Read turkana 1 Ngikapolok 8 Bible Online

1 Ngikapolok 8 - turkana bible

1 Ngikapolok 8

¹Ani erumor tochunak ekapolon Solomon ngikarikok daang a ngitela, ka ngimacharin a Ngisirael pot nikeng alo Yerusalem, sodi tolemareta asaduku a Achamunet a Akuj alo Sion alo erai ere a Daudi, yaarae kai a Akuj.

²Tochunakinos kesi daang ngirwa lua esukukuu a ngikalea elap lo a ngikan-kaarei lo enyaritae Esanim.

³Ani echununosi ngikarikok daang, tadakut ngimurok asaduku a Achamunet,

⁴tadakasi kai a Akuj. Apot Ngilawi ka ngimurok yaasi tani eam a Akuj ka ngiboro keng daang yaasi kai a Akuj.

⁵Abu ekapolon Solomon ka Ngisirael daang lu achunakina ngaren asaduku a Achamunet kipeyoto ngamesekin ka ngaatuk nakaalak na nyimarun.

⁶Ani erumor tadakasi ngimurok asaduku a Achamunet tooma kai a Akuj, kiwaakis lowae lo italeunitoe noi, kwap ngiborei lua ngabeben.

⁷Tarapa ngabeben kech na apetara asaduku ka ngakito na adakitere.

⁸Aoyak ngakito nguna noi atakanete ngasalunet kech arai kewo itwaan alongaren ni italeuno noi. Peapedorio aanyungar anikalapatan. (Eringa ngakito nguna eyakasi neni tani tokona.)

⁹ Amam ibore ayei tooma asaduku a Achamunet pearai ngamoru nadapal naarei nakolong ewaakini Musa alomoru a Sinai, nakolong achamakinotor Ekapolon Akuj ka Ngisirael na apudunioto alo Misiri.

¹⁰Ani napei apudunioto ngimurok alokai a Akuj, abu edou toburuchia akai a Akuj.

¹¹Kilelebun akwangis naakwaan kea a Ekapolon Akuj kai, tongop kesi kona ebongorete tooma akisub ngitichisio kech.

¹² Sodi kilip Solomon tama, “Ekapolon Akuj, iwaak iyong akolong nadis, tarai iseu iyong akiboikin lodowon ka naribu.

¹³Kadukok tokona ayong iyong akai a apolou, sodi kiboikini iyong neni jik.”

¹⁴Towaa ngitunga sodi torei Solomon kingolia lowae kech topia kesi.

¹⁵Tolim ngesi tama, “Kipuroe Ekapolon Akuj na erai Akuj a Ngisirel! Asubaki ngesi ngakiro nakolong echikakini ngesi apakang Daudi ebala,

¹⁶ ‘Napei kolong epudunio ayong ngitunga kang alo Misiri, emam ere aseu ayong anakwap a Isirael kadaang lo edukokinio akai na kelipere ayong. Nakaneni kaseuni ayong iyong Daudi apolokin ngitunga kang.’ ”

¹⁷Torubak Solomon iruoro ebala, “Asaki kolong apakang Daudi adukokin akai na ilipere Ekapolon Akuj na erai Akuj a Ngisirael.

¹⁸Nakaneni tolimok Ekapolon Akuj ngesi tama, ‘Itemokino eger lo isakea iyong akiduk akai kang,

¹⁹ ani kaneni dang, nyiduki iyong pearai lokookon lo iuriuni iyong ngesi kadukokini ayong akai.’

²⁰“Asubaki tokona Ekapolon Akuj ngakiro nakolong echikakini ngesi, kainyo elunyokin ayong napolou a apakang Daudi, aliwor ekapolon a Ngisirael, nabo adukok akai a Ekapolon Akuj ana erai Akuj a Isirael.

²¹Alotooma akai ngina, asubak tani ni iwaakinio asaduku a Achamunet na eyakasi ngamoru nadapal na achamunet ana kolong achamakinosi Ekapolon Akuj kata apaayok na epudunio kesi alo Misiri.”

²²Sodi towo Solomon alongaren ekeno a ngakipeyos a Ekapolon Akuj ani achunakin Ngisirael daang kaneni. Kikea ngesi ngakan keng kidiama,

²³kilip tama, “Ee Ekapolon Akuj na irai Akuj a Ngisirael, emam akuj na ikwaan ka iyong alokidiama nadis ka kwap nege! Irichakinit iyong ngakichiket kon, nabo imina iyong ngitunga kon lu iwapito ngakiro kon a ngitai kech kadaang.

²⁴Irichak iyong ngakiro nakolong ichikakini apakang Daudi. Eyookin ngakiro nguna daang akolongit naga.

