Read turkana 1 Ngikapolok 6 Bible Online

1 Ngikapolok 6 - turkana bible

1 Ngikapolok 6

¹Adaunet a ngikaru a ngamiae a ngoomwon ka ngitomwon-kauni napei kolong erotokinete Ngisirael alo Misiri, ekaru lo a nguomwon lo apolokinitor Solomon Isirael, elap lo a ngiarei lo enyaritae Sip, abu Solomon kisiak etich lo akiduk akai a Ekapolon Akuj.

²Arai aoyau na alokwap alotooma akai ngina ngamitae 27, tarai ewae louriyen ngamitae 13.5.

³Arai aoyau na elosi nalup a akai ana elomanarere namaniyae ngamitae 4.5, tarai ewae louriyen ngamitae 9, eriyan ka ewae lo alongaren akai.

⁴Tosubak ngesi alokwaasea a akai ngipukei lukaadingak anikalapatan, tabalany alotooma.

⁵Alokwaasea a akai, ngisiepion ka aabor alowae alo anikalapatan, apon kiatarae ngakais na alokidiama ngauni. Arai aoyau na alokidiama a akai a apei ngamitae 2.2.

⁶Anamaniyat a apei kadaang a akai ana alokwap, arai ewae louriyen ngamitae 2.2, ani na alokiding ngamitae 2.7, ani na alokidiama ngamitae 3.1. Abeben ngikwaasea a akai kadaang ana alokidiama akidwang na alokwap, sodi towaar akai peirepakinitae ngakito nakiganget.

⁷Asubio akai a ngamoru anasek asubitae ani ebesere, ani esaa lo edukere akai, nyeeminio erue a ngakujuka ka ngaepe kori ngiboro luche lusua.

⁸Ayei ekidor a akai ana alokwap[7] lowae lo alokuju akai, toyakas ngadoket na edokarere lowae lo alokidiama tolomarere namaniyat na alokiding ta na ngauni.

⁹Sodi toduk Solomon akai a Akuj torumo. Toduk ngesi kidiama akai alowae alo alotooma a ngakito a ngichekereng.

¹⁰Adukokinitae adukuor na ayakasi ngakais na alokidiama ngauni ngina lokwaas lo anikalapatan akai a Akuj, tokonyakinitetei a ngakito anakiganget ana araakasi ngaka ngichekereng. Arai aoyau na alokidiama a akai a apei ngamitae 2.2.

¹¹Tolimok Ekapolon Akuj Solomon tama,

¹²“Anakiro a akai ana iduki iyong kana, kasubakinea ayong iyong ngakiro nakolong echikakini ayong apakon Daudi, erai kiwap iyong ngakitatamet kang, ka ngakiro kang ta akirichakin ngitalio kang daang.

¹³Eboikin ayong kiding Ngisirael lu eraakasi ngitunga kang alokai ana iduki iyong kana. Nyaisikini ayong kesi jik.”

¹⁴Sodi toduk Solomon akai a Akuj torumo.

¹⁵Apon ngikwaasea a akai alowae alo alotooma toburae a ngakito a ngichekereng napei alokwap tanang kidiama, sodi tosubunae ewae lo alokwap a ngakito a ngidomou.

¹⁶Adukitoe amaniyat na alotooma na enyaritae ewae lo italeuniote noi, lowae lo aabor a akai a Akuj. Arai aoyau keng ngamitae ngakan-koomwon, totiakitetei a ngakito a ngichekereng napei alokwap tanang kidiama.[8]

¹⁷Arai aoyau a amaniyat ana eyei ngaren ewae lo italeunitoe noi ngamitae ngatomon ka ngakan-kauni.

¹⁸ Etisiritoe ngakito na alotooma, akulakinitae ngituol ka ngatur. Aburuchiaritae ewae lo alotooma daang a ngakito a ngichekereng sodi nyeepedoreta ngamoru atakanuun.

