Read turkana 2 Ngikapolok 16 Bible Online

2 Ngikapolok 16 - turkana bible

2 Ngikapolok 16

¹Ekaru lo a ngitomon ka ngikan-kaarei lo araakar Peka lo arai lokookeng a Remalia ekapolon a Isirael, abu Aas lo arai lokookeng a Yosam toliwor ekapolon a Yuda

²eraakasi ngikaru keng ngitomwon-arei. Toliwor ngesi ekapolon alo Yerusalem a ngikaru a ngitomon ka ngikan-kapei. Nyiwapa ngesi ekitetemes loajokon a ekapolon Daudi alo arai apaakeng longorot. Nyesuba ngesi ngakiro na ejoikinito Ekapolon Akuj na erai Akuj keng.

³Kiwap ngesi ekitetemes a ngikapolok a Isirael. Abu ngesi tani tolem lokookeng toliwor akipeyos na ipeyokinio akuj nasubuna. Ewapi ngesi eboyor lokikadakini a ngitunga alu kolong etwarakini Ekapolon Akuj anakwap ngirwa lu alooso Ngisirael ngaren.

⁴ Tolem Aas ngakipeyos ka emitina lo inomio ani ilipitere ngakujo nagelayek, ka ngimukur, ta kwap ngikito lua ngitorubei.

⁵Apot Resin lo arai ekapolon a Siria ka Peka lo arai ekapolon a Isirael toremo Yerusalem kiriama. Nakaneni abu Aas kidwang kesi. (

⁶Esaa lopei ngolo, tolema nabo ekapolon a Edom[22] ere a Elas topolok. Kitwarak ngesi ngitunga a Yuda lu alomito neni. Toloma Ngiedomae Elas, eringa elomito neni tani tokona.)

⁷Tomea Aas ngitunga nia Tigilas Pileser, lo arai ekapolon a Asiria, ebala, “Arai ayong ekasuban etich kon lo arai lokookon. Bua toyuunae ayong ani a ekapolon a Siria ka Isirael, alu ketijiete ayong.”

⁸Tolem Aas ngakwangae ka egolit alokai a Ekapolon Akuj, ta ngaropiyae na akai a ekapolon, tomea ngitunga yaasi ngainakinet nguna nia Tigilas Pileser, alo arai ekapolon a Asiria.

⁹Kiik Tigilas Pileser ngakiro a Aas, tonyout ka ngasigerea keng kitijikis Damasko tolemasi. Taar Resin lo arai ekapolon sodi kirumiya ngitunga toriko nibe Kir eraakasi ngirikon.

¹⁰Ani elosi ekapolon Aas Damasko aanyun ka ekapolon Tigilas Pileser, taanyunga ngesi ekeno a ngakipeyos kaneni. Tolem Aas ekisikwaane a ekeno kangolo nak ngitunga yaasi nia Uria alo arai emuron a Akuj. Edodiunitae ibore ni eyei lokeno ngolo daang, alokisikwaane kangolo.

¹¹Sodi todukok Uria ekeno lo ekwaan ka ngolo per, torumo eringa Aas nyebonguno.

¹²Ani ebonguni Aas alo Damasko, kingolik atamar kerumor ekeno.

¹³Sodi kinom ngesi ngakipeyos a ngibaren ka na ngalemet alokeno kangolo, kidokak ngakipeyos a emuna ta ngaakot a ngakipeyos a ekisil, kidiama nakipeyos nguna.

¹⁴Ekeno lo asuat ananyang lo etalekinitoe Ekapolon Akuj, ayei kiding ekeno lokitetet ka akai a Akuj. Sodi kisiyotoo Aas kiwaak lowae lo alokwap ekeno keng lokitetet.

¹⁵Ani erumor todungok ngesi Uria tama, “Ekeno kang loapolon logo, toliwor ngesi ipeyoeneo iyong ngakipeyos na inomio nataparach ta ngakipeyos a ngalemet naka ebong. Toliwor eka ngakipeyos ana inomio ka na ngalemet a ekapolon ka ngitunga kang ta ngakipeyos a ngitunga na emuna. Tobukok lokeno ngolo ngaakot a ngibaren kadaang alu ipeyeo. Nakaneni eliwor ekeno lo a ngasua ananyangayek ngesi engituununea ayong ngakiro na esaki Ekapolon Akuj.”

¹⁶ Tosubak Uria nguna adungokini ekapolon.

¹⁷Kielaelaa ekapolon Aas ngiurukukui lua ngasua ananyangayek na ayakasi kai a Akuj, tolemasi ngategerin na ayakasi kidiama kech. Tolema ngesi tani atanki a asuat ananyang anaaborin a ngimongin alutomon ka ngiarei a ngasua ananyangayek. Kiwaak ngesi atanki ngina ni adukunitoe a amoru.

¹⁸Ani kona asakea ngesi akitalakar ekapolon a Asiria, tolema Aas nipalem ikeuna ni iboyonokin ekapolon alokai a Akuj. Togol tani ekidor lopalem erai ekapolon bon itoreene elosi kai a Akuj.

¹⁹Ngakiro nache daang asubi Aas, igiritae nakitab na enyaritae Ngakiro a ngikapolok a Yuda.

²⁰ Totoan Aas sodi tonukakinae nalielin a ngikapolok na eyakasi lore a Daudi. Kilunyokin lokookeng lo anyaritae Esekia nados keng toliwor ekapolon.