Read turkana 2 Ngikapolok 23 Bible Online

2 Ngikapolok 23 - turkana bible

2 Ngikapolok 23

¹Tanyarau ekapolon Yosia ngikarikok a Yuda daang ka lua Yerusalem ni ayei ngesi.

²Kirukosi kesi kai a Akuj, aapei ka ngimurok, ka ngikadwarak ta ngitunga luche daang, luuchik ka luapolok. Towo ekapolon alongaren kesi daang, kisomak irema epupete kesi ngakiro daang a akitab a achamunet ana aanyunio alokai a Akuj.

³Towo ekapolon alo diyete apir sodi tachamakin ka Ekapolon Akuj atamar ewapi ngakiro keng. Tacham ngesi a etau keng ka akiyar keng daang atamar erichakini ngitalio ka ngakiro daang na edungunit Ekapolon Akuj. Tacham ngesi atamar asubi ngakiro daang a achamunet loger lo igiritere nakitab. Apot ngitunga daang tolimut atamar kirichakini achamunet.

⁴Ani erumor kidesik Yosia Ilikia lo arai emuron loapolon a Akuj, ka ngimurok lu engarakinito ngesi, ka ngasigerea na eteete ekidor a akai a Akuj, atamar kipudut alokai a Akuj ngiboro daang lusek elipitere Baal, ka akuj naberu enyaritae Achera ta ngikanyer. Kinom ekapolon ngiboro ngulu daang anikalapatan ere alo diyete adipo a Kidiron, ani erumor tama yaasi ekuron Besel.

⁵ Talachak alotich ngimurok daang lukolong etaleunete ngikapolok a Yuda toliworos ipeyoete ngakipeyos[32] alokenoi a ngakujo anagelayek alorerea a Yuda ka ngakwapea na edunyatar Yerusalem. Talachakinae alotich tani ngimurok daang lu epeyonokinete Baal, ka akolong, ka elap, ka ngitopon ta ngikanyer.

⁶Tolem ngesi ekisikwaane a akuj anaberu enyaritae Achera alotooma akai a Akuj, kipudo nikalapatan a Yerusalem yaa nadipo a Kidiron. Abu kinom ani erumor kirie ekuron keng toliwor apua, sodi kielak nalielin a ngitunga alu nyeyenikinitae.

⁷Tobwangabwanga ngesi ni alomito ngitunga lumalaae[33] alotooma akai a Akuj. (Neni ngesi adonyioto ngaberu ngiworui lukooyak elipitere Achera.)

⁸Ngimurok a Akuj lu ayakasi lorerea a Yuda, yau ngesi Yerusalem. Anakwap kadaang etia ni etia, kinyasu ngesi ngikenoi lusek epeyeeneto kesi ngakipeyos. Tobwang ngesi ngikenoi tani lu etalekinitoe ngipean a ngaanei. Ayakasi ngikenoi ngulu diyete ekidor lo aduki ekapolon a ere lo anyaritae Yochua. Ani enanguni itwaan lokidor lo alokinga elomuni lore, ebakit ekidor lo aduki Yochua alokedieny.

⁹ Peachamakinitae ngimurok a Akuj epote lokeno a ngakipeyos alo Yerusalem, nakaneni apedorete kesi akinyam ngamugati na emam ekitoe lo itubui, na araakasi ngaka ngimurok alurukitos kech.

¹⁰Kinyasu ekapolon Yosia tani Topes, ni arai ngesi elipitere ngakujo nagelayek anadipo a Inom. Ekokini ngesi neni tongop kona ipeye itwaan lokookeng kori nakookeng erai akipeyos na inomio ani akuj ana enyaritae Molek.

¹¹Tobwang ngesi ngakisikwaanet a ngangolei na echietae, nakolong etaleunete ngikapolok a Yuda toliworos ilipitere akolong. Kinom ngesi ngaurukukui na irito ngangolei, na elipitere akolong. (Ewaakinitae ngakisikwaanet nguna ka ngaurukukui nalaar a akai a Akuj, diyete ekidor. Aapi neni ani alomit Nasan Melek lo edongitoe.)

