Read turkana 2 Ngikapolok 17 Bible Online

2 Ngikapolok 17 - turkana bible

2 Ngikapolok 17

¹Ekaru lo a ngitomon ka ngiarei lo araakar Aas ekapolon a Yuda, abu Ochea lo arai lokookeng a Ela toliwor ekapolon a Isirael. Toliwor ngesi ekapolon alo Samaria a ngikaru a ngikan-koomwon.

²Tosechak ngesi Ekapolon Akuj, nakaneni peasechit ngesi loger a ngikapolok alu kolong sek apolokinito Ngisirael.

³Kitiji ekapolon a Siria lo anyaritae Chalimaneser ngesi. Tacham Ochea Chalimaneser eweikini ngesi, toliwor ebukonokini echur ekaru daang.

⁴Nakaneni tomea Ochea ngitunga nia So alo arai ekapolon a Misiri,[23] esaki kingarak ngesi. Towou Ochea abukokin ekapolon a Asiria echur lopalem ebukonokini ekaru daang. Ani iirari Chalimaneser ngakiro nguna, abu kisurum Ochea ngitunga toinikis lojela.

⁵Sodi torem Chalimaneser akwap a Isirael, kiriama ngasigerea keng Samaria. Ekaru lo a nguuni eriemitere ere,

⁶tolema ekapolon a Asiria[24] Samaria. Toriko ngesi Ngisirael toloto Asiria eraakasi ngirikon, sodi kitolom ngiche kech lore lo enyaritae Ala, kitolom ngiche diyete angolol a Abor na eyei nakwap a Gosan, sodi kitolom nabo ngiche lorerea a Media. Arai ekaru ngolo lo a ngikan-koomwon lo araakar Ochea ekapolon.

⁷Asubakinosi ngakiro nguna kainyo asechakinete Ngisirael Ekapolon Akuj na erai Akuj kech. Akuj ngina ngesi nakolong ayuuni kesi alokapolon a Misiri, kipud kesi alo Misiri. Elipito kesi ngakujo ngache,

⁸kiwapa ngitalio a ngitunga alu kolong etwarakini ngesi na alooso ngitunga keng ngaren. Apot kesi kiwapa tani ngitalio lu erokunete ngikapolok a Isirael.

⁹Tosuba Ngisirael ngakiro na angerit Ekapolon Akuj. Alorerea kech kadaang, toduko kesi ni ilipeta ngakujo nagelayek, napei anadakar anaachi, tanang lore loapolon.

¹⁰Alokidiama ngimoru ka kwap ngikito lua ngitorubei, kiwaakis ngapirio a ngamoru, ka ngakisikwaanet a akuj kech anaberu enyaritae Achera.

¹¹Kinoma kesi emitina alokenoi kadaang alu elipitere ngakujo nagelayek, iwapito ngitalio a ngitunga alu kolong etwarakini Ekapolon Akuj anakwap. Kitongoa kesi Ekapolon Akuj kitilileta kotere eboyor kech loaronon.

¹² Tongero tani etal lo adungunit Ekapolon Akuj atamar nyiilipa ngakujo nasubuna.

¹³Tomea Ekapolon Akuj ngimeanara ka ngikadwarak keng akichikichik Ngisirael ka ngitunga a Yuda ebala, “Toisikisi ngirotin kus luaronok, kiwapa ngakiro na adungunit ayong na eyakasi lotal lokolong etaanyuni ayong taapaakus lungorok, sodi nabo ayau nikus kitoru nia ngikasubak etich kang lu eraakasi ngikadwarak.”

¹⁴Nakaneni nyiwapa Ngisirael ka ngitunga a Yuda ngakiro nguna. Echanaka kesi loger kata apaakech alu kolong awounete amuno Ekapolon Akuj na erai Akuj kech.

¹⁵Awounete kesi akiwap ngakiro keng. Towout tani akirichakin achamunet nakolong achamakin Akuj ka taapaa kech. Nyemisikina kesi ngakiro na echikakini ngesi kesi. Kilipa kesi ngakujo nasubuna napasiek, sodi toliworos kesi dang ngikulepek ngipasiek. Kiwapa kesi ngitalio a ngibukui alu edunyasi ka kesi, nyiwapa ngakiro na adungokinit Ekapolon Akuj kesi ebala nyiirokosi ngakiro kech.

¹⁶Tosecha kesi ngitalio daang a Ekapolon Akuj ana erai Akuj kech, tosubakis ngitak a ngasua ngiarei kilipa. Tosubakis tani ekisikwaane a akuj anaberu enyaritae Achera. Elipito kesi ngikanyer, ka akuj nabe Baal.

¹⁷Alemanakinete kesi ngakujo nagelayek talokookech ka tanakookech toliworos ngakipeyos na inomio. Aloseenete kesi lomurok ka ngikasubak, toliworos jik esubete ngakiro na etee Ekapolon Akuj atamar eroko. Kitongoa kesi Ekapolon Akuj kitilileta kotere ngakiro nguna.

¹⁸ Tongoik Ekapolon Akuj Ngisirael kitwarak kesi alongaren keng. Emam kesi lu apot kidongo mati ekitela a Yuda bon.

¹⁹Nakaneni nyiwapa tani ngitunga a ekitela a Yuda ngitalio a Ekapolon Akuj ana erai Akuj kech. Apot kesi kisisata ngitalio lu erokunete Ngisirael.

