama, “Potu diyete kang.” Sodi tochunun kesi daang kiriama ngesi. Dio ngesi tosubak mono ekeno a Akuj losek aukoritae.

³¹Tolem Elija ngamoru ngatomon ka ngaarei eweikinit apei kech daang ekitela epei alotela alutomon ka ngiarei a talokookeng a Yakobo, alo kolong alimokini Ekapolon Akuj tama, “Eliwor ekiro kon Isirael.”

³²Tolem Elija ngamoru nguna todukio ekeno lokilipet Ekapolon Akuj. Toboka ngesi akipany nabalany kisiriam ekeno. Apedori akipany ngina akiting ngakipi ngalitae ngatomon ka ngoomwon.

³³Torek ngesi ngakito lokeno sodi totubutubu emong dio akiwaakin nakito. Tolim Elija tama, “Kileleba ngamoti ngoomwon ngakipi tobukokis kidiama ngakipeyos ka ngakito.” Tosubakis kesi kongina.

³⁴Tolim ngesi nabo tama, “Tobukokisi nabo,” sodi tobukokis kesi. Tolim nabo tama, “Tobongokisi abongokinet apei,” sodi tobongokis kesi.

³⁵Kiyesaros ngakipi alokeno kileleba akipany.

³⁶Ani enangi esaa lo akipeyos ana asonget a akolong, kirudun ekadwaran Elija diyete ekeno kilip tama, “Ee Ekapolon Akuj na irai Akuj a Aburaam, ka Isaka, ta Yakobo, kidodiu tokona atamar iyong irai Akuj a Isirael, ka atamar arai ayong ekasuban etich kon. Nabo kidodiu atamar asubi ayong nugu daang itemem ka ngakiro na idunguni iyong.

³⁷Tatachu ngakiro kang Ekapolon Akuj, tatachu ngakiro kang, sodi toyeneta ngitunga lugu atamar iyong Ekapolon Akuj irai Akuj, ka atamar ibuu iyong kesi nikon a alope.”[24]

³⁸Sodi totiyaun akim a Ekapolon Akuj tonom ngakipeyos, ka ngakito ta ngamoru. Tonom tani ngalup kijujia ngakipi anakipany.

³⁹Ani ingolikinete ngitunga ngakiro nguna, tadakakinos kwap tojuko ngireetin ngalup ebalasi, “Ekapolon Akuj ngesi erai Akuj! Ekapolon Akuj bon erai Akuj!”

⁴⁰Todungok Elija ngitunga tama, “Kirumutu ngikadwrak lua Baal. Warasi tani epei nyeematar!” Kirumut ngitunga kesi daang. Toriko Elija kesi nangolol a Kichon taar kaneni.

⁴¹Ani erumor tolimok Elija ekapolon Aab tama, “Kape tokona kimuj, eira ayong erue a akiru keapuu.”

⁴²Ani elosi Aab akimuj, tolot Elija todoka naita a emoru a Karimel, toriedik tojuk ereet ngalup, min akou keng kiding ngakungin.

⁴³Tolimok ngesi ekasuban etich keng tama, “Kape kingolia lowae lo anam.” Tolot ekasuban etich ani erumor tobongu tama, “Emam ibore engolik ayong.” Tolimok Elija ngesi tama, “Tobongo ngabongoret ngakan-kaarei.”

⁴⁴Alosiet na ngakan-kaarei, tobongu ngesi tama, “Engolik ayong idou nidiochichi etia akan a itwaan ejipunit ananam.” Todungok Elija ekasuban etich keng tama, “Kape tolimok Aab kona, ‘Todoka naurukuk kon na irito ngangolei nyikiratak akiru.’ ”

⁴⁵Adaunet a esaa alouriyen toribok adis toburuchiasi ngidowon. Kisiak ekuwam akikut sodi taram akiru nakaalan noi. Todoka Aab naurukuk keng tobongo Yesireel.

⁴⁶ Min agogongu a Ekapolon Akuj nia Elija. Toinik ngesi ngiworui keng naabor kirijak, sodi tamatar kingarenik Aab tanang Yesireel.