¹⁹Ani ewae lo alotooma noi akai a Akuj, abu ngesi todukok amaniyat na alotooma ni iwaakinio asaduku a Achamunet a Akuj.

²⁰Arai aoyau a amaniyat ana alotooma kangina ngamitae ngakan-koomwon, tarai auriaunut ngamitae ngakan-koomwon, tarai aoyau na alokidiama ngamitae ngakan-koomwon. Aburuchiaritae ngiwaitin daang a egolit bon. Aburuchiaritae ekeno a ngakipeyos a ngakito a ngichekereng.

²¹Kitokorian Solomon ewae lo alotooma akai a egolit, sodi kiriwokinae ngiriko a egolit ngaren amaniyat na alotooma, sodi toburuchiarae ngiriko ngulu a egolit.

²² Aburuchiaritae akai daang a egolit, tani ekeno a ngakipeyos lo ayei namaniyat na alotooma noi, toburuchia ngesi a egolit.

²³Tosub ngesi ngiborei lua ngabeben ngiarei anakito a ngikito a akimiet kiwaak lowae lo italeunitoe noi. Arai aoyau a ipei kech kadaang ngamitae 4.4.

²⁴Arai aoyau a abeben kech a apei ngamitae 2.2, tarai aoyau a abeben anache ngamitae 2.2. Napei alokidiama abeben apei tanang kidiama nache, arai ngamitae 4.4.

²⁵Arai nabo ibore nia ngabeben niche dang ngamitae 4.4. Ariyan ngiborei luarei lua ngabeben ngulu ekwaan.

²⁶Arai aoyau na alokidiama a ipei kech kadaang ngamitae 4.4.

²⁷Esibakitae ngiborei lua ngabeben ngulu alowae alo alotooma noi, sodi tatapas ngabeben kech na epetara alokiding amaniyat.

²⁸ Aburuchiaritae ngiborei luarei a ngabeben ngulu a egolit.

²⁹Abu Solomon kitisir ngikwaasea a amaniyat anaapolon ka na alotooma, tokulak ngiborei lua ngabeben, ka ngingolea, ta ngatur.

³⁰Aburuchiaritae tani ewae lo ngalup a egolit.

³¹Asubunitae ngidorin ngiarei lu iriamito a ngakito kitowae ani elomarere lowae lo alotooma noi. Ewae lo alokidiama ekidor ka ngapirio a ekidor, akuduno kiganga ekidor.

³²Etisiritoe ngidorin a ngiborei alu a ngabeben, ka ngingolea, ta ngatur na akulitae. Ngidorin, ka ngiborei lua ngabeben, ta ngingolea, etisiritoe a egolit.

³³Tosubunae ngakito na itoweito ekidor anakito a ngikito a akimiet, eyakasi ngiwaitin nguomwon lu eriyan lu elomarere namaniyat naapolon.

³⁴Ayakasi ngidorin ngiarei lu abilanakinio lu asubunitae anakito a ngidomou.

³⁵Etisiritoe ngidorin ngulu a ngiborei alu a ngabeben alu akulunitae. Etisiritoe tani a ngingolea, ta ngatur, sodi toburuchiarae a egolit kilalakinae.

³⁶Tokudokinae alaar na alotooma ngaren akai a Akuj. Kisiriamae ngikwaasea a akidokiet a apei a ngakito a ngichekereng, ka ngakidokiet ngauni a ngamoru.

³⁷Arumorio akiduk ewae lo a ngalup a akai a Akuj elap lo a ngiarei lo enyaritae Sip, ekaru lo a ngauomwon lo araakar Solomon ekapolon.

³⁸Ani enangi elap lo a ngikan-kauni lo anyaritae Bul, ekaru lo a ngitomon ka epei lo araakar Solomon ekapolon, apon torumoroe jik akiduk akai a Akuj loger lokolong sek arekinitae. Erikakini Solomon ngikaru ngikan-kaarei eduki akai ngina.