Read turkana 1 Ngikapolok 9 Bible Online

1 Ngikapolok 9 - turkana bible

1 Ngikapolok 9

¹Ani erumori Solomon akiduk akai a Akuj, ka akai a ekapolon, ta ibore daang nikolong cha asaki ngesi akiduk,

²bu Ekapolon Akuj nia Solomon na ngaarei loger lokolong sek abunitor nikeng alo Gibeon.

³Tolimok Ekapolon Akuj ngesi tama, “Eira ayong akilip kon. Etaleu ayong akai na iduk iyong naga, toliwor akilipet ayong jik. Etee ayong, eratak ngirwa daang.

⁴Ani eliwor iyong, ani kisub iyong etich kang kotere iteni ka ateneanut, loger lokolong asubea apakon Daudi, ani kiwap iyong ngitalio kang ka ngakiro nakadungokini ayong iyong,

⁵apiari ayong apolou kon alo Isirael jik loger lokolong echikakinea Daudi abala, ‘Ngirwa daang, nyengopi itwaan analesea kon ni epolokini Isirael.’

⁶Nakaneni ani kirea iyong anikang, kori kereasi ngalesea kon anikang, towout akiwap ngitalio kang ka ngakiro nakadungok ayong esi, sodi kilipa ngakujo ngache,

⁷alemari ayong ngitunga kang Ngisirael anakwap ana ainak ayong kesi. Aisikini ayong tani akai na etaleu ayong toliwor kelipeenere ayong naga. Imenyarete ngitunga awadaang Ngisirael kisuruma ngileech.

⁸Eliwor akai naga ngamoru na etukokina,[12] toliwor ngitunga daang na itorunioto nege toriangakinos kuumwokis ebalasi, ‘Kotere nyo asubakinea Ekapolon Akuj ngakiro nugu anakwap kana ka akai naga?’

⁹ Etachunete ngitunga tamasi, ‘Erai ni aisikineta kesi Ekapolon Akuj na erai Akuj kech nakolong epuduni taapaakech lukolong ngorok alo Misiri. Achamunete kesi ngakujo ngache sodi kilipa ka akipeyonokin. Kotere ngakiro nguna, ayau Ekapolon Akuj ngakiro naaronok nugu nikech.’ ”

¹⁰Aduki Solomon akai a Akuj ka akai a ekapolon a ngikaru a ngitomwon-arei.

¹¹Ainakinit Iram lo arai ekapolon a Tiro Solomon ngiboro luduket lu araakasi ngakito a ngichekereng, ka ngidomou ta egolit daang lo asakitae asubea etich ngolo. Ani erumor etich, nak Solomon Iram ngirerea ngitomwon-arei anakwap a Galilaya.

¹²Tolot Iram aanyun ngirerea ngulu, nakaneni apot nyeejoikis ngesi.

¹³Sodi tolimok ngesi Solomon tama, “Lokaatokang, ngirerea lu ikote nege lugu kesi kiinakinit iyong ayong a?” Kotere ngakiro nguna, eringa neni tani tokona enyaritae Kabul.[13]

¹⁴Ainarit sek Iram Solomon egolit lo eporit ngakiloi ngabunge ngoomwon.

¹⁵Kidesik ekapolon Solomon ngitunga etich lo akiduk akai a Akuj, ka akai a ekapolon, ka akiduk ewae lo alo kide ere kimulelearae, ta akiduk awas a ere. Abu nabo kidesik ngitunga akiduk ngirerea a Asor, ka Megido, ta Geser. (

¹⁶Aremi sek ekapolon a Misiri Geser tolema, taar ngitunga lu alomito neni, sodi kichunyak ere akim. Ani erumor kipoto ere ngolo nak nakookeng akolongit na eusea Solomon apese ngina,

¹⁷sodi toduk Solomon ere ngolo nabo.) Kidesik Solomon ngitunga nabo akiduk ere a Bes-oron lo alokwap,

¹⁸ka Baalas, ka ere a Tamar lo ayei nariet a akwap a Yuda,

¹⁹ka ngirerea lu ekachio ngiboro a Solomon, ka ngirerea lu ayakasi ngangolei keng ka ngaurukukui na iritae, ta ibore cha daang ni asaki ngesi akiduk alo Yerusalem, ka Lebanon, ta ngiwaitin luche cha daang a akwap ana apolokinit ngesi.

²⁰Ngitunga lukolong edongete lu araakasi Ngiamor, ka Ngiiti, ka Ngiperes, ka Ngiipi ta Ngiebus (lu pearaakasi Ngisirael),

²¹ngalesea kech nakolong edongete nakwap, lukolong akuruworete Ngisirael amunyar alo Kanaan, abu Solomon kidesik kesi akisub etich. Eringa ngalesea kech eraakasi ngikedalak tani tokona.

²²Nakaneni abu Solomon nyiitiliwo Ngisirael ngikedalak, pearai abu kitiliwo kesi ngasigerea keng, ka ngikapolok a arieng, ka ngikarikok a ngasigerea, ka ngikapolok a ngaurukukui ana irito ngangolei, ta ngikameak ngangolei.

²³Ayakasi ngikapolok a arieng ngamiae ngakan ka ngitomwon-kan lu aweikinito etich lo akiduk, lo edesikinitae ngitunga.

²⁴Abu nakookeng a ekapolon a Misiri na arai aberu a Solomon taramak alore a Daudi tolot kai a ekapolon na adukokini Solomon ngesi. Ani erumor toduk Solomon ewae lo alo kide ere kimulelea.

²⁵ Epeyoene Solomon ngakipeyos na inomio ta na ekisil, kipeyo alokeno a Akuj ngakipeyoet ngauni alokaru a epei. Enomanakini ngesi Ekapolon Akuj tani emitina. Sodi torumo ngesi akiduk akai a Akuj.

²⁶Toduk ekapolon Solomon ngatubwae naapolok nakaalak alo Esionigeber, diyete Elas, lokwaas a apak a Akaba, anakwap a Edom.

²⁷Tomea ekapolon Iram ngitunga keng lu ayenete amere ngatubwae ananam toloto akisub etich ka ngitunga lua Solomon.

²⁸Kiwaaros kesi ananam tananga ni enyaritae Opir, tobongut inut Solomon egolit ngakiloi ngabunge ngatomon ka ngoomwon.