Read turkana 2 Ngikapolok 12 Bible Online

2 Ngikapolok 12 - turkana bible

2 Ngikapolok 12

¹Ekaru lo a ngikan-kaarei lo araakar Yeu ekapolon a Isirael, toliwor Yoach ekapolon a Yuda. Toliwor ngesi ekapolon alo Yerusalem a ngikaru a ngitomwon-omwon. Itiokeng na arai aka ere a Beer-cheba, anyaritae Sibia.

²Ngirwa lu ayarea Yoach daang, asubeene ngakiro na etalakarito Ekapolon Akuj kainyo etatami emuron Yeoyada ngesi.

³Nakaneni emam itwaan abu kinyasu ni elipitere ngakujo nagelayek. Apot ngitunga torubakis elemuununete ngakipeyos ka akinom emitina kaneni.

⁴Tanyarau Yoach ngimurok sodi todungok kesi atamar kidiatakis ngaropiyae na elemuununio kotere ngakipeyos a akai a Akuj. Araakasi ngaropiyae nguna na ngakipeyos ka na elemuununete ngitunga kotere ni esakitotor alemun.

⁵ Aweikinit emuron daang ngaropiyae na ayauniyete ngitunga lu asubi ngesi etich kech. Alemununio ngaropiyae nguna esaa cha daang lo esakere abongokin akiduk akai a Akuj.

⁶Nakaneni abu tanang ekaru lo a ngitomwon-arei ka nguuni lo araakar Yoach ekapolon, aringa ngimurok nyebongokino akiduk akai a Akuj.

⁷Sodi tanyarau ngesi Yeoyada ka ngimurok luche, kingit kesi tama, “Nyo peibongokinioto esi akiduk akai a Akuj? Napei tokona jik, nyiikachakis ngaropiyae na kiinakinio esi. Ejoikinit esi ipotonorete tobongonokinere akiduk akai a Akuj.”

⁸Apot ngimurok tachamut ngakiro nguna, tachamut tani abongokin akiduk akai a Akuj.

⁹Ani erumor tolem Yeoyada asaduku toped apukenit, sodi kiwaak asaduku ngina lokeno lo ipeyonokinere Akuj, alowae alo ibakit anakan ana aloteten, erai elomari itwaan kai a Akuj. Ngimurok lu asubete etich alokai a Akuj, apot kiwaakis nasaduku ngina ngaropiyae daang na alemuununete ngitunga lu apote akilip.

¹⁰Arai nacha epeneta ngaropiyae nakaalak nasaduku ngina, aponenete ekegiran a ekapolon ka emuron loapolon kimarut ngaropiyae nguna kiturakis lochuei.

¹¹Ani kigira kesi etiae lo itemokino kerumor, epotonorete kesi nakis ngitunga lu aweikinito etich alokai a Akuj, sodi tatacheta ngitunga lu adukete ngakito, ka ngikadukok luche,

¹²ka lua ngamoru, ka akigiel ngakito ka ngamoru na ebongonokinere akiduk akai a Akuj, ta akitach ngiboro lukooche daang.

¹³Nakaneni emam ngaropiyae nguna na apon togielere ngikopoi lukwangae kori ngatubwae nachukul, kori ngaburucho, kori ngiboro lukinoket ngataae, kori ngiboro cha luche daang a ngakwangae ka egolit.

¹⁴Apon ngaropiyae nguna daang tatachere ngikadukok ka agielea ngiboro daang lu adukere.

¹⁵Araakasi ngitunga lu asubete etich ngolo lu amunoi alotich kech. Kotere ngakiro nguna, emam itwaan engiseene kesi eger lo asubeta ngaropiyae etich.

¹⁶ Ngaropiyae na alemuununio eraakasi na ngakipeyos a atachanot ka na akisech, apon nyiiwaakin nasaduku. Araakasi ngaropiyae nguna ngaka ngimurok.

¹⁷Ngirwa ngulu, abu Asael lo arai ekapolon a Siria torem ere a Gas, tolema. Ani erumor tasak akirem Yerusalem.

¹⁸Tolem Yoach lo a arai ekapolon a Yuda ngakipeyos daang nakolong etaleunete ngikapolok toliworos ngaka Ekapolon Akuj. Ngikapolok ngulu kesi lusek engarenete ngesi, lu enyaritae Yeochapat, ka Yeoram ta Aasia. Kiatak Yoach ngakipeyos keng ni eyakasi ngakipeyos a ngikapolok kangulu, kimorik aapei ka egolit lo ayei kai a Akuj ka lo ayei kai a ekapolon. Sodi tomea ngesi ngitunga ayaar ngiboro ngulu daang nia Asael alo arai ekapolon a Siria. Apot Asael ka ngasigerea keng torotokis kimiekis Yerusalem nyeremo.

¹⁹Ngakiro nache daang na asubi ekapolon Yoach, igiritae nakitab na enyaritae Ngakiro a ngikapolok a Yuda.

²⁰Apot ngikapolok a Yoach luuchik tonyoikis ngesi. Taara kesi ngesi alokai ana ayei lowae lo imulelearitae ngalup alo kide Yerusalem, alorot alo elosere Sila.

²¹Yosakar lokookeng a Chimeas ka Yeosabad lokookeng a Chomer kesi aarakinete ngesi kai na ayei lowae lo alo kide Yerusalem. Tonukakinae Yoach nalielin a ngikapolok na eyakasi lore a Daudi. Kilunyokin lokookeng lo enyaritae Amasia nados keng toliwor ekapolon.