Read turkana 1 Ngikapolok 21 Bible Online

1 Ngikapolok 21 - turkana bible

1 Ngikapolok 21

¹Ayei amana a itwaan ani anyaritae Nabos diyete awi a ekapolon Aab alo Yesireel.

²Akolongit apei, tolimok Aab Nabos tama, “Nakinae ayong amana kon. Asaki ayong etaene aloger eyakar diyete akai kang. Kelokonyikini ayong iyong amana naajokon, kori ani kisaki iyong agieli a ngaropiyae ana itemokino.”

³Tatachak Nabos Aab tama, “Keratak Ekapolon Akuj ayong nyakainak iyong amana naga! Kainyo erumi kolong ayong amana naga ani kata apaakang.”

⁴Tolot Aab nawi esiliyorit tongoite ani abalar nabos, “Nyakainakini ayong iyong amana kata apaakang.” Kinapakin Aab lokitanda keng, ekienyikinit esiep a akai, nabo tonger akimuj.

⁵Tolot aberu keng Yesebel nikeng kingit tama, “Nyo isiliyoritor iyong? Nyo peimujea iyong?”

⁶Tatachak ngesi tama, “Kainyo esuruori ayong Nabos atama, ‘Nakinae amana kon atogiel a ngaropiyae. Kori ani kerai amana nache isaki iyong, kelokonyik nakang.’ Tatachu ngesi tama, ‘Nyakainakini ayong iyong amana kang.’ ”

⁷Tolimok Yesebel ngesi tama, “Iyong irai ekapolon kori meere? Tonyou kimuj. Kainakini ayong iyong amana a Nabos!”

⁸Kigir Yesebel ngabaruae a ekiro a Aab togol tatapak emachar a Aab, sodi tomea lokapolok a arieng, ka lokarikok a ngitunga a Yesireel.

⁹Egiritae abarua kona, “Kikeutu atamar toronoi akimuj, tochunakis ngitunga, sodi kiwaakis Nabos ni erimae.

¹⁰Tolemutu ngirukooi ngiarei kisuburata Nabos tamasi, ‘Ichieni iyong Akuj ka ekapolon.’ Ani erumor torikosi ngesi nikalapatan a ere, sodi kimasa a ngamoru taara.”

¹¹Apot ngikapolok a arieng ka ngikarikok a ngitunga a Yesireel, tosubakis loger lo adungokinitor Yesebel kesi.

¹²Apot kikeut atamar toronoi akimuj, tochunakis ngitunga, sodi kiwaakis Nabos ni erimae.

¹³Kisuburata ngirukooi luarei ngulu ngesi alongaren ngitunga ebalasi, “Echieni Nabos Akuj ka ekapolon.” Sodi torikosi ngesi nikalapatan a ere kimasa a ngamoru taara.

¹⁴Tomearae itwaan nia Yesebel tolot alimokin kona, “Aar Nabos.”

¹⁵Napei eirarea Yesebel atamar emas Nabos a ngamoru atoana, tolimok ngesi Aab tama, “Tonyou tolema amana a Nabos, nakolong awouni ngesi agielakin iyong.”

¹⁶Tonyou Aab atipei tolot tolema amana a Nabos.

¹⁷Ani erumor tolimok Ekapolon Akuj ekadwaran Elija loa ere a Tichibe tama,

¹⁸“Kape nia ekapolon a Isirael alo enyaritae Aab alo eyei Samaria. Iriamuni iyong ngesi alomana a Nabos, esaki alemar amana ngina.

¹⁹ Tolimok ngesi atamar abala ayong Ekapolon Akuj kona, ‘Ikwa iari iyong itwaan ani erumor kirum ibore keng dang a?’ Tolimok ngesi atamar abala ayong Ekapolon Akuj kona, ‘Ni kolong ameyoto ngingokwo ngaakot a Nabos, nipei neni ngesi emeyoto ngaakot kon!’ ”

²⁰Ani ingolikini Aab Elija, kingit tama, “Emoit kang, kisiriamik iyong ayong a?” Tatachu Elija tama, “Ee, kesiriamik, kainyo ilemuni iyong akisub nguna aronok noi alongaren Ekapolon Akuj.

²¹Ebala robo Ekapolon Akuj kona, ‘Ayauni ayong ngakiro naaronon nikon. Kekisari ayong iyong, sodi atomunya itwaan nikile daang anawi kon, lusorok ka lumojong.

²²Ikokini awi kon awi a ekapolon Yeroboam alokookeng a Nebat, ka awi a Baacha alokookeng a Aija, kainyo kitongo iyong ayong kitilil, ani ilomakinea Ngisirael nakisech.’

²³Ani na erai Yesebel, ebala Ekapolon Akuj kona, ‘Enyamete ngingokwo akwaan a Yesebel alore a Yesireel.’

²⁴ Eyenet kon cha daang lo etoanikini lore, enyamete ngingokwo. Ani lo etoanikini moding, enyamete ngataruk.” (

²⁵Amam itwaan iche alemuna akisub naaronok noi alongaren Ekapolon Akuj loger a Aab. Aberu keng Yesebel ngesi echuchukinit ngesi nakiro nguna daang.

²⁶Asubi ngesi ngasechesea na ngileech noi ani elipitor ngakujo nasubuna, loger losek asubete Ngiamor, lusek eritari Ekapolon Akuj na alooso Ngisirael ngaren.)

²⁷Ani iirari Aab ngakiro nguna, tochilichili ngiworui keng, tobuto, sodi tanap ngiguniae. Tonger akimuj, toper aloguniae toliwor elosi esinyit tosiliyorite.

²⁸Tolimok Ekapolon Akuj ekadwaran Elija tama,

²⁹“Ingolik iyong eger lo etiditeunor Aab alongaren kang a? Aloger ekokinea ngesi neni, nyayauni ayong ngakiro nugu nikeng eringa ngesi eyari. Ayauni ayong ngakiro naaronok nguna nawi a Aab ngirwa lu eliworor lokookeng ekapolon.”