Read turkana 1 Ngikapolok 20 Bible Online

1 Ngikapolok 20 - turkana bible

1 Ngikapolok 20

¹Tochunak ekapolon a Asiria lo anyaritae Benadad ngajorei keng daang, erukito ka ngikapolok ngiche ngitomwon-uni ka ngiarei lu aikinito ngesi, ka ngangolei, ta ngaurukukui na iritae. Tonyou ngesi tolot kisiriam ngajorei a Samaria, sodi kitijik.

²Tomea ngesi ngimeanara lore nia Aab alo arai ekapolon a Isirael alimokin ngesi kona, “Ebala Benadad kona

³‘Tajalakinae ayong ngaropiyae kon, ka egolit, ka ngaberu kon naajokak, ta ngide.’ ”

⁴Tatachu Aab tama, “Ee ekapolon, loger lo ilimunio iyong, ekapolon kang tolemarae ayong ka ibore ni atingit daang.”

⁵Ani ekisidi tobongut ngimeanara ngulu nia Aab ebalasi, “Ebala Benadad kona, ‘Ameunit kolong ayong ngitunga nikon, asaki kiinak iyong ayong ngaropiyae kon, ka egolit, ka ngaberu ta ngide.

⁶Nakaneni tokona, ameuni ayong ngikapolok a arieng kang kisemoto tooma akai kon ka ngakais a ngikapolok a arieng kon, sodi tolemasi ibore daang ni ejoikini kesi.[26] Epote kesi moi esaa lo ikoni logo.’ ”

⁷Tanyarau ekapolon Aab ngikarikok a akwap daang tolimok tama, “Ingolikis tokona esi atamar esaki itwaan en akibeny ngoni. Ameuni ngoon ngesi ngitunga esaki ngaberu kang, ka ngide, ka ngaropiyae, ta egolit. Atacham ayong.”

⁸Tolimut ngikarikok ka ngitunga tamasi, “Wara nyiimisik ngakiro keng. Wara nyiicham.”

⁹Sodi tolimok Aab ngimeanara a Benadad tama, “Tolimokisi ekapolon kang, lo erai ekapolon a Siria kona, ‘Achamu ayong daang nakolong alimuni ngesi ekingaren, nakaneni anger na tokona nugu.’ ” Torotokis ngimeanara sodi tobongut nabo ka ngakiro ngache

¹⁰ani a Benadad ebala, “Ameuni moi ayong ngitunga lu itemokino akinyasun Samaria sodi tolemasi ekokoto a ngakan kech. Kataara ayong ngakujo erai pekasubak nguna!”

¹¹Tatachu Aab tama, “Tolimokisi Benadad kona, ‘Iwoga palem ekajwon erai kerumo ejie, meere eringa!’ ”

¹²Tolimokinae Benadad ngakiro nguna esaa lo eboyooto ngesi ka ngikapolok luche lu aikinito ngesi, emaase emuna aloeaman kech. Tolimok ngesi ngitunga keng tama, “Tochila akodet.” Tochila kesi akodet esakete akitijikin ngitunga a ere.

¹³Esaa lopei ngolo, tolot ekadwaran nia Aab tolimok tama, “Ebala Ekapolon Akuj, ‘Wara nyiem ajore natikaalan naga! Kesidwangi ayong iyong akolongit naga, toyen atamar ayong arai Ekapolon Akuj.’ ”

¹⁴Kingis Aab tama, “Tangae erikete ejie?” Tatachu ekadwaran tama, “Ebala Ekapolon Akuj ngasigerea nasorok erikito ngikaweikinak a ngakwapea kesi erikete ejie.” Kingis Aab tama, “Ngae isiakini ejie?” Tatachu ekadwaran tama, “Iyong.”

¹⁵Sodi tanyarau ekapolon ngasigerea nasorok erikito ngikaweikinak a ngakwapea, eraakasi daang ngamiae ngaarei ka ngitomwon-uni ka ngiarei. Sodi tanyarau ngasigerea a Ngisirael na araakasi daang ngabunge ngakan-kaarei.

¹⁶Tonyout kesi ejie naparan lotingilan, esaa lo amaasa Benadad ka ngikapolok lutomwon-uni ka ngiarei aloeaman kech.

¹⁷Kingarenikis ngasigerea a Aab nasorok. Pot ngasigerea nasek amearit Benadad akirereor, tolimokis ngesi tamasi, “Eponito ngasigerea alo Samaria.”

¹⁸Todung Benadad tama, “Kirumutu eyarete, nyiimisikis kerai ejie eponito kori ekisil.”

¹⁹Kisiakis ngasigerea nasorok ejie, totupuut ngasigerea a Ngisirael,

²⁰sodi taar ipei kech daang itwaan ni ajioto. Tamataros ngitunga a Siria, kiritasi Ngisirael kesi, nakaneni tobuchar Benadad edokit angole, ka ngikameak ngangolei ngiche.

²¹Toloma Aab lojie sodi tolema[27] ngangolei ka ngaurukukui na irito ngangolei, taar ngesi ngitunga a Siria lukaalak.

²²Ani erumor bu ekadwaran nia ekapolon Aab tolimok tama, “Tobongo kiatak ngajorei kon, torek ngakiro kon lokojokon kainyo kitijikini ekapolon a Siria iyong erupe lo moi.”

²³Tolimokis ngikapolok a arieng a Benadad ngesi tamasi, “Eraakasi ngakujo a Ngisirael ngika ngimoru, ngesi ngoon kidwangeta kesi ngoni. Kipedori ngoni akidwang kesi dir erai kitijik anaroatin.

