Read turkana 2 Ngikapolok 18 Bible Online

2 Ngikapolok 18 - turkana bible

2 Ngikapolok 18

¹Ekaru lo a nguuni lo araakar Ochea lo arai lokookeng a Ela ekapolon a Isirael, toliwor Esekia lo arai lokookeng a Aas ekapolon a Yuda

²eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomwon-arei ka ngikan-koomwon. Abija nakookeng a Sekaria ngesi arai itiokeng.

³Kiwap ngesi ekitetemes a ekapolon Daudi, alo arai apaakeng longorot tosub ngakiro na ejoikinito Ekapolon Akuj.

⁴Kinyasu ngesi ni elipitere ngakujo nagelayek, tobwangabwanga ngikenoi lua ngamoru, ka atubutub ngakisikwaanet a akuj anaberu anyaritae Achera. Tobilibili ngesi tani emun lo asubunitae a asuat ananyang sek asubakini Musa, lo anyaritae Neuchitan. Napei kolong sek jik tanang akolongit ngina, enomeenete Ngisirael emitina erimasi ngesi.

⁵Amuno Esekia Ekapolon Akuj, na erai Akuj a Isirael. Nyeanyuna ngitunga a Yuda a ache ekapolon lo ekoni ngesi, nabo emam eche apot taanyut.

⁶Amuno ngesi Ekapolon Akuj, emam akwaar awounea akiwap ngakiro keng. Abu ngesi kirichak lokojokon ngakiro daang na kolong adungokini Ekapolon Akuj Musa.

⁷Abu Ekapolon Akuj kiruko ka ngesi, toliwor esubi ibore daang itemokino eriyan. Tonger ngesi ekapolon a Asiria epolokini ngesi, towou achamun ngakiro keng.

⁸ Kidwang ngesi Ngipilisti sodi torem ngirerea kech napei anadakar anaachi tanang lore loapolon. Torem tani Gasa ka ngirerea lu edunyatar.

⁹Ekaru lo a nguomwon lo araakar Esekia ekapolon, tarai ekaru lo arai lo a ngikan-kaarei lo araakar Ochea lokookeng a Ela ekapolon a Isirael, abu ekapolon a Asiria lo anyaritae Chalimaneser torem Ngisirael, kiriama ngasigerea keng Samaria.

¹⁰Ani ekaru lo a nguuni eriemitere, tolema ngesi Samaria. Arai ekaru lo a ngikan-kapei araakar Esekia ekapolon ngolo, tarai ekaru lo a ngikan-koomwon araakar Ochea ekapolon.

¹¹Toriko ekapolon a Asiria[27] Ngisirael nakwap keng eraakasi ngitunga lu aenitae. Kitolom ngiche lore a Ala, kitolom ngiche diyete angolol a Abor na eyei nakwap a Gosan, ani luche toloma lorerea a Media.

¹²Toukor Samaria kainyo awounete Ngisirael akiwap ngakiro a Ekapolon Akuj ana erai Akuj kech. Nakaneni apot kesi kichwangakis achamunet nakolong achamakinosi ka kesi, tosecha ngitalio daang lukolong alimokini kesi Musa, lo arai ekasuban etich a Ekapolon Akuj. Towout kesi akiirar ka akiwap ngitalio ngulu.

¹³Ekaru lo a ngitomon ka nguomwon lo araakar Esekia ekapolon, abu Senakerib lo arai ekapolon a Asiria torem ngirerea a Yuda lu adukitoe ngawasea, sodi tolema.

¹⁴Tomea Esekia itwaan nia Senakerib, alo Lakich tolimok ngesi tama, “Asechit ayong. Kitowo kare ejie. Kainakini ayong iyong ibore daang ni isaki iyong.” Tolim ekapolon Senakerib atamar tolimokinae Esekia tolemik ngesi ngakiloi ngabunge ngatomon a akwangat ka ngakiloi abunget apei a egolit.

¹⁵Tolem Esekia akwangat daang a akai a Akuj ka na ayei lobari lo akai a ekapolon.

¹⁶Tadalachu ngesi tani egolit lo a ngidorin a akai a Akuj, ka losek abutakinit ngesi elope napirio a ekidor, sodi kipoto daang naarae ekapolon a Asiria.

¹⁷Tomea ekapolon a Asiria ngasigerea nakaalak alo Lakich toloto akitijwore Esekia alo Yerusalem. Ngikapolok lu atupito ngesi nguuni kesi araakasi ngikarikok a ngasigerea kanguna. Ani enangunete kesi Yerusalem, pena lorot lo edonyeenere ngiworui, ni eyei echilet lo eleleunitotor ngakipi anatapar ana alokuju.

¹⁸Apot kesi tomeasi itwaan anyarare Esekia. Pot ngitunga nguuni akisiriam kesi. Ngitunga ngulu kesi Eliakim lokookeng a Ilikia, lo aweikinit akai a ekapolon, ka Chebina lo arai ekegiran a ngikesio, ta Yoa lokookeng a Asapu lo aweikinit ekimar.

¹⁹Tolimok epei a ngikarikok a ngasigerea a Asiria kesi tama, “Tolimokisi Esekia kona, ‘Ebala ekapolon lo eyenikinitae, lo erai ekapolon a Asiria, nyooni mono igieno iyong?

