Read turkana 2 Ngikapolok 10 Bible Online

2 Ngikapolok 10 - turkana bible

2 Ngikapolok 10

¹Alomito talokookeng a Aab ngitomwon-kaarei lore a Samaria. Kigir Yeu abarua sodi tomea ngitunga yaasi lokapolok a ere,[14] ka ngitunga lu eyenikinitae, ta ngitunga lu etanete talokookeng a Aab. Egiritae abarua kona,

²“Esi iweikinito talokookeng a ekapolon. Eraakasi ngaurukukui na irito ngangolei ka ngangolei, ka ngiboro lujiet ta ngirerea lu iriamito ngawasea, nakan kus eyakasi. Tokona bocha, napei iriamuneta esi abarua naga,

³ejoikinit esi iseunete lokookeng a ekapolon lo eyeni etich lokojokon, kitiliwosi ekapolon, sodi tojwoto, toyuut ngesi.”

⁴Tobul ngikapolok a Samaria. Tolimut kesi tamasi, “Ngae epedori akitopeg Yeu? Tarai akuruwo tani ngikapolok Yoram ka Aasia.”

⁵Abu ekarikon a ngasigerea lo aweikinit akai a ekapolon, ka ekarikon a ngasigerea lo aweikinit ere, ka ngitunga lu eyenikinitae ta ngitunga lu etanete talokookeng a Aab, tomeasi itwaan nia Yeu ebalasi, “Kirai sua ngikasubak etich kon, nabo kipedori akisub ibore daang ni ilimuni iyong. Nakaneni emam itwaan ni kitiliwori sua ekapolon. Tosub iyong ngakiro nakijoikinito iyong.”

⁶Kigirak Yeu kesi abarua ache ebala, “Ani kibakito esi alowae kang tasakete akiwap ngakiro na adunguni ayong, yautu ngakies kata lokookeng a ekapolon Aab nikang kanege alo Yesireel, ngisaae lu tokona lugu moi.” Talokookeng a Aab lutomwon-kaarei, arukito ka ngitunga lu ayenikinitae alo Samaria. Ngitunga ngulu etanete kesi.

⁷Ani eanyunio abarua a Yeu, taara ngikarikok a Samaria talokookeng a Aab daang lutomwon-kaarei, kiwaakis ngakies kech nakikapea inasi Yeu alo Yesireel.

⁸Ani elimokinio Yeu atamar ayaun ngakies kata lokookeng a Aab, todung ngesi tama, “Tosenokisi toliworos ngasenon ngaarei alokidor a ere, kimiekis kaneni tanang moi nataparach.”

⁹Ani enangi nataparach, topudo Yeu alokidor sodi tolimok ngitunga lu ayakasi neni tama, “Ayong ngesi anyoikini ekapolon Yoram ataar, emam itwaan kipaikinit esi ngakiro keng. Nakaneni ngae aari lugu daang?

¹⁰Idodiunit ibore en atamar iyookinosi ngakiro nakolong eruoro Ekapolon Akuj kotere talokookeng a Aab. Asubaki Ekapolon Akuj ngakiro nakolong alimuni kisitoru nia Elija alo arai ekasuban etich keng.”

¹¹ Sodi taar Yeu ngiyenet a Aab lu alomito Yesireel, ka ngikapolok a Aab luuchik daang, ka ngipaalon keng luminan ta ngimurok. Emam tani ipei kech ni apon kimiekinae eyari.

¹²Torotok Yeu alo Yesireel tolot Samaria. Ani enangi lorot ni enyaritae “Adakar a Ngikeyokok”,

¹³kiriama ngesi ka ngiyenet ngiche a Aasia alo kolong arai ekapolon a Yuda. Kingit ngesi kesi tama, “Tangae esi?” Tatachut kesi tamasi, “Kirai sua ngiyenet a Aasia. Kilosi sua Yesireel akidodiun arimatoi ani a ngide a akapolon Yesebel ta ngitunga luche a awi a ekapolon.”

¹⁴Todungok Yeu ngitunga keng tama, “Kirumutu kesi eyarete.” Apon kesi kirumunae, taarak Yeu kesi diyete akipany na ayei neni. Araakasi ngitunga ngulu daang ngitomwon-koomwon ka ngiarei, nakaneni emam tani ipei kech ni abu kidong eyari.

¹⁵Torotok Yeu nabo. Ani enangi lorot, kisiriam ngesi Yonadab lo arai lokookeng a Rekab. Kimala Yeu ngesi sodi tama, “Kitami ayong ka iyong ngakiro ngapei. Ibaki iyong alowae kang a?” Tatachu Yonadab tama, “Ebaki.” Tatachak Yeu ngesi tama, “Kikobakinae robo ayong akan kon.” Totingas kesi sodi kingarak Yeu ngesi todoka naurukuk na irito ngangolei,

¹⁶ebala, “Bua apana kedodik eger lo alemunakar ayong ani a Ekapolon Akuj.” Apot kesi todoka aurukuk apei toloto Samaria.

