Read turkana 1 Ngikapolok 7 Bible Online

1 Ngikapolok 7 - turkana bible

1 Ngikapolok 7

¹Aduki Solomon akai keng a elope torumo a ngikaru a ngitomon ka nguuni.

²Aduki ngesi akai na anyaritae akai a Amoni a Lebanon.[9] Arai aoyau keng ngamitae 44, tarai aurianut ngamitae 22, tarai aoyau na alokidiama ngamitae 13.5. Adukokinitae kidiama ngangedakinet ngauni a ngapirio a ngichekereng. Ayakasi ngapirio ngatomon ka ngakan, kiriwokinitetei ngakito a ngichekereng kidiama ngapirio.

³Aburuchiaritae kidiama a ngakito a ngichekereng tanang lopemin lu adukokinitae kidiama napirio ngatomwon-omwon ka ngakan. Arai ngapirio ngatomon ka ngakan ayakasi nangedakinet apei.

⁴Ngikwaasea luarei a akai, ayakasi epei kech daang ngangedakinet ngauni a ngipidinga.

⁵Ayakasi ngidorin daang ka ngipidinga ngakito na itoweito na ayakasi ngiwaitin nguomwon. Akienyikina ngangedakinet a ngipidinga aluuni ka ngangedakinet nache daang.

⁶Todukok ngesi akai na anyaritae akai a Ngapirio. Arai aoyau keng ngamitae 22, tarau aurianut ngamitae 13.5. Ayei ekidor lo aburitae kigangito ngapirio.

⁷Todukok Solomon akai na anyaritae akai a Apolou, anyaritae nabo ekiro eche akai a Eriras, ni atubeeneo ngesi ngakiro. Adukitoe a ngakito a ngichekereng napei analup tanang kidiama.

⁸ Adukitoe akai a Solomon a elope loger a ngakais anache. Ayei akai keng nalaar ache na ayei naabor a akai a Eriras. Todukok ngesi nabo aberu keng na arai nakookeng a ekapolon a Misiri akai na ikoni ngina.

⁹Ngakais nguna daang napei anakai a Akuj tanang kai a Solomon, adukitoe a ngamoru anakaalak a ngaropiyae napei analup tanang najipet na alokidiama. Echietae ngamoru nguna sodi kitemoi, totuboe ngiwaitin lu alotooma ka lu anikalapatan a ngigirigirea.

¹⁰Adukitoe ewae lo a ngalup a ngamoru anakaalak a ngaropiyae taraakas naapolok, na asubio anikibeset ngamoru. Arai aoyau a ngache kech ngamitae ngauni ka anus tarai aoyau a ngache ngamitae ngoomwon.

¹¹Kidiama kech adukitoe a ngamoru anakaalak a ngaropiyae, na ibesite kitemitetei lokojokon. Adukitoe tani a ngakito a ngichekereng.

¹²Alaar na akai a ekapolon, ka alaar na alotooma akai a Akuj, ta amaniyat na elomarere kai a Akuj, ayakasi ngikwaasea lu achulitoe a akidokiet a apei a ngakito a ngichekereng, tochulokinae nakidokiet ngauni a ngamoru ana ibesitae.

¹³Tanyarau Solomon itwaan ni anyaritae Uram alo Tiro.

¹⁴Arai ngesi lokookeng a apuserut a apei ana arai aka ekitela a Naputal. Arai apakeng itwaan a akwap a Tiro. Arai kolong apakeng ekunonoit a ngasua ananyangayek. Arai Uram itwaan nikachwaan tarai ekunonoit lo eyenikinitae alotich a ngasua ananyangayek. Abu ngesi tacham aweikin etich daang a ngasua ananyangayek loger lo alimokinitor Solomon.

¹⁵Tosubak Uram ngakitoropiet ngaarei na ngasua ananyangayek. Arai aoyau a apei ngamitae 8, tarai alangirir ngamitae 5.3, sodi kiwaak kesi ni elomarere kai a Akuj.

¹⁶Tosubak ngesi nabo ngiwaitin lua ngakies ngiarei lua asuat ananyang, erai aoyau a ipei kech kadaang ngamitae 2.2, sodi kidokok nakies a ngakitoropiet.

