Read turkana 2 Ngikapolok 15 Bible Online

2 Ngikapolok 15 - turkana bible

2 Ngikapolok 15

¹Ekaru lo a ngitomwon-arei ka ngikan-kaarei lo araakar Yeroboam lo a ngiarei ekapolon a Isirael, abu Usia lo arai lokookeng a Amasia toliwor ekapolon a Yuda

²eraakasi ngikaru keng ngitomon ka ngikan-kapei. Toliwor ngesi ekapolon alo Yerusalem a ngikaru a ngitomwon-kan ka ngiarei. Anyaritae itiokeng Yekolia, na arai aka ere a Yerusalem.

³Kiwap Usia ekitetemes a apakeng, tosub ngakiro na ajoikinito Ekapolon Akuj.

⁴Nakaneni apon kimiekinae ni ilipitotor ngitunga ngakujo nagelayek nyinyasuna. Arubakinito tani ngitunga elemuununete ngakipeyos ka akinom emitina kaneni.

⁵Kititing Ekapolon Akuj Usia enomokere lo erukete ka ngesi ngirwa daang lu ayarea. Kipakar ngesi topereene kai na arai akeng bon, toisik akisub ngitichisio luche daang, toliwor lokookeng Yosam epolokinit akwap.

⁶Ngakiro nache daang asubi Usia igiritae nakitab na enyaritae Ngakiro a Ngikapolok a Yuda.

⁷ Totoan Usia tonukakinae nalielin a ngikapolok na eyakasi lore a Daudi. Abu Yosam lo arai lokookeng kilunyokin nados keng toliwor ekapolon.

⁸Ekaru lo a ngitomwon-uni ka ngikan-kauni lo araakar Usia ekapolon a Yuda, abu Sekaria lo arai lokookeng a Yeroboam alo a ngiarei toliwor ekapolon a Isirael. Toliwor ngesi ekapolon alo Samaria a ngilapio a ngikan-kapei.

⁹Tosechak ngesi Ekapolon Akuj loger a ngikapolok aluche sek engarenete ngesi. Kiwap ngesi ekitetemes loaronon a ekapolon Yeroboam alo arai lokookeng a Nebat, alo arikokini Ngisirael akisech.

¹⁰Abu Chalum lo arai lokookeng a Yabech tonyoik ekapolon Sekaria, taar alo Ibileam,[19] sodi kilunyokin nados keng toliwor ekapolon.

¹¹Ngakiro nache daang asubi Sekaria, igiritae nakitab na enyaritae Ngakiro a Ngikapolok a Isirael.

¹² Eger ngolo ngesi eyookinor akichikakinet nakolong echikakini Ekapolon Akuj ekapolon Yeu ebala, “Eliworosi ngalesea kon ngikapolok a Isirael tanang nalesit na ngoomwon.”[20]

¹³Ekaru lo a ngitomwon-uni ka ngikan-koomwon lo araakar Usia ekapolon a Yuda, toliwor Chalum lo arai lokookeng a Yabech ekapolon a Isirael. Topolok ngesi Samaria a elap a epei.

¹⁴Tonyou Menaem lo arai lokookeng a Gadi alo Tirisa tanang Samaria, taar Chalum ani erumor kilunyokin nados keng toliwor ekapolon.

¹⁵Ngakiro nache daang asubi Chalum, ka eger lo atukio ngesi akiar ekapolon, igiritae nakitab na enyaritae Ngakiro a Ngikapolok a Isirael.

¹⁶Ani enyouni Menaem alo Tirisa, kinyasu ere a Tapua[21] ka ngitunga a ere kangolo ta ngakwapea na edunyatar, kainyo awounete ngitunga a ere kangolo angaar ekidor a ere. Abu ngesi tani topuwono ngakokies a ngaberu ana apotiyete.

¹⁷Ekaru lo a ngitomwon-uni ka ngikan-koomwon lo araakar Usia ekapolon a Yuda, abu Menaem lo arai lokookeng a Gadi toliwor ekapolon a Isirael. Toliwor ngesi ekapolon alo Samaria a ngikaru a ngitomon.

¹⁸Tosechak ngesi Ekapolon Akuj. Ngirwa daang lu ayarea ngesi, ewapit loaronon a ekapolon Yeroboam alo arai lokookeng a Nebat, lo arikokini Ngisirael akisech tanang ngirwa lu atoanea ngesi.

