Read turkana 2 Ngikapolok 14 Bible Online

2 Ngikapolok 14 - turkana bible

2 Ngikapolok 14

¹Ekaru lo a ngiarei lo araakar Yewach lo arai lokookeng a Yeowaas ekapolon a Isirael, abu Amasia lo arai lokookeng a Yoach toliwor ekapolon a Yuda,

²eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomwon-arei ka ngikan-koomwon. Anyaritae itiokeng Yewadin, na arai aka ere a Yerusalem.

³Asubi ngesi ngakiro na ejoikinito Ekapolon Akuj, nakaneni nyesuba naajokak noi loger a Daudi alo arai apakeng longorot. Pearai asubi ngesi nasek asubi Yewach lo arai apakeng.

⁴Nyebwangabwangaara ngesi ni ilipitere ngakujo nagelayek. Nakaneni torubakis ngitunga elemuununete ngakipeyos ka akinom emitina kaneni.

⁵Ani napei esikokinor Amasia anapolou keng, abu taar ngikarikok a ngasigerea daang lukolong aarete apakeng lo arai ekapolon.

⁶ Nakaneni nyeara ngesi ngide kech, pearai abu kiwap ngakiro nasek adunguni Ekapolon Akuj alotal a Musa kona, “Nyeario ngide kotere akisech a ngikauriak kech. Eario itwaan kotere akisech na asubi ngesi ilope.”

⁷Taar Amasia ngasigerea a Ngiedomae ngabunge ngatomon anadipo a Amakat. Torem ngesi ere a Sela tolema, tolimok ekiro be Yokiseel. Ekiro ngolo eringa erai ekeng tani tokona.

⁸Sodi tomea Amasia ngitunga nia Yewach alo arai ekapolon a Isirael, ebenyi ngesi esaki ejie.[17]

⁹Nakaneni tomea ekapolon Yewach ngitunga alimokin ngesi kona, “Ayei kolong eregae lo a ngimoru a Lebanon, lo abala tolimokisi echekereng kona, ‘Kipoto nakookon kiut lokookang.’ Kitoru etiengit a moding neni kipudaa eregae ngolo.

¹⁰Tokona bocha Amasia, idwang iyong Ngiedomae inisakin. Kimiek ekipur ngolo kitemokin iyong sodi kiboikin nawi kon. Nyo tokona ikurio iyong ngichan lu eyaunete ngakiro naaronok nikon ka ngitunga kon?”

¹¹Nakaneni towou Amasia akiirar ngakiro nguna. Sodi tonyout ekapolon Yewach ka ngasigerea keng kitijwoto ngesi alo Yuda, ani enyaritae Bes Chemech.

¹²Kidwangae ngasigerea a Amasia kipungaros daang toloto nawiyei kech.

¹³Kirum Yewach Amasia toen. Tolot ngesi Yerusalem touko awas a ere napei alokidor a Epiraim tanang lokidor lo Ekeli, arai aoyau ani aukori ngesi ngamitae esibit ngaarei.

¹⁴Tolema ngesi ngasua nakwangae ka egolit daang lo ariamuni kaneni. Tolema tani ngiboro lu akai a Akuj daang ta ngaropiyae daang na ayakasi kai a ekapolon, yaa daang Samaria. Torik ngesi tani ngirikon.

¹⁵Ngakiro nache daang asubi Yewach, ka atitinyu keng na etijio ngesi Amasia lo arai ekapolon a Yuda, igiritae nakitab na enyaritae Ngakiro a ngikapolok a Isirael.

¹⁶Totoan Yewach tonukakinae nalielin a ngikapolok na eyakasi Samaria. Abu Yeroboam lo a ngiarei kilunyokin nados keng toliwor ekapolon.

¹⁷Kiboi Amasia lo arai ekapolon a Yuda ngikaru ngitomon ka ngikan ketoana Yewach lo arai ekapolon a Isirael kerumor.

¹⁸Ngakiro nache daang asubi Amasia, igiritae nakitab na enyaritae Ngakiro a Ngikapolok a Yuda.

¹⁹Totukoe alo Yerusalem atamar eario Amasia. Sodi todok ngesi toten lore a Lakich. Apot ngimoe keng kiwapiasi ngesi kaina taara.

²⁰Kiwokunae akwaan keng a angole yaunae Yerusalem, sodi tonukakinae nalielin a ngikapolok na eyakasi lore a Daudi.

²¹Apot ngitunga a Yuda kitiliwosi Usia lo arai lokookeng a Amasia ekapolon. Araakasi ngikaru a Usia ngitomon ka ngikan-kapei.

²²Kidwang Usia ngitunga a ere a Elas ketoana apakeng kerumor. Toduk ngesi nabo ere a Elas.

²³Ekaru lo a ngitomon ka ngikan lo araakar Amasia lo arai lokookeng a Yoach ekapolon a Yuda, abu Yeroboam lo arai lokookeng a Yewach toliwor ekapolon a Isirael. Toliwor ngesi ekapolon alo Samaria a ngikaru a ngitomwon-omwon ka epei.

²⁴Tosechak ngesi Ekapolon Akuj, kiwap ekitetemes loaronon a ekapolon Yeroboam alo arai lokookeng a Nebat, alo arikokini Ngisirael akisech.

²⁵ Abu ngesi torem nabo akwap daang nakolong sek arai aka Ngisirael, tolema napei anapak a Amas alowae alo alokwap, tanang nanam a Amakat alowae alo alokuju. Ngakiro nguna kesi nasek alimuni Ekapolon Akuj na erai Akuj a Ngisirael, kisitoru lokasuban etich keng ekadwaran Yona lo arai lokookeng a Amitai. Arai Yona itwaan ni abunit alo Gas Eper.

²⁶Taanyunga Ekapolon Akuj eger lo aboliare Ngisirael niaronon noi. Amam itwaan tani ipei nikengarakinan kesi.

²⁷Nakaneni peasaki Ekapolon Akuj amunyar Ngisirael anakwap, kotere ngakiro nguna, abu ngesi kitoru nia Yeroboam alo ngiarei toyuu kesi.

²⁸Ngakiro nache daang asubi Yeroboam lo a ngiarei, ka atitinyu keng alojie, ka eger lo abuakinea Damasko ka Amas nia Isirael,[18] igiritae daang nakitab na enyaritae Ngakiro a ngikapolok a Isirael.

²⁹Totoan Yeroboam tonukakinae nalielin a ngikapolok. Abu Sekaria lo arai lokookeng kilunyokin nados keng toliwor ekapolon.