²⁵Ee Ekapolon Akuj na irai Akuj a Isirael tokona bocha, kilipit atamar kirichak tani akichikakinet nache na kolong ichikakini iyong apakang Daudi ibala, ‘Ngirwa daang, nyengopi itwaan analesea kon ni epolokini Ngisirael, erai cha kiwap kesi ngakiro kang lokojokon loger lokolong iwapitor iyong.’

²⁶ Akuj a Isirael, tokona bocha, kimiek ngakiro kon kiyookin. Ngakiro nakolong ichikakini iyong apakang Daudi, lo arai ekasuban etich kon.

²⁷“Nakaneni ipedori iyong dir Akuj akiboikin nakwap nege a? Ekoe, ani bo akai na aduk ayong naga, nyediding noi a!

²⁸Ee Ekapolon Akuj na irai Akuj kang, kiira akilip kang a ekasuban etich kon, tosubak nguna kelipi akolongit naga.

²⁹Kitee akai nakon naga akwaar ka apaaran, nege ni ilimu iyong ibala, ‘Ni kelipere ayong nege.’ Kiirarae ayong esaa lo akienyikinea akai naga kelip iyong.

³⁰ Kiira akilip kang ka ngakilipasinei a ngitunga kon na ekienyikineta akai naga kilipa iyong. Kiirarae sua anawi kon ana eyei nadis, sodi kitorimak.

³¹“Ani itwaan ni esechakini itwaan niche, sodi torikunoe lokeno kon a ngakipeyos alokai kon, kikong atamar nyasechit ngesi,

³²kiira iyong anadis sodi totiaku ngakiro a ngikasubak etich kon, na iyookino. Kirira ngini esechit loger lo ejoikinit iriraare, sodi talakak ngini nyesechit itemem ka ateneanut keng.

³³“Ani idwangete ngimoe ngitunga kon Ngisirael ani kisechakinitotor iyong, nakaneni ani kereeunosi kesi nikon, pot kai naga kilipa iyong itiditeuna esakete kitorimakin,

³⁴kiira iyong ngakiro kech anadis. Torimak ngasechesea a ngitunga kon, sodi tobuu kesi nakwap nakolong iinakini iyong taapaakech lungorok.

³⁵“Ani kigolo iyong akiru ani kisechakinitotor kesi iyong, nakaneni ani kelunga kesi akisech kech, tokienyikis akai naga, kilipa iyong itiditeuna,

³⁶kiira iyong anadis. Torimak ngasechesea a ekapolon ka ngikasubak etich kon, alu eraakasi ngitunga kon Ngisirael. Kitatam kesi akisub nguna iyookino. Ee Ekapolon Akuj, talakak robo akiru taram akwap nakon naga, nakolong iinakini iyong ngitunga kon toliwor akech jik.

³⁷“Ani kemin eron a akoro nakwap, kori edeke loaronon kori kinyasu edii a akamu ngamanat, kori ngasepicho a emaase, kori kiriama ngimoe ngitunga kon, kori keting kesi edeke kori elekes,

³⁸kiira ngakilipasinei kech. Alotunga kon a Ngisirael, itwaan cha daang ni kilipi iyong ialolongi alotau keng, ibakinit akai naga ngakan ilipit,

³⁹kiira akilip keng. Kiira kesi anawi kon ana eyei nadis, torimak kesi, kingarak. Iyong bon iyeni ngakiro na eyakasi lotau a itwaan. Tosubea itwaan daang nguna itemokino esubere,

⁴⁰sodi kitokereta ngitunga kon iyong ngirwa daang lu ibooyoto kesi anakwap ana kolong iinakini iyong taapaakech lungorok.

⁴¹“Loger lopei ngolo, ani kebu itwaan a akwap anache ni nyerai ipei a ngitunga kon, bu anakwap anakalonan akilip iyong alokai kana, (

⁴²kainyo iirarete kesi ekipur kon ka ngakiro naationok isubi iyong),

⁴³kiira akilip keng. Kiira akilip keng anadis ani ibooyo iyong, tosubak nguna ilipa ngesi, sodi kitoyeneta iyong ngitunga a ngakwapea daang kitokereta, loger lokikeritotor ngitunga kon Ngisirael. Eyenunete kesi atamar akai na aduk ayong naga ngesi iseu iyong kilipeenere.

⁴⁴“Ani kidungok iyong ngitunga kon atamar toloto akitijwore ngimoe kech, nakaneni ani kilipa kesi iyong awadaang anicha eyakasi, ekienyiunito lore lo iseu iyong logo ka akai nakadukok ayong iyong naga,

⁴⁵kiira ngakilipasinei kech. Kiira kesi anadis sodi tobwanga kesi ngimoe kech.

⁴⁶“Ani kisechakis ngitunga kon iyong, aloger emamakar itwaan nyesecheene, sodi ani ingoi iyong kimiek ngimoe idwangete kesi toriko kesi nakwapea nache toliworos ngirikon, tani keloka ngakwapea nguna,

⁴⁷kiira ngakilipasinei kech. Ani kilipa kesi tolunga ngasechesea kech anakwap kangina, elimorito akisech ka aronis kech, kiira ngakilipasinei kech, Ekapolon Akuj.