²⁰Tonger Ekapolon Akuj Ngisirael daang, kirira kesi ka akipotor nak ngimoe luaronok, tanang itwarakini kesi daang alongaren keng.

²¹Ani ketiak Ekapolon Akuj Ngisirael ka ngitunga a Yuda kerumor, kitiliwosi Ngisirael Yeroboam lo arai lokookeng a Nebat ekapolon kech. Kitiisik Yeroboam kesi Ekapolon Akuj sodi torikok kesi ngasechesea naaronok.

²²Kiwapa kesi ngakiro a Yeroboam, torubakis esubete ngasechesea daang na asubi ngesi,

²³tanang Ekapolon Akuj itwarakini kesi daang alongaren keng loger losek echikichikea kesi ani a ngikasubak etich keng alu araakasi ngikadwarak atamar ekokini neni. Apon Ngisirael torikoe Asiria, ni eringa eyakasi tani tokona.

²⁴Abu ekapolon a Asiria kitonyou ngitunga alorerea a Babilon ka Kus, ka Ipa, ka Amas, ta Separipaim, sodi kitolom lorerea a Samaria,[25] kilunyokinos nikolong ayakasi Ngisirael lu arikio. Tolemasi kesi ngirerea toloma neni.

²⁵Ngirwa lu esiauneta kesi akilom neni, nyilipa kesi Ekapolon Akuj. Kotere ngakiro nguna, tomeu Ekapolon Akuj ngingatunyo taara kesi ngiche.

²⁶Tolimokinae ekapolon a Asiria kona, “Ngitunga lu kolong itolomi iyong lorerea a Samaria, nyeyenete etal a akuj a akwap kangina. Kotere ngakiro nguna, ameu akuj ngina ngingatunyo alomakis akiar kesi.”

²⁷Sodi todungok ekapolon kesi tama, “Tobuasi emuron epei ani eya lu ngoon kirikuni ngoni alu eenitae. Tolimokisi ngesi[26] atamar tobongo tolom inaa, sodi kitatam ngitunga etal a akuj a akwap kangina.”

²⁸Abu emuron a Akuj lo arai Esiraelit losek arikorio alo Samaria, tolot tolom Besel, ni etatamea ngitunga eger lokilipet Ekapolon Akuj.

²⁹Nakaneni apot ngitunga lu alomito Samaria torubakis esubete ngakujo nasubuna na araakasi ngakech a ngikulepek. Kiwaakis kesi lokenoi lu adukete Ngisirael lukipeyonokinet ngakujo nagelayek. Tosubakis ngajorei nagelagelae ngakujo nasubuna alorerea alu alomito kesi.

³⁰Tosubakis ngitunga a Babilon akuj nasubuna na anyaritae Sukos Benos. Tosubakis lua Kus akuj nasubuna a na anyaritae Nerigal, lua Amas, tosubakis akuj na anyaritae Achima,

³¹lua Ipa, tosubakis akuj nasubuna na anyaritae Nibias ka Taritak, ani lua Separipaim, tolemut ngide kech eraakasi ngakipeyos na inomio, topeikis ngakujo kech na enyaritae Adiramelek ka Anamelek.

³²Elipito nabo ngitunga lupei ngulu Ekapolon Akuj, toseut alokiding kech ngitunga lugelagelae toliworos ngimurok lu ipeyoenete ngakipeyos alokenoi alu ayakasi kidiama ngimukur.

³³ Sodi kilipa kesi Ekapolon Akuj, nakaneni kilipa tani ngakujo kech a ngikulepek iwapap ka eger a ngitalio a ngakujo ana ngakwapea ana kolong aponeta kesi.

³⁴Eringa kesi iwapito ngitalio lukolong ngorok tani tokona. Nyilipito kesi Ekapolon Akuj kori nyiwapito ngakitatamet, ka ngakiro, ta ngitalio lukolong adungokini ngesi ngalesea a Yakobo, lo alimokini ngesi ekiro lo enyaritae Isirael.

³⁵Achamakin kesi ka Ekapolon Akuj sodi todungok Ekapolon Akuj kesi tama, “Nyiilipa ngakujo ngache. Nyiiriedikokis kesi tosuba etich kech, kori nyiipeyonokis kesi ngakipeyos.

³⁶Tokera ayong Ekapolon Akuj nakolong kepuduni esi alo Misiri a agogongu anaationon ka ngikilinga. Toriedikokinae ayong kipeyokis ngakipeyos.

³⁷Kirichakisi jiik akiwap ngakitatamet, ka ngakiro, ka ngitalio, ta ngakiro nakadungokini ayong esi. Nyiiwapa ngakujo ngache,

³⁸kori warasi nyikimuriak achamunet nakichamakin ayong ka esi. Nyiikera ngakujo nache.

³⁹Nakaneni tokerae ayong Ekapolon Akuj na arai Akuj kus, sodi katoyuu ayong esi ani eyakasi ngimoe kus daang.”

⁴⁰Nakaneni apot ngitunga ngulu towout akiirar ngakiro nguna. Torubakis kesi iwapito ngitalio kech lungorok.

⁴¹Apot ngibukui ngulu kilipa Ekapolon Akuj, ka ngakujo kech dang. Eringa tani tokona ngide kech ka ngalesea kech ilipito Ekapolon Akuj loger lopei ngolo.