¹⁷Etisiritoe kidiama ngakitoropiet nguna a ngiriko alu edanyitae,

¹⁸kimorikinae ka ngangedakinet ngaarei a asir ana ekwaan ka ngalam.

¹⁹Asubunitae ngiwaitin lua ngakies a ngakitoropiet kanguna ikwaan ka ngatur a eewat, erai aoyau kech ngamitae 1.8,

²⁰kiwaakinae kesi lowae lolem lo eyei kidiama asir a ngiriko. Ayei asir na ekwaan ka ngalam ngamiae ngaarei na ayakasi nangedakinet ngaarei, na eriamito akou apei.

²¹Kitowo Uram ngakitoropiet naarei a ngasua ananyangayek nguna alodiyete ni elomanarere kai a Akuj. Abu ngesi tanyara akitoropiet na ayei lowae lo alokuju Yakin, sodi tanyara na ayei lowae lo alokwap Boas.[10]

²²Ngiwaitin lua ngakies a asuat ananyang lu ekwaan ka eewat ngulu, ayakasi kidiama kech ngakitoropiet. Sodi torumor etich a ngakitoropiet.

²³Tosubak Uram atanki a ngakipi a ngasua ananyangayek. Eriamit atanki ngina. Arai aoyau keng ngamitae 2.2, tarai aurianut napei alokwaas aloche tanang loche ngamitae 4.4. Arai aoyau a akirimokinet a apei ngamitae 13.2.

²⁴Eriamito ngitoroi ngiarei a ngituol lowae lo anikalapatan ngikelio a atanki alowae alo a ngalup. Asubunitae ngituol ngulu anasua ananyangayek.

²⁵Edokokinitoe atanki ngina kidiama ngimongin ngitomon ka ngiarei lu asubunitae anasua ananyangayek. Engoliarito ngimongin nguuni kwap, kingoliasi nguuni too, kingoliasi nguuni kuju, sodi kingoliasi nguuni kide. Engoliarito ngaaborin kech lowae lo alotooma.

²⁶Arai alangirir a ngikwaasea a atanki kangina ngamilimitae 75. Ekote ngipon a atanki kangina lua ekopo, tokuduno ngikwaasea nikalapatan loger a ngatur a eewat. Elelebuunun atanki ngina ngakipi na eraakasi ngalitae ngabunge ngatomwon-omwon.

²⁷Tosubak Uram tani ngaurukukui na iritae ngatomon anasua ananyangayek. Arai aoyau a apei kech kadaang ngamitae 1.8, tarai aurianut ngamitae 1.8, tarai aoyau na alokidiama ngamitae 1.3.

²⁸Asubunitae ngaurukukui nguna a ngiwaitin alu eriyan alu ewaanakinio nakito,

²⁹na atapakinitae ngakisikwaanet a ngingatunyo, ka ngimongin ta ngiborei lua ngabeben. Nasua nguna ka ngakito alokwap ka kidiama ngingatunyo, ka ngimongin ngulu, ayei asir na aluguritoe niajokon.

³⁰Ayakasi ngaurukukui nguna ngakejen ngaomwo-omwon na asubunitae anasuat ananyang. Lowaitin luomwon, ayakasi ngakiganget ngoomwon na ngategerin. Etisiritoe ngakiganget nguna a asir ana aluguritoe niajokon.

³¹Ayakasi ngasua na eriamito lowae lo alokidiama ateger. Alowae alo alokidiama aurukuk arai aoyau a ngasua kanguna ngasentimitae 45. Tarai alowae alo alotooma ngasentimitae 18. Akulakinitae asir lowaitin daang.

³²Arai aoyau na alokidiama a ngakejen ngasentimitae 66. Ayakasi kesi kwap ngasua, nabo emorikina ngasua na ngakejen ka aurukuk atokokino.

³³Ekwaan ngakejen ka ngakejen a aurukuk ana irito ngangolei. Asubunitae ngasua na ngakejen, ka ngipon, ka ngaunoi nasua, ta ngalukan na alotooma ngakejen. Asubunitae daang anasua ananyangayek.