⁴⁸Ani kelunga kesi ngasechesea kech anakwap kangina, tolunga a ngitamen kech kadaang ka ngitai kech daang, sodi kilipa iyong ekienyiunito nakwap naga nakolong iinakini iyong taapaakosi lungorok, ka ere lo iseu iyong logo ta akai nakadukok ayong iyong naga,

⁴⁹kiira ngakilipasinei kech. Ani iyei iyong nadis ni erai awi kon, kiira ngakiro kech, kisieneto kesi.

⁵⁰Torimak ngasechesea kech daang ka angerit nakingeritotor iyong, sodi kitojok ngitai a ngimoe kech tosubeta kesi naajokak.

⁵¹Eraakasi kesi ngitunga kon a ilope, lukolong ipuduni iyong alo Misiri, ana ekwaan ka akim nakariran.

⁵²“Ekapolon Akuj na Ipol Noi, tominak ngitunga kon Ngisirael ka ekapolon kech jiik. Kiira ngakilipasinei kech nache kinyaraata iyong esakete akingarakino.

⁵³Ee Ekapolon lo irai Ekapolon Akuj, iseuni kolong iyong kesi alotunga kadaang toliworos ngitunga kon a ilope, loger lokolong ilimokinea iyong kesi ani a ekasuban etich kon Musa, nakolong ipudunio iyong taapaakosi lungorok alo Misiri.”

⁵⁴Ani kilip Solomon Ekapolon Akuj kerumor, abu towo alongaren ekeno a ngakipeyos anisek ariedikitor ngesi ikearit ngakan.

⁵⁵Kirema ngesi kilip Akuj ebala topia ngitunga daang lu achunakina neni. Tolim ngesi tama,

⁵⁶“Kipuroe Ekapolon Akuj na ainaki ngitunga keng ekisil loger lokolong echikakinitor. Erichak ngesi ngakichikakinet keng naajokak daang nakolong esitoruni nia ekasuban etich keng Musa.

⁵⁷Kimiekisi Ekapolon Akuj na erai Akuj yok eruko ka ngoni loger lokolong arukitotor ka taapaayok lungorok. Nyikiisik Ekapolon Akuj ngoni kori nyikinger.

⁵⁸Kitiliwo ngesi ngoni lu kiwapit ngakiro keng, sodi ebooyoto ngoni jiik loger lo esakea ngesi, erichakisi ngitalio keng daang ka ngakiro nakolong adungokini ngesi taapaayok lungorok.

⁵⁹Kimiekisi Ekapolon Akuj na erai Akuj yok toliwor itamunit ngakiro na elipa ayong nugu ngirwa daang. Toliwor ngesi jiik lo a ngisien ani a Ngisirael ka ekapolon kech, itemem ka ngakiro na iitanito kesi jiik,

⁶⁰sodi toyeneta ngitunga a ngakwapea daang atamar Ekapolon Akuj bon ngesi erai Akuj, emam ache.

⁶¹ Toliworos esi ngitunga a Akuj lu inupito Ekapolon Akuj na erai Akuj yok, iwapito ngitalio keng daang ka ngakiro na edungunit ngesi loger lo tokona iwapitotor.”

⁶²Ani erumor tolemut Solomon ka ngitunga daang ngakipeyos kipeyokis Ekapolon Akuj.

⁶³Kipeye Solomon ngaatuk ngabunge ngatomwon-arei ka ngaarei, ka ngamesekin ngabunge amiat apei ka ngatomwon-arei, eraakasi ngakipeyos a ekisil. Sodi kitaleut Solomon ka ngitunga daang akai a Akuj.

⁶⁴Akolongit napei ngina, abu ngesi kitaleu kiding alaar, alowae alo alongaren akai, sodi kipeye kaneni ngakipeyos na inomio nginerin daang, ka ngakipeyos a ngalemet ta nikatoronon a ngibaren alu eraakasi ngakipeyos a ekisil. Asubi ngesi kongina kainyo adit ekeno lo a ngasua ananyangayek peadikino itemokin ngakipeyos nguna daang.

⁶⁵Apot Solomon ka Ngisirael daang tanyama esukukuu loa ngikalea ngolo a ngirwa a ngikan-kaarei[11] alokai a Akuj. Alal asepich a ngitunga esiakini napei anapak a Amas alokwap tanang lokukuoru a Misiri alokuju.

⁶⁶Ani akolongit na ngakan-kauni, kieala Solomon ngitunga toloto nawiyei elakara kotere apiaro daang na apiarea Ekapolon Akuj ekasuban etich keng Daudi, ka ngitunga keng Ngisirael.