²⁴Tosubak tokona kona, tolema ngikapolok lutomwon-uni ka ngiarei, sodi kilunyok ngikarikok a ngasigerea.

²⁵Ani erumor tochunak ngasigerea na etia na ngoon kiisikinete iyong, kitiriyan tani ngangolei ka ngaurukukui kech. Kitijikini ngoni Ngisirael anaroatin edwanga jik.” Kiira ekapolon Benadad ngakiro nguna sodi tosubak loger lo abalatar kesi.

²⁶Ani enangi ngirwa lua erupe, tochunak Benadad ngasigerea keng toloto lore a Apek akitijikin Ngisirael.

²⁷Tochunakin Ngisirael etingito ngiboro kech lujiet, torotokis sodi topero a ngalooso a ngaarei ekienyikinito ngasigerea a Siria. Kikwaanikini Ngisirael ka ngisipaan a ngaanei luuchik ngiarei, itemio ka ngitunga a Siria lu apetakina akwap wadaang.

²⁸Tolot ekadwaran nia ekapolon Aab tolimok tama, “Ebala Ekapolon Akuj kona, ‘Aloger ebalatar ngitunga a Siria arai ayong akuj a ngimukur, meere akuj a ngaroatin, kesidwangi ayong iyong ajore natikaalan naga, toyeneta iyong ka ngitunga kon atamar arai ayong Ekapolon Akuj.’ ”

²⁹Kiboyoto ngitunga a Siria ka lua Isirael anadakarin kech ekienyikina a ngirwa a ngikan-kaarei. Ani akolongit na ngakan-kaarei, kisiakis kesi ejie. Taara Ngisirael ngitunga a Siria ngabunge amiat apei a akolongit a apei.

³⁰Ani lu edongete, tamataros tolomasi lore a Apek. Ani enangete neni, toukokinos ngawasea a ere kesi taara ngitunga ngabunge ngatomwon-arei ka ngakan-kaarei lusek edongito. Tobuchar Benadad dang tolot lore sodi toloma namaniyat na ayei naabor a akai a ache.

³¹Tolimokis ngikapolok a arieng keng tamasi, “Kiira sua atamar abe isieneko ngikapolok a Ngisirael. Kimiekinae sua atanapa ngiguniae anaaborin kosi, elogaloga ngaunoi lomosiringan kosi, sodi atoloto nia ekapolon a Isirael, kijaluni tokona ngon ngesi iyong.”

³²Sodi toinikis kesi ngiguniae naaborin kech, kilogaloga ngaunoi lomosiringan kech, toloto nia Aab tamasi, “Ebala Ekasuban etich kon Benadad, ‘Kimiekinae kare nyikiar.’ ” Tolim Aab tama, “Eringa ngesi eyari a? Ikwa ejok! Ikoni ngesi lokaatokang!”

³³Agasete ngitunga ngulu tolimunoe akiroit naajokon. Ani napei alimunio Aab akiroit be, “Lokaatokang,” kiroposi kesi jik tamasi, “Erai Benadad lokaatokon loger lo ibalar iyong!” Todung Aab tama, “Kapesi torikutu ngesi nikang.” Ani edoluni Benadad, tanyarau Aab ngesi naurukuk keng na irito ngangolei.

³⁴Tolimok Benadad ngesi tama, “Kabuakini ayong iyong ngirerea lukolong alemari apakang anika apakon. Ipedori iyong akiduk ni isubea emuchuruseenu kon lore a Damasko, loger lokolong asubea apakang alo Samaria.” Tatachak Aab tama, “Kalakakini ayong iyong kotere ngakiro nguna.” Tachamakinos kesi sodi kimiek Aab Benadad tolot.

³⁵Loger lo adungokinitor ngesi Ekapolon Akuj, abu epei anatiakar a ngikadwarak tolimok loche tama, “Taramae kare ayong!” Nakaneni towou loche akiram ngesi.

³⁶ Sodi tolimok lo ekingaren loche tama, “Aloger iwounea iyong akiwap ngakiro a Ekapolon Akuj, kiari iyong engatuny napei irotokinio anikang.” Ani napei arotokinio ngolo, totubun engatuny taar ngesi.

³⁷Sodi tolot ekadwaran ngolo nitwaan iche tolimok tama, “Taramae kare ayong!” Taram itwaan ngini ngesi lokojokon towan.

³⁸Toen ekadwaran ngolo ereet keng a achaat, kitiliwoon enape, sodi tolot towo alorot idarit ekapolon a Isirael itoruni neni.

³⁹Ani itoruni ekapolon neni, tanyara ekadwaran ngesi tama, “Ekapolon, ajii ayong alojie, sodi bu asiger ache erikit emoit lo erumunio katolimok ayong tama, ‘Kitee itwaan en. Ani kesii, kiario iyong kori itachi ngaropiyae ngabunge ngauni.’

⁴⁰Nakaneni etumor ayong alotich a eche, sodi tosii itwaan ngini.” Tolimok ekapolon ngesi tama, “Eriras kon ngolo ilimu iyong. Itachi iyong.”

⁴¹Kiwolo ngesi achaat aloreet keng atipei, toyen ekapolon ngesi atamar erai epei a ngikadwarak.

⁴²Tolimok ekadwaran ekapolon tama, “Ebala Ekapolon Akuj kona, ‘Aloger ilakakinea iyong itwaan nikolong adunguni ayong atamar taarae, talakak iyong esii, itachi iyong a akiyar kon, nabo emunyario ngasigerea kon ani alakakineta ngasigerea keng esiyete.’ ”

⁴³Tobongo ekapolon nawi keng Samaria ialolongi tosiliyorite.