³⁴Ayakasi ngakiganget ngoomwon kwap ngikwaasea a ngaurukukui kadaang. Asubunitae ngakiganget nguna ka aurukuk imorikina etokokino.

³⁵Ayei atorosit na arai ngasentimitae 22 eriamit ewae lo alokidiama aurukuk. Ngakiganget keng ka ngasua, emorikina ka aurukuk atokokino.

³⁶Etisiritoe ngakiganget nguna ka ngasua a ngiborei alu a ngabeben, ka ngingatunyo ta ngingolea, awadaang anicha alolom sodi kisiriamae asir na eluguritoe niajokon.

³⁷ Asubakinitae ngaurukukui loger ngolo, ekwaan daang, ariyan aoyau keng ka eger lo asubitere.

³⁸Tosubak Uram tani ngategerin ngatomon, apei kotere aurukuk apei. Arai abalanyany a ateger a apei ngamitae 1.8, elelebuunun ngakipi ngalitae ngamiae ngakan-kauni.

³⁹Kiwaak Uram ngaurukukui ngakan lowae lo alokuju akai a Akuj, kiwaak nache lowae lo alokwap. Sodi kiwaak atanki lowae lo alo kide alokuju.

⁴⁰Tosubak Uram tani ngamoti ka ngakalobochio nawadet ngalup, ta ngatubwae nabeleny. Torumo Uram etich lo akiduk akai a Akuj losek adungokinit ekapolon Solomon ngesi.

⁴¹Asubakinit ngesi ngapirio ngaarei, ka ngakies kech na ikwaan ka ngakalobochio, ta ngiriko lu edanyitae lurapet ngakies a ngapirio.

⁴²Tosubak ngakisikwaanet a ngalam ngamiae ngoomwon kotere ngiriko luarei ngulu, ngangedakinet ngaarei a ngalam kotere erikot epei, sodi kitisiro ngakies a ngapirio.

⁴³Tosubak ngaurukukui ngatomon, ka ngategerin ngatomon na asiponokinio ngaurukukui.

⁴⁴Tosubak atanki ka ngakisikwaanet a ngimongin lu asipokinitae atanki.

⁴⁵Tosubak ngamoti, ka ngakalobochio nawadet ngalup, ta ngatubwae. Ayakasi ngiboro ngulu daang kai a Akuj nakolong aduki Uram kotere ekapolon Solomon. Asubunitae ngiboro ngulu daang anasuat ananyang ana epusitae.

⁴⁶Loger lo alimunitor ekapolon, apon ngiboro ngulu daang tosubae ani asubeenere ngasua anadipo a Yorudan, kiding Sukos ka Saretan.

⁴⁷ Abu Solomon nyiitem ngiboro lua ngasua ananyangayek ngulu kainyo alalak noi. Aloger kangolo, nyeanyuna apotis a ngiboro kangulu.

⁴⁸Sodi tosubak Solomon ngiboro daang lu iwaakinio kai a Akuj, tosubak a egolit. Ngiboro ngulu kesi ekeno a ngakipeyos ka emeesa a ngamugati ana elemanakinio Akuj,

⁴⁹ka ngasipet ngatomon a ngataae na ayakasi ngaren ewae lo italeuno noi, ayakasi ngakan kuju, toyakas ngakan kwap. Tosubak ngatur ka ngataae, ka ngasua naridet ngatotol.

⁵⁰Tosubak ngikopoi, ka ngasua nakitudungeet ngataae, ka ngatubwae nabeleny, ka ngitubwae lukinomet emitina, ta ngataritarea nalemet ngatotol na enokete. Tosubak ngasua a ngidorin a ewae alo italeuno noi ka ngidorin lua nikalapatan akai a Akuj. Asubunitae ngiboro ngulu daang a egolit.

⁵¹ Ani erumori ekapolon Solomon etich keng daang a akai a Akuj, abu tolem ngiboro daang lukolong etaleuni apakeng Daudi toliworos ngika Ekapolon Akuj, kiwaak lokerui a akai a Akuj. Araakasi ngiboro ngulu ngakwangae, ka egolit ta ngiboro luche.