Read turkana 2 Ngikapolok 11 Bible Online

2 Ngikapolok 11 - turkana bible

2 Ngikapolok 11

¹Ani napei ayenea Asalia na arai itiokeng a ekapolon Aasia atamar aar lokookeng, abu tolim atamar taarae ngitunga a awi a ekapolon daang.

²Lokookeng a Aasia lo anyaritae Yoach bon ngesi abu tosii. Adikino ngesi eario ka luche, nakaneni toyuu ngesi eyaakeng na anyaritae Yeocheba, na arai nakaatokeng a Aasia na aberu anache. Abu Yeocheba toriko Yoach ka aberu na adakit ngesi, kilomak namaniyat naperot alokai a Akuj. Kidaa Yeocheba ngesi ani eyei Asalia, sodi nyear ngesi.

³Kidaa Yeocheba edia ngolo alotooma akai a Akuj a ngikaru a ngikan-kapei, alu araakar Asalia akapolon a Yuda.

⁴Ani ekaru lo a ngikan-kaarei, abu Yeoyada lo arai emuron a Akuj tomea itwaan anyaraun ngikarikok lu aweikinito ngasigerea na eteete akapolon, ka ngasigerea na eteete akai a akapolon. Tolimok ngesi kesi atamar pot kai a Akuj. Kisikong ngesi kesi kaneni, kitacham ngakiro na atukit ngesi asubakin. Kidodik Yeoyada kesi Yoach lo arai lokookeng a Aasia.

⁵Todungok ngesi kesi ngakiro nugu tama, “Ani ipote esi akisub etich akolongit na Sabato, totiakas ngatiaket ngauni. Ejoikinit atiaket apei anikus itee akai a akapolon.

⁶Ejoikinit atiaket ache itee ekidor lo enyaritae ekidor a Sur. Towo atiaket nache kitee ekidor lo eyei naabor a ngiketeok aluche.

⁷Ngalooso naarei napalem ianganarete akolongit na Sabato, towaa iteete akai a Akuj, sodi tochoikis ekapolon.

⁸Kieto ekapolon Yoach itakito ngilengea, sodi kiruko ka ngesi awadaang anicha elosi. Itwaan cha daang ni eapuuni diyete keng, ejoikinit eario.”

⁹Apot ngikarikok a ngasigerea kiwapa ngakiro na adungunit Yeoyada, torikut ngitunga kech nia Yeoyada. Torikut lu asalito alotich ka lu aloose akisub etich akolongit na Sabato.

¹⁰Nak Yeoyada ngikarikok ngakwaaras ka ngaupwala na kolong araakasi ngaka ekapolon Daudi. Ekachakinitae ngiboro ngulu kai a Akuj.

¹¹Kitowo ngesi ngasigerea na atakito ngilengea alowae alo alongaren akai a Akuj, kiteeto ekapolon napei alowae alo alokuju akai tanang lowae loa alokwap, ta ngiwaitin a ekeno a ngakipeyos ka akai.

¹²Abu Yeoyada kipud Yoach nikalapatan kiwaak ekiraun nakou keng. Ani erumor nak akitab na igiritae ngitalio lu iwapi itwaan ni erai ekapolon a akwap. Apon Yoach kiwasakinae akimiet toliwor ekapolon. Tarama ngitunga ngakan kiremasi tamasi, “Kiboi ekapolon nikooyen!”

¹³Kiira akapolon Asalia echale lo achalatar ngasigerea ka ngitunga, sodi kikirikiraar kai a Akuj ni achunakina ngitunga.

¹⁴ Ani enangi neni, taanyunga ngesi ekapolon lo aringa eseunio ewei anapir ana akituk a akai a Akuj, loger lopalem sek ewaanar ekapolon kaneni. Eriamito ngesi ngikarikok a ngasigerea ka ngikakutak ngaburucho. Achalasi ngitunga daang imariteteete, tokusete ngaburucho. Tochilichili Asalia ngiworui keng ialolongi, kirema tama, “Erukoonu longeriet akapolon! Erukoonu!”

¹⁵Peasaki Yeoyada taarakinae Asalia diyete akai a Akuj. Abu ngesi tolimok ngikarikok a ngasigerea tama, “Kipudosi ngesi kane, yaasi kiding ngasigerea, sodi taara itwaan cha daang ni esaki ayuun ngesi.”

¹⁶Torwakinos kesi ngesi torikosi kai a ekapolon, sodi taara ngesi ani enyaritae ekidor a Angole.

¹⁷Abu emuron a Akuj lo anyaritae Yeoyada kilomak ekapolon Yoach ka ngitunga keng nakiro na achamunotor ka Ekapolon Akuj, toliworos kesi ngitunga a Ekapolon Akuj.

¹⁸Apot ngitunga tolomasi kai a Baal sodi toukosi Baal, tobwangabwangata kesi ngikenoi ka ngakujo nasubuna. Ani Matan, lo arai emuron a Baal, taara alongaren ngikenoi a ngakipeyos. Tolimok Yeoyada ngasigerea atamar kiteto akai a Akuj.

¹⁹Apot Yeoyada ka ngikarikok a ngasigerea ka ngasigerea na eteete ekapolon, ta ngasigerea na eteete akai a ekapolon, kitenasi ekapolon napei alokai a Akuj, tananga kai a ekapolon, iwapito ngitunga daang. Toloma Yoach kitor Lokidor Lokiteet, sodi kiboikin lokicholong a ekapolon.

²⁰Apot ngitunga daang talakaros noi, tongop echale alore ani aarere Asalia alokai a ekapolon.

²¹Toliwor Yoach ekapolon a Yuda eraakasi ngikaru keng ngikan-kaarei.