Read turkana 1 Ngikapolok 19 Bible Online

1 Ngikapolok 19 - turkana bible

1 Ngikapolok 19

¹Tolimok ekapolon Aab aberu keng Yesebel ngakiro daang na asubi Elija, ka eger lo aarea Elija ngikadwarak a Baal daang.

²Tomea Yesebel itwaan nia Elija ebala, “Kataar ayong ngakujo erai kenang moi esaa lo ikoni logo, eringa ayong nyesubakina anikon ngakiro na ngoon isubea iyong ngikadwarak a Baal!”

³Toem Elija. Todok ngesi esaki ayuun. Toriko ekasuban etich keng, sodi toloto Beer-cheba alo Yuda. Toisik Elija ekasuban etich keng kaneni,

⁴ dio alosit apaaran juui tanang nariet. Tolot kiboikin lotolim a ekitoe tagat atamar atotoan. Kilip ebala, “Ekapolon Akuj, kaupa ayong ngakiro nugu. Taarae! Ejoikina ayong atoani, kainyo emam ibore kitiakit ayong kata apaakang lungorok!”

⁵Kinapakin ngesi kwap ekitoe tojotoor. Atipei bu emalaikat tatap ngesi tama, “Tonyou kimuj.”

⁶Tongolengolek Elija, kingolik amugati ka agurum a ngakipi alodiyete akou keng. Kimuj ngesi, tamat, dio akinapakin nabo.

⁷Tobongu emalaikat a Akuj kitekienyu ngesi nabo tama, “Tonyou kimuj. Ani pekimuj iyong, kitionikini iyong alotoru noi.”

⁸Tonyou Elija kimuj, tamat. Nak akimuj ngina ngesi ngikilinga lu alosio ngirwa ngitomwon-omwon, akwaar ka apaaran tanang Sinai, emoru a Akuj.

⁹Ani enangi neni, toloma ngesi naburibur akiper. Kisuruorik Ekapolon Akuj ngesi atipei kingit tama, “Elija, nyo isubi iyong kane?”

¹⁰ Tatachu Elija tama, “Ekapolon Akuj Namerikanyer, asubi ayong jiik etich kon bon. Nakaneni echwangakis Ngisirael achamunet nakolong ichamakinosi ka iyong, aukosi ngikenoi kon, nabo aar ngikadwarak kon daang. Ayong bon edongit, nakaneni esakete akiar ayong!”

¹¹Tolimok Ekapolon Akuj ngesi tama, “Topud tolot towo alokidiama emoru alongaren kang.” Totiaak Ekapolon Akuj kitoru neni, tomeu ekuwam lotiapolon tapak ngimoru, kieala ngatabab, nakaneni amam Ekapolon Akuj alokuwam kangolo. Adaunet a ekuwam, torikirikok akwap, nakaneni amam Ekapolon Akuj anarikirikokin kangina.

¹²Adaunet a arikirikokin a akwap, bu akim, nakaneni amam Ekapolon Akuj anakim kangina. Adaunet a akim, bu etoil loochi ingaingaa.

¹³Ani iirari Elija etoil ngolo, tarap ereet keng a eworu keng sodi tolot towo anakituk a aburibur. Kingit etoil ngesi tama, “Elija, nyo isubi iyong kane?”

¹⁴ Tatachu Elija tama, “Ekapolon Akuj Namerikanyer, asubi ayong jiik etich kon bon. Nakaneni echwangakis Ngisirael achamunet nakolong ichamakinosi ka iyong. Aukosi ngikenoi kon, nabo aar ngikadwarak kon daang. Ayong bon edongit, esakete akiar ayong!”

¹⁵Tolimok Ekapolon Akuj ngesi tama, “Tonyou tobongo nariet na eyei diyete Damasko, sodi toloma lore kiwasak Asael akimiet toliwor ekapolon a Siria.

¹⁶Kiwasak Yeu lokookeng a Nimchi akimiet toliwor ekapolon a Isirael. Tolem Elicha lokookeng a Chapat lo ebunit alo Abel-meola kiwasak akimiet kilunyokin nados kon toliwor ekadwaran.

¹⁷Itwaan ni ebuchar ani a Asael nyeara, eari Yeu. Ani ni ebuchar ani a Yeu, eari Elicha.

¹⁸ Nakaneni aisikini ayong ngitunga ngabunge ngakan-kaarei alo Isirael eyarete, ngulu daang kamunosi ayong, lu eringa nyeriedikokina Baal, kori nyenuakina akuj keng nasubuna.”

¹⁹Torotok Elija toriam Elicha itichili ngimongin amana. Engarenete ngaenet a ngimongin ngatomon ka apei, arukito ngesi ka aenet a ngimongin na ngatomon ka ngaarei. Tobutu Elija eworu keng dio abutokin Elicha.

²⁰Toisik Elicha ngimongin keng kipiiri kiwapak Elija tama, “Kimiekinae atolot atonuak apakang ka itiokang atama, ‘Kidongo robo,’ sodi abu kewapak iyong.” Tolim Elija tama, “Tobongo robo. Nyekeratakini ayong iyong!”[25]

²¹Sodi tolot Elicha taar ngimongin lu araakasi aenet keng, tolem ngakito nasek ainikinitere wapei, kinokakinea akim. Nak ngesi ngitunga akiring tanyama. Ani erumor tolot ngesi kiwapak Elija toliwor ekengarakinan keng.