¹⁹Tigilas Pileser lo arai ekapolon a Asiria, abu torem akwap a Ngisirael. Nak Menaem ngesi ngakiloi ngabunge ngatomwon-uni ka ngoomwon a ngasua anakwangae esaki Tigilas Pileser kingarak ngesi topolokinio ngiwaitin daang a akwap lokojokon.

²⁰Kidiau Menaem ngaropiyae alokabarak a akwap a Isirael, kitingak ipei kech daang adekun ngaropiyae ngatomwon-kan. Sodi torotok Tigilas Pileser anakwap kangina, tobongo nakwap keng.

²¹Ngakiro nache daang asubi Menaem, igiritae nakitab na enyaritae Ngakiro a Ngikapolok a Isirael.

²²Totoan ngesi sodi tonukae. Abu Pekaya lo arai lokookeng kilunyokin nados keng toliwor ekapolon.

²³Ekaru lo a ngitomwon-kan lo araakar Usia ekapolon a Yuda, abu Pekaya lo arai lokookeng a Menaem toliwor ekapolon a Isirael. Toliwor ngesi ekapolon alo Samaria a ngikaru a ngiarei.

²⁴Tosechak ngesi Ekapolon Akuj kiwap ekitetemes loaronon a Yeroboam alo arai lokookeng a Nebat, alo arikokini Ngisirael akisech.

²⁵Peka lo arai lokookeng a Remalia, apot ka ngitunga ngitomwon-kan lu aponito alo Gilead totuko akiar Pekaya. Taara kesi Pekaya animaniyat ani eyei tooma akai a ekapolon, alo Samaria. Kilunyokin Peka nados a Pekaya toliwor ekapolon.

²⁶Ngakiro nache daang asubi Pekaya, igiritae nakitab na enyaritae Ngakiro a Ngikapolok a Isirael.

²⁷Ekaru lo a ngitomwon-kan ka ngiarei lo araakar Usia ekapolon a Yuda, abu Peka lo arai lokookeng a Remalia toliwor ekapolon a Isirael. Toliwor ngesi ekapolon alo Samaria a ngikaru a ngitomwon-arei.

²⁸Tosechak ngesi Ekapolon Akuj, kiwap ekitetemes loaronon a ekapolon Yeroboam alo arai lokookeng a Nebat, alo arikokini Ngisirael akisech.

²⁹Ngirwa lu araakar Peka ekapolon, Tigilas Pileser lo arai ekapolon a Asiria, abu torem ngirerea a Ijon, ka Abel Bes Maaka, ka Yanoa, ka Kedech, ka Asor ta ngakwapea nabe ta Gilead, ka Galilaya ta Naputal. Toriko ngesi ngitunga nakwap a Asiria toliworos ngirikon.

³⁰Ekaru lo a ngitomwon-arei lo araakar Yosam lo arai lokookeng a Usia ekapolon a Yuda, abu Ochea lo arai lokookeng a Ela totuk akiar Peka. Taar ngesi sodi kilunyokin nados keng toliwor ekapolon.

³¹Ngakiro nache daang asubi Peka, igiritae nakitab na enyaritae Ngakiro a Ngikapolok a Isirael.

³²Ekaru lo a ngiarei lo araakar Peka lo arai lokookeng a Remalia ekapolon a Isirael, abu Yosam lo arai lokookeng a Usia toliwor ekapolon a Yuda

³³eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomon ka ngikan-kapei. Yerucha nakookeng a Sadok ngesi arai itiokeng.

³⁴Tosub Yosam ngakiro na ajoikinito Ekapolon Akuj, ani ewapitor ekitetemes a apakeng.

³⁵Nakaneni emam itwaan abu kinyasu ni ilipitere ngakujo nagelayek. Apot ngitunga torubakis elemuununete ngakipeyos ka akinom emitina kaneni. Yosam ngesi aduki ekidor loa lokwap akai a Akuj.

³⁶Ngakiro nache daang asubi Yosam, igiritae nakitab na enyaritae Ngakiro a Ngikapolok a Yuda.

³⁷Ngirwa lu araakar ngesi ekapolon, kesi esiaunea Ekapolon Akuj tomea ekapolon Resin lo a Siria, ka ekapolon Peka lo a Isirael, esaki toremo Yuda.

³⁸Totoan Yosam sodi tonukakinae nalielin a ngikapolok na eyakasi lore a Daudi. Kilunyokin lokookeng Aas nados keng toliwor ekapolon.