²⁰Itamit iyong atamar itemunete ngakiro make ajwonu a ngasigerea ka ekileenu kech a? Ngae tokona igieno iyong, kingeritor ayong?

²¹Abe itamit iyong atamar kingarakinete ngitunga a akwap a Misiri, nakaneni ikoni ibore ngini alemun akasirimait kichogaa. Ebil akasirimait ngina torem akan kon. Ikoni ekapolon a Misiri neni kigienokin itwaan ngesi.’ ”

²²Torubak ekarikon a ngasigerea a Asiria ngolo iruoro ebala, “Kori robo isaki iyong alimokin ayong atamar igieno iyong Ekapolon Akuj na erai Akuj kon? Esekia ngesi enyasuni ngikenoi ka ni ipeyonokinere Ekapolon Akuj, na alimokinea ngitunga a Yuda ka Yerusalem atamar kilipa alokeno alo ipeyonokinere Akuj alo eyei Yerusalem bon.

²³Kibolokin ayong ka iyong alokiro a ekapolon a Asiria. Kamekini ayong iyong ngangolei ngabunge ngaarei erai kianyu iyong ngikiliok ngabunge ngaarei lu edokete tometa!

²⁴Kidwangi iyong tani ekarikon a ngasigerea a Asiria loochi lo nyeyenikinitae. Tani ikoni neni, abe eringa iyong isaki Ngimisiri tomeut ngaurukukui na irito ngangolei ka ngikadokak ngangolei nikon!

²⁵Esibit iyong aremit ayong akwap kon ketiji iyong pekengarakinit Ekapolon Akuj a? Ekapolon Akuj alope kalimokini ayong tama, ‘Tonyou torem akwap naga sodi kinyasu.’ ”

²⁶Apot Eliakim, ka Chebina, ta Yoa tolimokis ekarikon lo a ngasigerea a Asiria ngolo tamasi, “Ekapolon, kisuruoroe kare sua a Ngaramaik, kipupi sua. Nyiiruor Ngaeburaniae kainyo epupokinito ngitunga lu eyakasi nawas a ere daang.”

²⁷Tatachu ngesi tama, “Itamito esi atamar kameunit ayong ekapolon a Asiria nikus ka ekapolon kus bon, alimokin ngakiro nugu a? Mam jik. Esuruori ayong tani ngitunga lu edokito ngawasea, lu enyamete ngachin kech, tamata ngakul kech loger kus.”

²⁸Abu ekarikon a ngasigerea ngolo tonyou towo kirema a Ngaeburaniae tama, “Topupokisi ngakiro a ekapolon alo eyenikinitae, alo erai ekapolon a Asiria!

²⁹Ebala ekapolon kona, ‘Warasi Esekia nyikingal, nyikiyuuni ngesi esi.

³⁰Warasi nyiichamut ngesi kimaimai esi kigienokinos Ekapolon Akuj. Nyiitamasi kori kiyuuni esi Ekapolon Akuj. Nyiitamasi tani nabo kori iratakini ngesi ngasigerea nakosi a Asiria nyeelemasi ere kus.’

³¹Nyiirasi ngakiro a Esekia. Kidungokinit esi ekapolon a Asiria atamar topudutu alore esila, toliworos ngitunga kang. Kichamakinio esi inyamete ngamusabib alokito a ngimusabib alu eraakasi ngikus a ngikulepek. Tanyama ngameyana alomeyana alu eraakasi ngikus a ngikulepek, sodi nabo tamata ngakipi anakare ana eraakasi ngakus a ngikulepek.

³²Tanang abuni ayong katoriko esi ketolom nakwap na ikwaan ka nakus. Eyakasi akwap ngina ngamanat a ngimusabib alu epureenere emuna, toyakas ngakiria na ipoore ngamugati. Erai akwap na eyakasi ngikito a akimiet, ka akimiet, ta akimiet a ao. Ani kisubakis esi na edungunit ngesi, nyitoakete esi, pearai iyarete. Warasi Esekia nyikingal esi ani ebalar, ‘Kiyuuni ngoni Ekapolon Akuj.’

³³Apot kolong sek ngakujo a ngibukui aluche toyuut ngakwapea kech alokapolon a Asiria a?

³⁴Nyaanu tokona ngakujo a Amas ka Aripad? Nyaanu ngakujo a Separipaim, ka Ena ta Ipa? Eyei kolong itwaan abu toyuu Samaria a?

³⁵Ori kolong ayuunea tani apei a ngakujo kanguna akwap keng ani a ekapolon a Asiria? Ani nyo tokona itamitotor esi atamar eyuuni Ekapolon Akuj Yerusalem?”

³⁶Kililinga ngitunga chek emam akiroit atachakis ngesi, kainyo adungunit ekapolon Esekia ebala, “Nyiitachakis ngesi akiroit.”

³⁷Apot Eliakim, ka Chebina, ta Yoa tochilichilaasi ngiworui kech ialolongete, toloto alimokin ekapolon Esekia ngakiro na alimu ekarikon a ngasigerea a Asiria.