Read turkana 1 Ngikapolok 3 Bible Online

1 Ngikapolok 3 - turkana bible

1 Ngikapolok 3

¹Abu Solomon tachamakin ka ekapolon a Misiri kiut nakookeng a ekapolon kangolo. Toriku Solomon aberu ngina lore a Daudi tanang ngirwa lu arumorea ngesi akiduk akai keng, ka akai a Akuj, ta awas na eriamit ere a Yerusalem.

²Epeyoenete ngitunga ngakipeyos alokenoi alugelagelae kainyo aringa akai a Akuj nyeduko.

³Amina Solomon Ekapolon Akuj nabo ewapit ngesi ngakiro a apakeng Daudi. Tani ikoni neni dang, angoleene ngesi dang ngibaren eraakasi ngakipeyos alokenoi alugelagelae.

⁴Akolongit apei, tolot Solomon akipeyore alo Gibeon kainyo inaa ngesi ayei ekeno lo ayenikinitae. Epeyot sek Solomon ngakipeyos abunget apei kaneni.

⁵Akolongit ngina nakwaare alo Gibeon, bu Ekapolon Akuj nia Solomon anakirujare tolimok tama, “Kilipae ibore ni cha isaki iyong kainak.”

⁶Tolim Solomon tama, “Idodiunit kolong iyong amina naationon na nyedaun anika apakang Daudi alo arai ekasuban etich kon, kainyo arai ngesi lo imuno iyong nabo atenoono, tarai loajokon noi anikon. Eringa iyong idodikinit ngesi amina naationon noi na nyedaun ani iinakinea ikoku nisapat ni iboi alokicholong tokona a apolou keng.

⁷Tokona bocha, Ekapolon Akuj na irai Akuj kang, kilunyok iyong ayong napolou a apakang, tani bo kadit dang, nyayeni akou ka aabor a ngakiro a apolou.

⁸Ayong logo ayei kiding ngitunga lukolong iseuni iyong, ebukut lo eyenikinitae, ngitunga lu nyimarun ani elalaketa noi.

⁹Aloger kangolo, nakinae aosou na apolokinio ngitunga kon alorot alo a iteni, atoyenea naajokak ka naaronok. Kainyo ngae epedori apolokin ngitunga lukon kaalak lugu?”

¹⁰Tojoikis Ekapolon ngakiro na elipar Solomon aosou.

¹¹Tolimok Akuj ngesi tama, “Ani aloger ilipar iyong aosou na ipolokinio ngitunga a erot alo a iteni, akidwang akilipa atamar toyar a ngirwa alukaalak, kori ebari, kori akitu a ngimoe kon,

¹²asubakini tokona ayong nguna ilipa iyong. Kainakini ayong iyong aosou ka achwaanu na emam itwaan aanyu napei kolong jik eringa, nabo emam itwaan iche eanyuni ni isidiun iyong.

¹³Kainakini tani ngakiro na eringa nyilipa, kainakini ebari ka ekipur, nyemini ekapolon eche kisikwaanere iyong ngirwa daang lu iyarea iyong.

¹⁴Ani kiwap iyong ngirotin kang, ka ngakitatamet kang, ta ngitalio kang, loger lokolong ewapitor apakon Daudi, eatakini ayong ngirwa lu iyarea iyong.”

¹⁵Tokienyu Solomon toyen atamar kesuruori Akuj ngesi anakirujare. Tolot ngesi Yerusalem towo alongaren asaduku a Achamunet a Akuj, kipeyo ngakipeyos na inomio, ka na a ekisil, kipeyonok Ekapolon Akuj. Ani erumor kisumuj ngesi ngikasubak etich keng daang.

¹⁶Apote ngamalaae ngaarei akolongit apei towaa alongaren Solomon.

¹⁷Tolim apei kech tama, “Ekapolon kang, kibooyi kolong ayong ka aberu naga alokai a apei. Edou ayong ikoku nisapat alokai eyei ngesi neni.

¹⁸Adaunet a ngirwa a ngiarei anakolongit ana edounio ayong, kidou aberu naga dang ikoku nisapat. Sua naarei make kiya kai, amam itwaan iche ayei neni.

¹⁹Akolongit apei nakwaare, kibelobeloor aberu naga totik ikoku keng taar.

²⁰Tonyou ngesi kiding akwaar tadaka ikoku kang anakook kang ajotoe ayong, dio akiperikin nakook keng. Tadaku ngesi ikoku keng ni atoanit kiperik nakook kang.

²¹Ani anyouni ayong nataparach abala etanak ikoku kang, atoriam etoanit. Ani esemee ayong ngesi lokojokon, atoriam pearai nikang.”

²²Nakaneni tolim aberu nache tama, “Meere kongina! Erai ikoku ni eyari ikang. Erai nikatoan ikon!” Tatachu na ekingaren tama, “Meere kongina! Erai ikoku nikatoan ikon! Erai ni eyari ikang!” Topegakin kesi loger ngolo alongaren ekapolon.

²³Sodi tolim ekapolon tama, “Ebala esi apei, ‘Ikoku kang ni eyari, ikon ni etoanit’, tama nache, ‘Meere kongina, nikon ni etoanit, nikang ni eyari.’ ”

²⁴Tolim ekapolon tama, “Inunae ayong ekileng.” Sodi inunae ekapolon ekileng.

²⁵Tolim ekapolon tama, “Tapak ikoku ni eyari ngaarei, nak ewae epei aberu apei, nak ewae loche aberu nache.”

²⁶Ani aloger aminar aberu nalope ikoku keng, abu ngesi tolimok ekapolon tama, “Ekapolon kang, nyiar kare ikoku! Nak aberu naga!” Nakaneni tolim aberu nache tama, “Nyeinakinio itwaan ipei ikoku ngini, tapak!”

²⁷Ani erumor tolim Solomon tama, “Nyiar ikoku! Nak aberu nata a ekingaren, ngesi erai ikoku ikeng dir.”

²⁸Ani iirarete Ngisirael eger lo atubio Solomon ngakiro nguna, apot kesi daang tokera ngesi noi erimasi kainyo apot kesi toyena atamar ainaki Akuj Solomon aosou na etubio ngakiro alorot alo a iteni.