Read turkana 2 Ngikapolok 2 Bible Online

2 Ngikapolok 2 - turkana bible

2 Ngikapolok 2

¹Abu tanang akolongit na eyaarea Ekapolon Akuj Elija kidiama alokuwam alo edirisit. Tonyout Elija ka Elicha toloto Giligal.

²Ani eloose alorot, tolimok Elija Elicha tama, “Kidong tokona nege kainyo kadungoki Ekapolon Akuj ayong atamar tolot Besel.” Nakaneni tatachak Elicha ngesi tama, “Ekong jik, kona amunor ayong Ekapolon Akuj na eyari, katomuno iyong dang, nyakaisikini ayong iyong.” Apot kesi toloto Besel.

³Abu atukuor a ngikadwarak na alomit Besel tolot nia Elicha kingit tama, “Iyeni iyong atamar elemari Ekapolon Akuj ekapolon kon kitotiak ka iyong akolongit naga a?” Tatachak Elicha kesi tama, “Ee, ayeni. Nakaneni nyikiruor ngakiro nguna.”

⁴Abu Elija tolimok Elicha tama, “Kidong tokona nege kainyo kadungoki Ekapolon Akuj ayong atamar tolot Yeriko.” Nakaneni tatachak Elicha ngesi tama, “Ekong jik, kona amunor ayong Ekapolon Akuj na eyari, katomuno iyong dang, nyakaisikini ayong iyong.” Apot kesi toloto Yeriko.

⁵Abu atukuor a ngikadwarak na alomit Yeriko tolot nia Elicha kingit ngesi tama, “Iyeni iyong atamar elemari Ekapolon Akuj ekapolon kon kitotiak ka iyong akolongit naga a?” Tatachak Elicha kesi tama, “Ee, ayeni. Nakaneni nyikiruor ngakiro nguna.”

⁶Sodi Elija tolimok Elicha tama, “Kidong tokona nege kainyo kadungoki Ekapolon Akuj ayong atamar tolot nangolol a Yorudan.” Nakaneni tatachak Elicha ngesi tama, “Ekong jik, kona amunor ayong ekapolon Akuj na eyari, katomuno iyong dang, nyakaisikini ayong iyong.” Apot kesi toloto,

⁷sodi kiwapakis kesi ngikadwarak Akuj ngitomwon-kan tananga Yorudan. Towaa Elija ka Elicha alokwaas a angolol, sodi towaa ngikadwarak lutomwon-kan tachadakinos kaneni.

⁸Abu Elija talachu eworu keng tobilak, sodi taramea ngakipi a Yorudan. Apot ngakipi tapakas sodi kitoro ngesi ka Elicha nalup nakoonok todokasi ekwakaye.

⁹ Ani enangi ekwakaye tolimok Elija Elicha tama, “Tolimokinae ayong ibore ni kasubakinea iyong eringa ayong nyelemara katotiak ka iyong.” Tatachak Elicha ngesi tama, “Kimiekinae ayong erum agogongu a etau kon naketiliwori ayong lo elunyokin nados kon.”[3]

¹⁰Tatachak Elija tama, “Etioko ngakiro na isaki iyong nguna. Nakaneni ianyuni iyong erai kianyunga iyong ayong kalemario atotiakas ka iyong. Ani pekianyunga iyong ayong kalemario, nyianyuni.”

¹¹Torubakis kesi iruorosi eloose. Atipei, abu aurukuk a akim na erito ngangolei tongichakin kiding kech. Apon yaarae Elija nadis eyei tooma lokuwam lo adirisit.

¹² Taanyunga Elicha sodi kikaloik Elija tama, “Apakang! Apakang! Ekayuunan a Ngisirael loationon! Ilot cha iyong a?” Nakaneni nyeanyungara ngesi Elija nabo jik. Tochil Elicha eworu keng ialolongi.

¹³Ani erumor tolem eworu a Elija losek achakun anakwaan a Elija, sodi tobongo towo alokeli a Yorudan.

¹⁴Taram ngesi ngakipi a eworu a Elija tolim tama, “Nyaali Ekapolon Akuj na erai Akuj a Elija?” Ani erumor taram ngakipi nabo, sodi tapakas ngakipi, torotok ngesi todoka ekwakaye.

¹⁵Abu atukuor a ngikadwarak a lutomwon-kan apote alo Yeriko taanyungasi ngesi sodi tamasi, “Aanyu Elicha agogongu a Elija!” Toloto kesi kisiriamiasi ngesi, kijuuruoto alongaren keng,

¹⁶sodi tamasi, “Kiya sua ngitomwon-kan nege lu kirai daang lua ngikilinga. Kimiekinae sua atoloto atasakasi ekapolon kon. Ejok kori kiwoko ngesi Etau a Akuj sodi kimiek alomoru kori anadipo a adio.” Tatachak Elicha tama, “Emam, nyiilot.”

¹⁷Nakaneni kirichakinos kesi atamar kilosi tanang ngesi echamuni. Toloto lutomwon-kan ngulu akisak Elija wadaang a ngirwa a nguuni, tongopik, nyeanyuna.

¹⁸Ani erumor tobongosi kesi nia Elicha lo edarunit kesi alo Yeriko. Abu ngesi kingit kesi tama, “Aberakin ngoon ayong alimokin esi atamar nyiilot.”

¹⁹Toloto ngitunga ngiche a ere a Yeriko nia Elicha tolimokis tamasi, “Ekapolon, ejok ere logo noi loger lo iteo iyong dang, nakaneni eroko ngakipi a ere kalo isiyesete ngaberu.”

²⁰Todungok Elicha kesi tama, “Kiwaakisi amakat natubwa nachukul nakitetet yaut nege.” Apot kesi inut ngesi atubwa ngina,

²¹sodi tolot ngesi lolelea, towatak amakat nakipi, dio alimun tama, “Ebala Ekapolon Akuj kona, ‘Etaleu ayong ngakipi nugu, nyeringa earete ngitunga kori isiyesete ngaberu.’ ”

²²Aliworosi ngakipi nguna na italeuno, loger lo alimunio Elicha atamar ikokinete neni.

²³Torotok Elicha alo Yeriko tolot Besel. Ani elosi ngesi alorot, potu ngide lusapa alore a eche tokianatar ngesi echalasi ebalasi, “Torotok kane iyong lopalor logo!”

²⁴Torei ngesi tokienyik kesi sodi kilam kesi elimit ekiro a Ekapolon Akuj. Apot ngibuin ngiarei luberu topudut anamoni taara ngide lusapa ngulu ngitomwon-omwon ka ngiarei.

²⁵Abu Elicha tolot moru lobe Karimel, ani ekisidi tolot Samaria.