Read turkana 2 Ngikapolok 13 Bible Online

2 Ngikapolok 13 - turkana bible

2 Ngikapolok 13

¹Ekaru lo a ngitomwon-arei ka nguuni lo araakar Yoach lo arai lokookeng a Aasia ekapolon a Yuda, toliwor Yeowaas lo arai lokookeng a Yeu ekapolon a Isirael. Abu ngesi toliwor ekapolon alo Samaria a ngikaru a ngitomon ka ngikan-kaarei.

²Tosechak ngesi Ekapolon Akuj ka arikokin Ngisirael akisech, loger a Yeroboam alosek engareni ngesi. Nyepalikina ngesi akiwapit ngirotin keng luaronok.

³Sodi tongo Ekapolon Akuj kitilileta Ngisirael. Tachamak ngesi Asael lo arai ekapolon a Siria ka Benadad lo arai lokookeng, idwangeenete Ngisirael jiik.

⁴Sodi kilip Yeowaas Ekapolon Akuj. Ani ingolikini Ekapolon Akuj eger lo aboliar ekapolon a Siria Ngisirael niaronon, kiik akilipit a Yeowaas.

⁵Tomeu Ekapolon Akuj ekarikon nia Ngisirael, lo ayuuni kesi ani a Ngisiria. Sodi kiboyoto Ngisirael a ekisil loger lokolong sek ebooyoto ekingaren.

⁶Nakaneni apot kesi nyeepalikis ngasechesea nakolong arikokini kesi Yeroboam lo arai ekapolon a Isirael. Torubakis kesi jiik[15] esecheenete. Tani ekisikwaane a akuj anaberu anyaritae Achera, aringa eyei Samaria.

⁷Akidioko ngasigerea a Yeowaas na ejie edongito. Araakasi ngasigerea na adokito ngangolei ngatomwon-kan, ka ngaurukukui na irito ngangolei ngatomon ta ngasigerea na eloose a ngakejen ngabunge ngatomon, kainyo abu sek ekapolon a Siria tomunya nache daang, kipudaa loger a apua.

⁸Ngakiro nache daang asubi Yeowaas, ka ngakiro na idodiunito atitinyu keng, igiritae nakitab na enyaritae Ngakiro a ngikapolok a Isirael.

⁹Totoan ngesi tonukakinae Samaria. Abu Yewach lo arai lokookeng kilunyokin nados keng toliwor ekapolon.

¹⁰Ekaru lo a ngitomwon-uni ka ngikan-kaarei lo araakar Yoach ekapolon a Yuda, toliwor Yewach ekapolon a Isirael. Toliwor ngesi ekapolon alo Samaria a ngikaru a ngitomon ka ngikan-kapei.

¹¹Tosechak ngesi dang Ekapolon Akuj sodi kiwap ekitetemes a Yeroboam, alo kolong arikokini Ngisirael akisech.

¹²Ngakiro nache daang asubi Yewach, ka atitinyu keng alojie alo etijio Amasia lo arai ekapolon a Yuda, igiritae nakitab na enyaritae Ngakiro a ngikapolok a Isirael.

¹³Totoan Yewach sodi tonukakinae nalielin a ngikapolok na eyakasi Samaria. Abu lokookeng lo anyaritae Yeroboam loa ngiarei kilunyokin nados keng toliwor ekapolon.

¹⁴ Todeakakin Elicha lo arai ekadwaran edeke lokaaran. Ani na aperio ngesi ekot akitu, tolot Yewach lo arai ekapolon a Ngisirael aanyun ngesi. Kikalou Yewach iute tama, “Iyong ngesi irai ekaikinan loationon a Ngisirael!”

¹⁵Todungok Elicha ngesi tama, “Yau akau ka ngimalea ngidi.” Tolem Yewach.

¹⁶Sodi tolimok Elicha ekapolon a Ngisirael tama, “Toting akau kirepak emal.” Kikok Yewach neni. Abu Elicha kidokok ngakan keng nakan a ekapolon.

¹⁷Ani erumor tangaa epuke a akai lo ingoliarit Siria, loger lo alimokinitor ekadwaran. Todungok Elicha ngesi tama, “Toguma emal!” Ani napei agumarea ekapolon emal, tolim Elicha tama, “Iyong irai emal a Ekapolon Akuj, lo idwangea ngesi Ngisiria. Itiji iyong Ngisiria alo Apek kidwang kesi.”

¹⁸Ani erumor tolimok Elicha ekapolon atamar tolem ngimalea luche taramea ngalup. Taram ekapolon ngalup ngaramet ngauni ani erumor kimiek.

¹⁹Kitongoa Elicha ngakiro nguna sodi tolimok ekapolon tama, “Ajoikinit iyong irami ngaramet ngakan kori ngakan-kapei, sodi kidwang Ngisiria jik. Nakaneni eliwor tokona idwangi iyong kesi ngakidwanget ngauni make.”

²⁰Totoan Elicha sodi tonukae. Ekaru daang aponenete ngajorei a Ngimoab akirem akwap a Ngisirael.

²¹Akolongit apei na asakere akinuk itwaan, apon taanyungarae apei a ngajorei kanguna. Apot ngitunga tachakakis itwaan nikatoan ngini naliel a Elicha, tamataros kesi.[16] Ani napei atapea akwaan a itwaan anikatoan kangini ngakoyo a Elicha, toyaru itwaan ngini towo.

²²Ekapolon a Siria lo anyaritae Asael, aboliar Ngisirael ngirwa daang lu araakar Yeowaas ekapolon.

²³Nakaneni apatana Ekapolon Akuj anikech arai loa ngisien. Nyimiekina Ekapolon Akuj kesi emunyario, pearai abu kingarak kesi kotere achamunet nakolong achamakin ngesi ka Aburaam, ka Isaka, ta Yakobo. Eringa ngesi nyitwarakina kesi anikeng tani tokona.

²⁴Ani etoani Asael lo arai ekapolon a Siria, toliwor Benadad lo arai lokookeng ekapolon.

²⁵Sodi kidwang Yewach lo arai ekapolon a Isirael ekapolon a Siria lo anyaritae Benadad ngakidwanget ngauni sodi tobuu ngirerea lukolong alemarit Benadad ngirwa lu araakar Yeowaas lo arai apakeng ekapolon.