Read turkana 2 Ngikapolok 20 Bible Online

2 Ngikapolok 20 - turkana bible

2 Ngikapolok 20

¹Ngirwa lupei ngulu, todeakakin ekapolon Esekia tonyou akitu. Tolot ekadwaran a Akuj Isaya lokookeng a Amos aanyun ngesi tolimok tama, “Ebala iyong Ekapolon Akuj tosubak ibore daang kitiriyan kainyo nyengalekini edeke kon. Tosubakin kiteu akitu.”

²Torei Esekia tokienyik esiep a akai kilip tama,

³“Ekapolon Akuj, kitam atamar asub ayong etich kon ewapit ngakiro kon atarai lokamuno iyong, nabo asak ayong ngirwa daang akisub ngakiro na isaki iyong.” Abu Esekia kikalou lokojokon.

⁴Torotok Isaya ani a Ekapolon. Ani eringa ngesi nyitoro kiding alaar a akai a ekapolon, tolimok Ekapolon Akuj ngesi tama,

⁵“Tobongo tolimok Esekia lo erai ekapolon a ngitunga kang kona, ‘Ayong Ekapolon Akuj na arai Akuj a apaakon Daudi, eira akilipit kon nabo engolik ngakiyo kon. Etangalekini ayong edeke kon, ani akwaar na a ngauni, ilosi iyong kai kang.

⁶Kemiekini ayong iyong toyar ngikaru ngiche lu eraakasi ngitomon ka ngikan. Kayuuni ayong iyong ka ere lo a Yerusalem logo ani eyei ekapolon a Asiria. Eratakini ayong ere logo kotere ekipur kang a ilope, ka ngakiro nakolong echikakini ayong ekasuban etich kang Daudi.’ ”

⁷Ani erumor tolimok Isaya ngimeanara a ekapolon tama, “Yautu atap a ngameyana. Tolemutu atap ngina tomietakisi lolepunait, sodi tangalek edeke keng.”

⁸Kingit ekapolon Esekia Isaya tama, “Nyooni idodiuni atamar itangalekini Ekapolon Akuj edeke kang ani akwaar na ngauni apedori ayong alosit kai a Akuj?”

⁹Tatachu Isaya tama, “Ibore en kidodikini iyong Ekapolon Akuj toyenea atamar irichakini ngesi ngakiro nakichikak iyong. Tokona a, isaki iyong etorube a ngadoket kiyoto ngaren ngakikalamikinet ngatomon kori kiyoto naabor ngakikalamikinet[29] ngatomon?”

¹⁰Tatachak Esekia tama, “Ebeben akisiyotoor etorube ngaren ngakikalamikinet ngatomon! Kisiyotoo naabor ngakikalamikinet ngatomon.”

¹¹Kilip Isaya Ekapolon Akuj. Abu Ekapolon Akuj kisiyotoo etorube naabor ngakikalamikinet ngatomon anadoket[30] ana kolong aduki ekapolon Aas.

¹²Ngirwa lupei ngulu, kiira ekapolon a Babilonia lo anyaritae Melodak Baladan lo arai lokookeng a Baladan atamar adeakakin ekapolon Esekia. Abu ngesi tomea ngitunga inasi Esekia abarua ka ainakinet.

¹³Kipeyou Esekia ngipeyok kidodik ebari keng. Kidodik tani ngakwangae ka egolit, ngikito lu itukukunyete akimuj, ka ngamieta nakaakunyok ta ngiboro keng daang a ejie. Emam ekeru keng tani epei lo abu kidong nyidodikina ngesi kesi. Kidodik ngesi kesi tani ngiwaitin daang a akwap keng.

¹⁴Sodi tolot ekadwaran a Akuj Isaya nia ekapolon Esekia kingit tama, “Aliwae eponitotor ngitunga lugu? Abalasi kesi iyong ai?” Tatachak Esekia tama, “Eponito anakwap anakalonan noi enyaritae Babilonia.”

¹⁵Kingit Isaya ngesi tama, “Nyooni aanyungarete kesi alokai kon?” Tatachak Esekia tama, “Aanyungasi kesi ibore daang. Emam ibore daang ni eyei lokerui ni nyidodikina ayong kesi.”

¹⁶Abu Isaya tolimok ekapolon tama, “Kiira akiroit a Ekapolon Akuj.

¹⁷Kingolik a, enangi akwaar na elemarere ibore daang alokai kon, ka ngiboro lukolong ekachete taapaakon napei kolong jik tanang akolongit naga. Iritorio ngiboro ngulu daang Babilonia. Emam ibore idongi.

¹⁸ Erikio ngalesea na iyanatar iyong ngache toliworos ngikiliok lu idongitoe lu esubete etich alokai a ekapolon a Babilonia.”

¹⁹Abu Esekia tolimok Isaya tama, “Ejok akiroit a Ekapolon Akuj na ilimu iyong.” Etamit ngesi abala, “Abe ejok bo erai kemin ekisil kiratakin ibore daang ngirwa daang lu ayarea ayong.”

²⁰Ngakiro nache daang asubi ekapolon Esekia, na ikote na ajwonu keng, ka eger lo adukio abwel a ngakipi ani erumor tobokak akipany na echiluni ngakipi lore, igiritae nakitab na enyaritae Ngakiro a Ngikapolok a Yuda.

²¹Totoan Esekia, kilunyokin lokookeng lo anyaritae Manase nados keng toliwor ekapolon.