Read turkana 1 Ngikapolok 22 Bible Online

1 Ngikapolok 22 - turkana bible

1 Ngikapolok 22

¹Esilito Ngisirael ka ngitunga a Siria a ngikaru a nguuni.

²Nakaneni ani ekaru lo a nguuni, tolot ekapolon Yeochapat lo a Yuda aanyun ekapolon Aab lo a Isirael.

³Kingit Aab ekapolon a arieng keng tama, “Iyenete ba esi atamar erai ere a Ramos alo Gilead eyok a? Ani nyo bo kibooyo ngoni pekilosio alemar ani a ekapolon a Siria?”

⁴Kingit Aab Yeochapat tama, “Ibuni iyong erukosi etijikisi Ramos a?” Tatachu Yeochapat tama, “Anyouni ayong esaa daang lo inyounio iyong. Ngasigerea kang dang ka ngangolei, enyounito loger anakon.

⁵Nakaneni kimiek mono engitutu Ekapolon Akuj ngakiro nugu.”

⁶Sodi tochunak Aab ngikadwarak luko asibit ngamiae ngoomwon kingit tama, “Alosi etijik Ramos kori nyalosi?” Tatachut tamasi, “Kape. Kisidwangi Ekapolon Akuj iyong.”

⁷Nakaneni kingit Yeochapat tama, “Emam nege ekadwaran eche a Ekapolon Akuj lo kipedori ngoni akingit a?”

⁸Tatachu Aab tama, “Eringa eyei itwaan ipei ni kipedori ngoni akingit ngakiro a Ekapolon Akuj. Enyaritae ngesi Mikaya lokookeng a Imula. Nakaneni aremokino ayong ngesi kainyo nyedwareene ngesi ngakiro naajokak anikang, pearai naaronok jiik.” Tolim Yeochapat tama, “Nyejoikinit iyong ilimuni kongina.”

⁹Sodi tanyarau Aab epei a ngikapolok a arieng keng tama, “Kape toriku Mikaya lokookeng a Imula nege atiepi.”

¹⁰Ebooyete ngikapolok luarei ngulu alokicholongo kech a apolou, enapito ngiworui lukooyak a ngikapolok. Ebooyete kesi anidaet ngalemet anikalapatan ere a Samaria. Ayakasi ngikadwarak daang neni adwarete alongaren ngikapolok ngulu.

¹¹Abu epei a ngikadwarak lo anyaritae Sedekia lokookeng a Kenaana tosubak ngaamwar nasua sodi tolimok Aab tama, “Ebala Ekapolon Akuj kona, ‘Itijikini iyong Ngisiria a ngaamwar kanu tomunya.’ ”

¹²Tolimut ngikadwarak luche daang ngakiro napei nguna ebalasi, “Kape kitijik Ramos kidwang. Kisidwangi Ekapolon Akuj iyong.”

¹³Abu itwaan nisek amearitae anyaraun Mikaya tolimok Mikaya tama, “Adwar ngikadwarak luche daang ngakiro naajokak ani a ekapolon, ejoikinit iyong dang elimuni napei nguna.”

¹⁴Nakaneni tolim Mikaya tama, “Ekongi ayong alokiro a Ekapolon Akuj atamar ngakiro nakalimokini ayong Ekapolon Akuj, kesi alimuni ayong!”

¹⁵Ani enanguni ngesi nia ekapolon Aab, kingit Aab ngesi tama, “Mikaya, kilosi ayong ka ekapolon Yeochapat akitijikin Ramos kori mam?” Tatachu Mikaya tama, “Kape kitijik kidwang. Kisidwangi iyong Ekapolon Akuj.”

¹⁶Tolim Aab tama, “Ibala katolimok ngalimokinet ngaai atamar nakisuruorea iyong ayong alokiro a Ekapolon Akuj kiruor ngakiro na iteni?”