¹⁷Ani enangete kesi neni, taar Yeu ngiyenet a Aab daang, nyimiekina tani ipei. Ngakiro nguna kesi nakolong alimokini Ekapolon Akuj Elija atamar esubakinosi.

¹⁸Tanyarau Yeu ngitunga a Samaria wapei tolimok tama, “Peelipit ekapolon Aab akuj nabe Baal lokojokon. Nakaneni elipi ayong Akuj ngina lokojokon.

¹⁹Tanyarautu ngikadwarak a Baal daang tochunakis wapei, ka ngitunga lu ilipito ngesi ta ngimurok keng daang. Emam tani ipei kech ni echamit idongi. Alemikini ayong Baal akipeyos naapolon noi. Ani itwaan cha daang ni engopi, eario.” (Arai ibore ngini elokit a Yeu lo asakea akiar ngitunga daang lu elipito Baal.)

²⁰Abu Yeu todung tama, “Kitaleutu akolongit apei na ilipere erimae Baal!” Apon tolimunoe akolongit na italeunio,

²¹sodi tomea Yeu ngitunga lowaitin daang a Isirael anyaraun ngitunga daang lu ilipito Baal. Apot daang lu ilipito Baal pot, emam tani ipei abu tongop. Toloto kesi daang kai a Baal, kilelebikin napei alowae a epei tanang loche.

²²Sodi todungok Yeu emuron lo aweikinit ngiworui lu italeunitoe atamar kipud ngiworui tokoranak ngitunga lu ilipito Baal.

²³Arumoret kanguna, apot Yeu ka Yonadab lo arai lokookeng a Rekab tolomasi kai a Baal, tolimokis ngitunga lu ayakasi neni tamasi, “Warasi ngitunga lu ilipito Ekapolon Akuj nyeelomut nege, ngitunga lu ilipito Baal make echamit elomunete.”

²⁴Apot ngesi ka Yonadab tolomasi alemikin Baal ngakipeyos ka ngakipeyos na inomio. Ewaakinit Yeu ngitunga ngitomwon-kauni nikalapatan a akai a Baal elimokinit ebala, “Taara ngitunga lugu daang. Itwaan nicha eisikini tani ipei kech esii, etachi kotere akiyar keng!”

²⁵Ani napei alemunea Yeu ngakipeyos keng, tolimok ngesi ngasigerea na iteete ngidorin ka ngikarikok a ngasigerea daang tama, “Tolomasi taara kesi daang. Nyiilakakis tani ipei esii!” Apot kesi tolomasi kai etakito ngilengea, taara kesi daang sodi kiriyasi ngawat nikalapatan. Ani erumor tolomasi kesi lowae lo alotooma noi a akai a Baal,

²⁶tolemut apir na italeunitoe ayei neni kinoma.

²⁷Sodi kinyasut kesi apir na italeunitoe ka akai a Baal, kitiliwosi akai ngina echoo. Eringa neni erai echoo tani tokona.

²⁸Eger ngolo ngesi atuborea Yeu akilip Baal anakwap a Ngisirael.

²⁹Nakaneni abu ngesi tosub akisech na ekoni na ekapolon alo anyaritae Yeroboam. Ariki kolong Yeroboam Ngisirael kisilip ngitak lu egolit lu etowei ngesi alo Besel ka Dan.

³⁰Abu Ekapolon Akuj tolimok Yeu tama, “Isubakinea iyong talokookeng a Aab ngakiro daang nakolong asaki ayong iyong tosubakinea kesi. Kotere ngakiro nguna, kechikakinit ayong iyong atamar eliworosi ngalesea kon ngikapolok a Isirael tanang nalesit na ngoomwon.”

³¹ Nakaneni nyiwapa Yeu etal a Ekapolon Akuj ana erai Akuj a Isirael, a etau keng kadaang. Pearai abu ngesi kiwap ekitetemes a Yeroboam alo elomakini Ngisirael nakisech.

³²Ngirwa ngulu, abu Ekapolon Akuj totubono ngiwaitin ngiche a akwap a Isirael. Abu ekapolon a Siria lo anyaritae Asael torem akwap a Ngisirael daang

³³na eyei kide Yorudan, tanang lowae lo alokuju lo eyei ere a Aroer, lo eyei nangolol a Arinon. Ayakasi ngakwapea a Gilead ka Bachan neni, na alomito ngitela a Gad, ka Reuben ta Kide Manase.

³⁴Ngakiro nache daang asubi Yeu, ka ngakiro na idodiunito atitinyu keng, igiritae nakitabea na enyaritae Ngakiro a Ngikapolok a Isirael.

³⁵Totoan ngesi tonukakinae Samaria. Abu Yeowaas lo arai lokookeng kilunyokin nados keng toliwor ekapolon.

³⁶Apolokinit Yeu Isirael alo Samaria a ngikaru a ngitomwon-arei ka ngikan-kauni.