Read turkana 1 Ngikapolok 5 Bible Online

1 Ngikapolok 5 - turkana bible

1 Ngikapolok 5

¹Arai sek ekapolon a Tiro lo anyaritae Iram lopae keng a Daudi. Ani iirari ngesi atamar elunyokin Solomon napolou a apakeng Daudi, abu ngesi tomea ngikaweikinak keng nia Solomon.

²Tomea Solomon ngitunga nia Iram ebala,

³“Iyeni iyong atamar peapedori apakang Daudi akiduk akai a Akuj kotere ngijiesinei lu etijio ngesi jiik nakwapea na eriamito ngesi, tanang ni esidwangea Ekapolon Akuj ngesi ngimoe keng daang.

⁴Nakaneni kainaki tokona ayong Ekapolon Akuj na erai Akuj kang ekisil alowaitin kadaang. Emam tokona ngimoe eyakasi kori aremo.

⁵Aloger kangolo, asaki ayong adukokin akai a Ekapolon Akuj ana erai Akuj kang, loger lokolong echikakinea Ekapolon Akuj apakang Daudi tama, ‘Lokookon lo elunyokini ayong lokicholong a apolou, ngesi kadukokini ayong akai.’

⁶ Tokona bocha, tomea ngitunga kon katotubokis ayong ngakito a ngichekereng alo Lebanon. Epote ngitunga kang kimorikin ka kesi alotich. Atachi ayong ngitunga kon ngaropiyae etiae locha itiakuni iyong. Iyeni iyong atamar emam itwaan anikosi kane eyeni akitub ngikito loger a ngitunga kon, a Ngisidon.”

⁷Ani iirari Iram ngakiro a Solomon, talakar ngesi lokojokon, tolim tama, “Kipuroe Ekapolon Akuj akolongit naga ani ainakinea Daudi lokookeng lokooson noi lo epolokini ngitunga lukaalak lugu!”

⁸Abu Iram tomea ngitunga nia Solomon ebala, “Eira ayong ngakiro kon. Asubakini ayong ngakiro na isaki iyong daang. Alemuni ayong ngikito a ngichekereng ka ngidomou.

⁹Eyaunete ngikasubak etich kang ngakito alo Lebanon yaasi nanam toena aapei, kilebolebooros ananam tanang ni isaki iyong, ani enangi neni, talachakis ngitunga kang ngakito nguna nakis ngitunga kon. Ani alowae kon, ilemuni iyong akimuj a ngitunga kang.”

¹⁰Sodi inu Iram Solomon ngakito a ngichekereng ka ngidomou na asaki ngesi,

¹¹sodi tolemanak Solomon ngesi ngataanea ngabunge ngatomwon-arei a ngakanoi, ka ngalitae ngabunge ngamiae ngoomwon[6] a akimiet anaajokon, sodi kisumujea ngitunga ngulu. Alemuununi Solomon akimuj ngina ekaru daang.

¹² Nak Ekapolon Akuj Solomon aosou loger losek echikakinitor. Min ekisil nia Iram ka Solomon, sodi tachamakin kesi luarei.

¹³Kipaku Solomon ngitunga ngabunge ngatomwon-uni alo Isirael kadaang, kidesik akisub etich,

¹⁴sodi toseu Adoniram toweik kesi. Totiak Solomon kesi a ngalooso a ngauni, a ngitunga ngabunge ngatomon. Eboyeene atiaket apei alo Lebanon a elap a pei, tobongut nawi a ngilapio a ngiarei.

¹⁵Ayakasi Solomon nabo ngitunga ngabunge ngatomwon-kauni nakwap na a ngimukur abelebeleete ngamoru, toyakas ngitunga ngabunge ngatomwon-kaarei lu adakete ngamoru nguna.

¹⁶Toseu ngesi ngitunga ngabunge ngauni ka ngamiae ngauni toweikis etich ka ngitunga lu asubete etich.

¹⁷Apot kesi tobelabelata ngamoru naapolok naajokak nakitoweet akai a Akuj loger losek adungunitor ekapolon Solomon.

¹⁸Apot ngikadukok a Solomon, ka lua Iram, ta ngitunga a ere a Bibilos tolemut ngamoru ka ngakito naduket akai a Akuj.