¹⁷ Tatachu Mikaya tama, “Engolik ayong ngasigerea a Ngisirael epetakina kidiama ngimukur loger a ngamasekin ana emam ekeyokon. Tolim Ekapolon Akuj tama, ‘Emam ngitunga lugu ekarikon. Kimiekisi kesi tobongosi nawi akaalimon.’ ”

¹⁸ Tolimok Aab Yeochapat tama, “Petete kalimokini ayong iyong atamar nyedwareene logo naajokak jik anikang pearai naaronok a?”

¹⁹Tolim Mikaya tama, “Kiira tokona ngakiro na elimunit Ekapolon Akuj! Engolikini ayong Ekapolon Akuj ibooyi alokicholong keng anadis, ka ngimalaikae keng daang ewaasi alodiye keng aloteten ka kedieny.

²⁰Kingis Ekapolon Akuj tama, ‘Ngae ingalae Aab tolosio taarae alo Ramos?’ Tolimut ngimalaikae ngiche nugu, tolimut luche ngun.

²¹Sodi bu etau towo alongaren Ekapolon Akuj tama, ‘Engalae ayong ngesi.’

²²Kingit Ekapolon Akuj ngesi tama, ‘A eger kaali?’ Tatachu etau tama, ‘Alosi ayong etiliwo ngikadwarak a Aab daang ngikaliokok.’ Tolim Ekapolon Akuj tama, ‘Kape kingala ngesi. Ipedori iyong.’ ”

²³Torumo Mikaya ngakiro keng ebala, “Ngakiro na asubakin kesi nugu, eteliokon Ekapolon Akuj ngikadwarak lukon lugu, sodi kingalata iyong. Nakaneni adungu Ekapolon Akuj alope atamar iriamunosi iyong ka naaronok!”

²⁴Sodi tonyou ekadwaran Sedekia tolot kibap Mikaya namatangen ebala, “Ekokini etau a Akuj kadepari ayong kisuruor iyong ai?”

²⁵Tatachu Mikaya tama, “Iyenuni iyong akolongit na ilosio akiduk anamaniyat ana alotooma.”

²⁶Todungok ekapolon Aab epei a ngikapolok a arieng keng tama, “Kirumutu Mikaya torikosi nia Amon alo erai ekapolon a ere, ka Yoach lo erai lokookeng a ekapolon.

²⁷Tolimokisi kesi atamar abala ayong kona, ‘Toinikisi itwaan en lojela kisumuja ngamugati, ka ngakipi tanang abonguni ayong akaalimon!’ ”

²⁸Tolim Mikaya tama, “Ani kibongu iyong akaalimon, nyisuruoro Ekapolon Akuj ayong.” Kiatak nabo tama, “Kiira iyong itwaan daang ngakiro na alimu ayong nguna.”

²⁹Sodi toloto ekapolon Aab lo a Isirael ka Yeochapat loa Yuda akitijikin ngitunga a ere a Ramos alo Gilead.

³⁰Tolimok Aab Yeochapat tama, “Ani kilosi ngoni lojie, etiliwooni ayong enape kang, nakaneni tanap iyong ngiworui kon a apolou.” Sodi tolot ekapolon a Isirael lojie itiliwoonit enape.

³¹Adungokinit sek ekapolon a Siria ngikarikok a ngasigerea keng lutomwon-uni ka ngiarei lu aweikinito ngaurukukui na irito ngangolei tama, “Nyiitijikis itwaan iche, kedit kori kepolot, pearai ekapolon a Isirael bon.”

³²Ani ingolikinete kesi ekapolon Yeochapat tamasi, “Ekapolon a Isirael logo.” Apot kesi toreas esakete akitijikin ngesi, sodi toowanik Yeochapat.

³³Ani eyenete kesi atamar meere ngolo ekapolon a Isirael, tobongut tojongoto akiwapit ngesi.

³⁴Nakaneni toguma asiger apei a Siria emal keng lo echanyuni ekapolon Aab, togum nakiriamet a ngiboro alu ejie alu anapit ngesi. Tolimok ngesi ekamean aurukuk keng na irito ngangolei tama, “Torei topudo alojie! Kainyo kawan ayong!”

