Read turkana 2 Ngikapolok 22 Bible Online

2 Ngikapolok 22 - turkana bible

2 Ngikapolok 22

¹Araakasi ngikaru a Yosia ngikan-kauni na aliworor ekapolon a Yuda. Toliwor ngesi ekapolon alo Yerusalem a ngikaru a ngitomwon-uni ka epei. Anyaritae itiokeng Yedida, nakookeng a Adaya, alo a ere a Bosikas.

² Tosub Yosia ngakiro na ajoikinito Ekapolon Akuj. Kiwap ngesi ekitetemes a apaakeng Daudi, kiwap ngitalio a Akuj daang lokojokon.

³Ekaru lo a ngitomon ka ngikan-kauni lo araakar Yosia ekapolon, tomea ngesi ekegiran a ngikesio lo anyaritae Chapan, lo arai lokookeng a Asalia, tarai etatait a Mechulam. Tomea ngesi ekegiran keng ngolo kai a Akuj idesikinit ebala,

⁴“Kape Lomuron Loapolon a Akuj lo enyaritae Ilikia kitolimok iyong etiae a ngaropiyae ana ayaun kai a Akuj. Kitolimok ngesi etiae a ngaropiyae ana ediaunete ngimurok lu esubete etich alokidor a akai a Akuj, kidiaut ngitunga.

⁵Tolimok ngesi nak ngaropiyae nguna ngitunga lu eweikinito abongonokin akiduk akai a Akuj. Etacheta kesi ngaropiyae nguna

⁶ngikadukok a ngakito, ka luche, ka lua ngamoru, ka akigiel ngakito ka ngamoru na edukere akai a Akuj.

⁷ Eraakasi ngitunga lu eweikinito etich ngolo lu emunoi noi. Kotere ngakiro nguna, nyechamit kesi etamario kidodiut ibore daang ni asubeta kesi ngaropiyae.”

⁸Tolimok Chapan Ilikia ngakiro daang na adungunit ekapolon atamar tosubae. Abu Ilikia tolimok Chapan tama, “Aanyu ayong akitab a Etal alokai a Akuj.” Nak Ilikia Chapan akitab, sodi kisomak Chapan.

⁹Ani erumor tolot Chapan nia ekapolon tolimok tama, “Alemut ngikasubak etich kon ngaropiyae na ayakasi kai a Akuj ainakis ngitunga lu eweikinito akiduk.”

¹⁰Ani erumor tolimok Chapan ekapolon tama, “Akitab ache naga kainakini ayong Ilikia.” Abu ngesi kisomak akitab ngina irema, topupokinite ekapolon.

¹¹Ani iirari ekapolon ngakiro a etal na esomao anakitab, tochilichilia ngiworui keng enyunyura.

¹²Abu ekapolon tanyara ngitunga lugu, Ilikia lo arai emuron a Akuj, ka Aikam lo arai lokookeng a Chapan, ka Akibor lo arai lokookeng a Mikaya, ka Chapan lo arai ekegiran a ngikesio ta Asaya lo arai ekasuban etich a ekapolon, todungok kesi tama,

¹³“Kapesi tanyarata Ekapolon Akuj kotere ayong ka ngitunga a Yuda daang, toyena eger a ngakiro a akitab kana. Kingoikinit ngoni Ekapolon Akuj kainyo nyesuba taapaayok ngakiro na igiritae nakitab naga atamar ejoikinit esubio.”

¹⁴Apot Ilikia, ka Aikam, ka Akibor, ka Chapan ta Asaya toloto aanyun aberu na anyaritae Ulida. Arai ngesi akadwaran na alomit lowae a Yerusalem lo aringa edukio. (Lokile keng lo anyaritae Chalum, lo arai lokookeng a Tikipa tarai etatait a Araas, ngesi aweikinit asaduku na a ngiworui a akai a Akuj.) Kisisakinae Ulida ngakiro na asubakinosi,

¹⁵sodi tolimok ngesi kesi tama, “Ebala Ekapolon Akuj, na erai Akuj a Isirael kona, ‘Tolimokisi itwaan ni kimeuni esi ni ayei ayong

¹⁶atamar ebala Ekapolon Akuj kona, kingolik a, ayauni ayong ngakiro naaronok nakwap naga ka lotunga keng, ayauni ngilam lu igiritae nakitab na esoma ekapolon.

¹⁷Kangero kesi ayong epeyonokis ngakujo ngache ngakipeyos. Kotere ngakiro nguna, ketongoa kesi ayong ketilileta a ngakiro ana esubete. Angoik ayong Yerusalem anyunyurikin, emam kona etubor angoit ngina.

¹⁸Ngakiro nguna kesi alimuni ayong Ekapolon Akuj na arai Akuj a Isirael, kotere ekapolon a Yuda. Iirari iyong ngakiro na igiritae nakitab,

¹⁹sodi tolung akisech kon ka akitiditeun alongaren kang. Ibu tochilichilaa ngiworui kon kigor, na iirarea atamar ayauni ayong ngakiro naaronok nakwap naga ka lotunga keng. Idongi akwap naga esil, toliwor ngesi elimito ngitunga na ilamatar. Nakaneni eira ayong ngakiro kon.

²⁰Kotere ngakiro nguna, kingolik a, nyianyungari iyong ngakiro naaronok ayauni ayong nakwap naga. Epote kitoana iyong kerumor. Kemiekini ayong iyong totoan akaalimon.’ ” Apot kesi yaut ngakiro nguna nia ekapolon Yosia.