Read turkana 2 Ngikapolok 21 Bible Online

2 Ngikapolok 21 - turkana bible

2 Ngikapolok 21

¹Araakasi ngikaru a Manase ngitomon ka ngiarei na aliworor ngesi ekapolon a Yuda. Toliwor ngesi ekapolon alo Yerusalem a ngikaru a ngitomwon-kan ka ngikan. Anyaritae itiokeng Episiba.

²Tosechak Manase Ekapolon Akuj, kiwap ngakiro nakakadakinak a ngibukui alusek etwarakini Ekapolon Akuj anakwap na alooso Ngisirael ngaren.

³Toduk ngesi nabo ngakais nakolong abwangabwangaari apakeng, na araakasi ngakilipet ngakujo nagelayek. Toduk ngesi ngikenoi lu ilipere Baal. Tosubak ngesi ekisikwaane a akuj anaberu enyaritae Achera, loger lokolong asubi ekapolon a Ngisirael lo anyaritae Aab. Kilip Manase tani ngikanyer.

⁴Toduk ngesi ngikenoi lu ilipitere ngakujo nagelayek tooma kai a Akuj, nikolong abala Ekapolon Akuj ejoikinit kelipere ngesi.

⁵Todukok ngesi ngikenoi lu ilipitere ngikanyer nalaarin naarei a akai a Akuj.

⁶Kipeye lokookeng erai akipeyos na inomio. Adwareene ngesi tarai emuron. Aanyuununi[31] ngesi ngikekeriak ka ngimurok. Tosechak ngesi Ekapolon Akuj noi kitongo kitilili.

⁷Kiwaak ekisikwaane a akuj anaberu anabe Achera tooma kai a Akuj, nikolong alimokini Ekapolon Akuj Daudi ka lokookeng Solomon tama, “Alokai kana, kanege alo Yerusalem, ngesi aseu ayong anakwap kadaang ana ngitela alutomon ka ngiarei a Ngisirael atamar kelipere ayong.

⁸Ani kiwap Ngisirael ngakiro daang na adung ayong kirichakis ngitalio daang lukolong etaanyuni ekasuban etich kang Musa kesi, nyemiekini ayong kesi itwarakinio anakwap ana kolong ainakini ayong taapaakech.”

⁹ Nakaneni nyiwapa ngitunga a Yuda ngakiro a Ekapolon Akuj. Abu Manase torikok kesi akisub ngasechesea naaronok noi na idwangito na asubete ngibukui lu etwarakini Ekapolon Akuj anakwap na alooso Ngisirael ngaren.

¹⁰Tolim Ekapolon Akuj ngakiro na etorunete nia ngikasubak etich keng alu araakasi ngikadwarak tama,

¹¹“Asub ekapolon Manase ngakiro nakikadakinete ikote nugu, ngakiro naaronok noi idwangito tani nakolong asubete Ngikanaan, nabo arikokini ngesi ngitunga a Yuda nakisech kotere ngakujo nasubuna.

¹²Kotere ngakiro nguna, ayong Ekapolon Akuj na arai Akuj a Ngisirael, ayauni ayong ngakiro naaronok Yerusalem ka Yuda, toliwor itwaan daang ni iirari, ebuli kirakar.

¹³Erirae ayong Yerusalem loger lo eriraa Samaria. Erirae loger lo eriraa Aab lo arai ekapolon a Isirael ka ngalesea keng. Ani ngitunga a Yerusalem, amiatari miet, kidong Yerusalem eseg loger a atubwa anabeleny ana isutario tobuburiarae.

¹⁴Aisikini ayong ngitunga lu idongete sodi epoto ainak ngimoe kech, lu idwangete kesi tolemasi akwap kech.

¹⁵Asubea ayong ngitunga kang ngakiro nguna kainyo kasechakis kesi ayong ayong ketongoa ketilileta napei kolong apudunito taapaakech alo Misiri tanang akwaar na tokona naga.”

¹⁶Taar Manase ngitunga lukokaalak lupeasechito tanang ngaakot eleleunete alowae a epei a Yerusalem toporut alowae aloche. Asubi ngesi nguna kimorikin ka ngakiro na arikokinea ngesi ngitunga a Yuda akilipit ngakujo nasubuna, tosechakineta kesi Ekapolon Akuj.

¹⁷Ngakiro nache daang asubi Manase, imorikina aapei ka ngasechesea na asubi ngesi, igiritae nakitab na enyaritae Ngakiro a Ngikapolok a Yuda.

¹⁸Totoan Manase tonukakinae mana a akai a ekapolon, na arai amana a Usa. Abu lokookeng lo anyaritae Amon kilunyokin nados keng toliwor ekapolon.

¹⁹Araakasi ngikaru a Amon ngitomwon-arei ka ngiarei na aliworor ekapolon a Yuda. Toliwor ngesi ekapolon alo Yerusalem a ngikaru a ngiarei. Anyaritae itiokeng Mechulemes, nakookeng a Arus alo enyaritae Yotiba.

²⁰Tosechak ngesi ekapolon Akuj loger a Manase alo arai apakeng,

²¹sodi kilip ngakujo nasubuna nasek elipit apakeng.

²²Tonger ngesi Ekapolon Akuj na erai Akuj kata apaakeng, sodi towou akiwap ngakiro na adungunit Ekapolon Akuj.

²³Apot ngikarikok a ngasigerea a Amon totuko, sodi taarakis ngesi kai keng.

²⁴Apot ngitunga a Yuda taara ngitunga lu aarete Amon, sodi kitiliwosi lokookeng lo anyaritae Yosia ekapolon.

²⁵Ngakiro nache daang asubi Amon igiritae nakitab na enyaritae Ngakiro a Ngikapolok a Yuda.

²⁶Tonukakinae Amon naliel na ayei mana a Usa. Abu lokookeng kilunyokin nados keng toliwor ekapolon.