³⁵Torirau ejie noi akolongit ngina. Kigangakinae Aab naurukuk keng kisingoliarae lowae lo a ngitunga a Siria. Toleleasi ngaakot anajeme keng toburuchiasi kwap aurukuk, ani enangi ebong, totoan ngesi.

³⁶Ani eapikini adooyoret a akolong, taramae elii anasigerea a Ngisirael ebeyo, “Tobong itwaan daang nakwap keng ka lore keng!”

³⁷Totoan ekapolon Aab, yaarae akwaan keng Samaria tonukae.

³⁸Kilotarae aurukuk keng anabwel a Samaria, ani ameyoto ngingokwo ngaakot keng, nabo ni elotatar ngamalaae, loger losek alimunitor Ekapolon Akuj atamar esubakin.

³⁹Ngakiro nache daang nakolong asubi Aab, aapei ka ngakiro a akai ana aduki ngesi ana etisiritoe a ngikel a etom, ka ngirerea daang lu aduki ngesi, igiritae nakitab na enyaritae Ngakiro a Ngikapolok a Isirael.

⁴⁰Ani etoani ngesi, kilunyokin lokookeng Aasia napolou keng.

⁴¹Ekaru lo a nguomwon lo araakar Aab ekapolon a Isirael, toliwor Yeochapat lokookeng a Asa ekapolon a Yuda,

⁴²erai ngikaru keng ngitomwon-uni ka ngikan. Topolok ngesi Yerusalem a ngikaru a ngitomwon-arei ka ngikan. Anyaritae itiokeng Asuba nakookeng a Chili.

⁴³Tosub Yeochapat nguna eriyan alongaren Ekapolon Akuj loger a apakeng alo engareni ngesi. Nakaneni aringa ngikenoi lu ipeyoore anasenon nyinyasuna. Aringa ngitunga ipeyoote ngakipeyos ka akinom emitina kaneni.

⁴⁴Abu Yeochapat kisila ka ekapolon a Isirael.

⁴⁵Ngakiro nache daang nakolong asubi Yeochapat, ajwonu keng daang ka ngijiesinei lu ajii, igiritae nakitab na enyaritae Ngakiro a Ngikapolok a Yuda.

⁴⁶Abu ngesi tomunya ngitunga lumalaae daang lu epeyonokinete ngakujo nagelayek. Ngitunga ngulu kesi lu kolong edongete nakwap ngirwa lu araakar Asa ekapolon. Arai Asa apakeng a Yeochapat.

⁴⁷Amam akwap a Edom ekapolon ayei. Ekapolon a Yuda ngesi aseununi itwaan ni etupit ngesi topolok neni.

⁴⁸Tosubak ekapolon Yeochapat ngatubwae naapolok na eloose ananamea sodi kiwaanaros nakwap na enyaritae Opir tasakasi egolit. Nakaneni nyeyakara kesi kainyo apot tobwangabwangae alo Esionigeber.

⁴⁹Abu Aasia lo arai ekapolon a Isirael tolimok Yeochapat tama, “Kimiek ngitunga kang tolomasi natubwae kiwaaros ka lukon aapei.” Nakaneni towou Yeochapat.

⁵⁰Totoan Yeochapat, tonukakinae nalielin a ngikapolok na eyakasi lore a Daudi. Sodi kilunyokin lokookeng Yeoram napolou.

⁵¹Ekaru lo a ngitomon ka ngikan-kaarei lo araakar Yeochapat ekapolon a Yuda, toliwor Aasia lo arai lokookeng a Aab ekapolon a Isirael, sodi topolok alo Samaria a ngikaru a ngiarei.

⁵²Tosechak ngesi Ekapolon Akuj, kiwap eboyor a Aab alo arai apakeng, ka Yesebel na arai itiokeng, ta ekapolon Yeroboam lokolong elomakini Ngisirael nakisech.

⁵³Kilip Aasia Baal ka akisub etich a Baal. Loger lo kolong a apakeng, abu ngesi kitongo Ekapolon Akuj na erai Akuj a Isirael kitilil.