Read turkana 1 Ngikapolok 2 Bible Online

1 Ngikapolok 2 - turkana bible

1 Ngikapolok 2

¹Ani eapuunete ngirwa lo etoanea Daudi, tanyarau ngesi lokookeng Solomon kisuruor ngakiro na esal ebala,

²“Anang ngirwa kang lu atoanea. Totitinyer, tatakanu atamar irai ekile.

³Tosub ngakiro na edunguni Ekapolon Akuj na erai Akuj kon atamar tosub. Kiwap ngirotin keng ka ngakitatamet, ta ngitalio keng, loger lo igiritere lotal a Musa, sodi kitopiarea iyong awadaang ani ilosi ka ni irear iyong.

⁴ Kirichak Ekapolon Akuj akiroit nakolong kalimokini ayong ebala, ‘Ani kiwap talokookon ngitalio kang a ngitai kech kadaang ka akiyar kech daang, epolokinete kesi Isirael.’

⁵“Eya nabo ngakiro ngache. Iyeni iyong ngakiro nakolong kasubea Yoab ayong na aarea ngesi ngikarikok a ngasigerea a Isirael ngiarei, Abiner lokookeng a Ner, ka Amasa lokookeng a Yeser. Iyeni iyong eger lo aarea ngesi kesi ngirwa lua ekisil etachakinit akitu a ngitunga alu aario ngirwa lu ejie. Aari ngesi ngitunga lu peasechito nakaneni kapaikinitae tokona ayong ngakiro na asubi ngesi. Ariamunit tokona ayong ngichan kotere ngakiro nguna.

⁶Iyeni iyong ngakiro na isubakinea ngesi. Tochoite imiekini Yoab etoani akaalimon.

⁷ “Nakaneni tosubea naajokak talokookeng a Barisilai, lu eponito alo Gilead, kimiek kesi tarata ngipei alu imujete alomeesa kon, kainyo kasubeta kolong ayong naajokak, na epungaror ayong elanyit lokaatokon Abusalom.

⁸“Eyei nabo Chimei lokookeng a Gera, lo ebunit alore a Baurim anakwap a Benjamen. Kelami kolong ngesi ayong nikaronon noi akolongit nakolong alosio ayong Maanaim. Nakaneni na abunio ngesi akisiriam ayong anangolol a Yorudan, abu ayong ekong anikeng alokiro a Ekapolon Akuj abala, ‘Nyakaari ayong iyong.’

⁹Tokona bocha, nyiilakak robo ngesi nyirira, kainyo ios iyong. Iyeni iyong ngakiro na isubakinea ngesi, ejoikinit eario.”

¹⁰Totoan Daudi sodi tonukakinae lore keng.

¹¹Arai ngikaru lu apolokinitor ngesi Isirael ngitomwon-omwon, apolokinit Eburon a ngikaru a ngikan-kaarei sodi topolok Yerusalem a ngikaru a ngitomwon-uni ka nguuni.

¹² Abu Solomon kiboikin lokicholong a apolou a apakeng Daudi. Etenikina apolou keng lokojokon.

¹³Abu Adonija lo arai lokookeng a aberu anabe Agis tolot nia Basicheba ana arai itiokeng a Solomon . Kingit Basicheba ngesi tama, “Ibunit iyong a ekisil a?” Tatachu Adonija tama, “Ee, abunit a ekisil.

¹⁴Eyakasi ngakiro asaki alimokin iyong.” Tolimok Basicheba ngesi tama, “Kasio kiruorik.”

¹⁵Tolim Adonija tama, “Iyeni iyong atamar arai apolou akang, nabo ayenete Ngisirael daang atamar ayong aliwor ekapolon. Nakaneni, apot ngakiro kilochos, toliwor lokaatokang ekapolon kainyo asakit Ekapolon Akuj kikokis neni.

¹⁶Eyei tokona ibore ipei asaki akilip iyong. Nyikimik kare.” Tolimok Basicheba ngesi tama, “Kasio kiruorik.”

¹⁷ Tolim Adonija tama, “Tolimok kare ekapolon Solomon kemiek atoriko Abichag na ebunit alo Chunem toliwor aberu kang, ayeni ayong atamar nyikimiki iyong ekapolon.”

¹⁸Tatachu Basicheba tama, “Itemokino. Alimokini ayong ekapolon ngakiro kon.”

¹⁹Sodi tolot Basicheba nia ekapolon alimokin ngakiro a Adonija. Tonyou ekapolon akimalare itiokeng kijuuru idodiunit arimatoi. Ani erumor kiboikin ngesi lokicholong keng dio atamar yaunae ekicholong eche lo iboikinor itiokeng nakan keng na aloteten.

²⁰Tolim itiokeng tama, “Eyakasi ngakiro ngadikidio asaki ayong akingit iyong, nyikimik kare.” Tolim ekapolon tama, “Kingis ngakiro na isaki iyong, itio, nyekemiki ayong iyong.”

²¹Tolim itiokeng tama, “Kimiek lokaatokon Adonija toriko Abichag toliwor aberu keng.”

²²Kingit ekapolon Solomon itiokeng tama, “Nyo bo ibalar iyong ayong epoto Abichag ainak Adonija? Abe nyiitama bo nak ngesi tani apolou! Abe ngesi bo tani erai lokaatokang loapolon, nabo dang, ibakito Abiasar lo erai emuron, ka Yoab alowae keng!”

²³Sodi kikong ekapolon Solomon alokiro a Ekapolon Akuj ebala, “Kataar Akuj ayong erai peketoana Adonija ani alimunio ngakiro nugu!

²⁴Kewaak Ekapolon Akuj ayong lokicholong a apolou a apakang Daudi. Erichak ngesi akichikakinet keng kainaki ayong ka ngalesea kang apolou. Ekongi ayong alokiro a Ekapolon Akuj ana eyari atamar etoani Adonija akolongit naga!”

²⁵Sodi tomea ekapolon Benaya, tolot ngesi taar Adonija.

²⁶Tolimok ekapolon Solomon Abiasar lo arai emuron tama, “Kape nawi kon na eyei Anasos, kainyo ejoikinit iyong itoani. Nakaneni nyakaari ayong iyong kainyo iweikinit kolong iyong asaduku a Achamunet a Ekapolon alo erai Ekapolon Akuj ngirwa lu irukitotor iyong ka apakang Daudi, nabo iriamunit iyong ngichan lu ariamunit ngesi daang.”

²⁷ Abu Solomon talachak Abiasar alotich alo araakar emuron a Akuj. Asubakini Solomon nguna kiyookinotor nakolong alimuni Ekapolon Akuj alo Chilo kotere Eli lo arai emuron a Akuj ka ngalesea keng.

²⁸Ani iirari Yoab ngakiro na asubakin (kainyo ebakit sek ngesi alowae a Adonija, meere alowae a Abusalom), abu ngesi tamatar loeam a Akuj torwakin ngaamwar a ekeno.[3]

²⁹Tolimokinae ekapolon Solomon kona, “Amatar Yoab loeam a Akuj, eyei lokeno a ngakipeyos.” Tomea Solomon Benaya lokookeng a Yeoyada ebala, “Kape taar Yoab.”

³⁰Tolot Benaya loeam a Akuj tolimok Yoab tama, “Adungu ekapolon atamar topud iyong nikalapatan.” Tatachu Yoab tama, “Mam, atoanikini ayong nege.” Tobongo Benaya nia ekapolon tolimok ngesi ngakiro na alimuni Yoab.

³¹Tolimok Solomon Benaya tama, “Tosubak loger lo ebala Yoab. Taar ngesi tonuk. Nyakapaikin ayong ka ngalesea nache daang a apakang Daudi, ngaakot a ngitunga alu kolong aari Yoab peesechito.

³²Irirae Ekapolon Akuj Yoab kotere ngaakot a ngitunga alu aari[4] ngesi peeyeni apakang Daudi. Aari Yoab ngitunga lupeasechito ngiarei, luajokak edwangito ngesi. Ngitunga ngulu kesi Abiner lokookeng a Ner lo arai ekarikon a ngasigerea a Isirael, ka Amasa lokookeng a Yeser lo arai ekarikon a ngasigerea a Yuda.

³³Iwapi eriras a ngaakot a ngitunga kangulu Yoab ka ngalesea keng jik. Nakaneni epiari Ekapolon Akuj Daudi ka ngalesea keng, ka awi keng ta, ekicholong keng a apolou, irukete ka ekisil a Ekapolon Akuj jik.”

³⁴Sodi tolot Benaya loeam a Akuj taar Yoab, tonukakinae ngesi nawi keng anariet.

³⁵Kilunyok ekapolon Benaya lotich a Yoab toliwor ekarikon a ngasigerea, sodi kilunyokin Sadok lotich a Abiasar toliwor emuron a Akuj.

³⁶Ani erumor tomea ekapolon itwaan anyarare Chimei, tolimok tama, “Todukok akai kon nege Yerusalem, sodi kiboikin neni. Wara nyiipudo alore.

³⁷Akolongit nacha irotokinio iyong kikalam ayanae a Kidiron, iteni itoani iyong. Iyong ilope kipaikinio akitu kon.”

³⁸Tolimok Chimei ekapolon tama, “Ekapolon kang, itemokino ngakiro na ilimu iyong. Asubakini ayong loger ngolo.” Abu Chimei kiboi alo Yerusalem a ngirwa alukaalak.

³⁹Adaunet a ngikaru a nguuni, apot ngikedalak a Chimei ngiarei tosiwa tolot lokapolon a akwap a Gas lo anyaritae Akich lo arai lokookeng a Maaka. Tolimokinae Chimei tamarae, “Alot ngikedalak kon nakwap a Gas.”

⁴⁰Tonyou Chimei todoka losikiria keng tolot nakwap a Gas nia Akich, asakar ngikedalak keng. Tobuu ngesi ngikedalak keng nawi.

⁴¹Ani elimokinio Solomon atamar alosit Chimei nakwap a Gas ani erumor tobongu,

⁴²tomea ekapolon itwaan anyaraun Chimei, sodi tolimok ngesi tama, “Kesikongi kolong ayong iyong alokiro a Ekapolon Akuj atamar nyiirotok alo Yerusalem. Abu kechikichik atamar ani kilot iyong wache, iteni itoani. Ibu kitolimok ayong tama, ‘Itemokino ngakiro na ilimu iyong, ewapi ayong.’

⁴³Nyo peirichakinea iyong ngakiro na ikongi iyong ka etal lokadungokini ayong iyong?

⁴⁴Iyeni iyong ilope ngakiro naaronok daang nakolong isubea iyong apakang Daudi. Kirirae Ekapolon Akuj iyong kotere nguna.

⁴⁵Nakaneni kapiari Ekapolon Akuj ayong jik, nabo itogogongi apolou a Daudi jik.”

⁴⁶Sodi todungok ekapolon Benaya atamar tolot taar Chimei. Abu apolou daang min nakan a Solomon.