¹²Abu Yosia tobwang ngikenoi lu adukete ngikapolok a Yuda kidiama akai a ekapolon, kidiama tani amaniyat na apereene ekapolon Aas. Tobwang ekapolon Yosia aapei ka ngikenoi lu aduki ekapolon Manase nalaarin naarei a akai a Akuj. Tobwangabwanga ngesi ngikenoi kiela sodi kimasak nadipo a Kidiron.

¹³Kinyasu Yosia ngikenoi lusek aduki ekapolon Solomon kide Yerusalem, kuju emoru a ngikito a akimiet.[34] Araakasi ngikenoi ngulu lukilipet ngakujo nasubuna nakikadakinete, na anyaritae Asitarite na arai akuj naberu a Ngisidon, ka Kemoch na arai akuja Ngimoab ta Molek na arai akuj Ngiamon.

¹⁴ Tobwang ekapolon Yosia ngapirio a ngamoru kiela, totubo akisikwaanet a akuj anasubuna anaberu enyaritae Achera. Kilelebik ngesi ngamoru nikolong awaatar ngapirio nguna ka akisikwaanet a akuj anasubuna.

¹⁵Tobwang ngesi tani nikolong elipitere alo Besel, ni adukokini ekapolon Yeroboam lo arai lokookeng a Nebat. Yeroboam ngolo ngesi lo arikokini Ngisirael nakisech. Touko Yosia ekeno, tobwang ngamoru keng kiela sodi kirie toliwor apua. Kinom ngesi tani akisikwaanet a akuj anasubuna enyaritae Achera.

¹⁶Ani erea Yosia, taanyunga ngalielin ngache alomukura. Tomea ngesi ngitunga akutun ngakoyo analielin kanguna, kinomae alokeno a ngakipeyos. Kinyasu ngesi ekeno a eger kangolo, tosub nakolong adwari sek ekadwaran akolongit na esukukuu na awaar ekapolon Yeroboam alo diyete ekeno a ngakipeyos. Torei ekapolon Yosia sodi kingolik aliel a ekadwaran alo kolong adwari ngakiro nguna.

¹⁷ Kingis ngesi tama, “Aka ngae aliel ngin?” Tatachakis ngitunga a Besel tamasi, “Erai aliel a ekadwaran alo abuni alo Yuda, todwar ngakiro na tokona isubakinea iyong ekeno logo.”

¹⁸Tolimok Yosia kesi tama, “Nyiitap aliel ngina. Nyiikutut ngakoyo keng.” Apon ngakoyo keng kimiekinae. Kimiekinae tani ngakoyo a ekadwaran alo abuni alo Samaria.

¹⁹Alore kadaang a akwap a Isirael, tobwang ekapolon Yosia ni elipitere ngakujo nagelayek, ni adukete ngikapolok a Isirael, kitongoeta Ekapolon Akuj kitilileta. Tosubea ngesi ngikenoi ngulu daang ngakiro nakolong asubi alo Besel.

²⁰Taar ngesi ngimurok a ngakujo anagelayek daang alokenoi alu asubeta kesi etich, sodi kinom ngakoyo a ngitunga alokenoi kadaang. Ani erumor tobongo ngesi Yerusalem.

²¹Kidesik ekapolon Yosia ngitunga daang tama, “Tosubakisi esukukuu a Adeparet idodikinitotor Ekapolon Akuj na erai akuj kus arimatoi loger lo igiritere nakitab na achamunet naga.”

²²Emam Adeparet ache na ikoni naga na asubakis ngikapolok ngiche a Isirael kori a Yuda, akisiakin napei kolong apolokinitotor ngikatubok ngakiro akwap.

²³Nakaneni ekaru lo a ngitomon ka ngikan-kauni lo araakar Yosia ekapolon, apon esukukuu a Adeparet tosubakinae alo Yerusalem.

²⁴Ani kona asakea ekapolon Yosia akiyookin ngitalio lu egiritae nakitab na aanyuni emuron loapolon anyaritae Ilikia alokai a Akuj, abu ngesi tolema alo Yerusalem ka ngiwaitin luche daang a Yuda, ngikadwarak ka ngimurok a ngipean daang, ka ngakujo a ngawiyei, ka ngakujo nasubuna ta ngiboro luche daang elipitere ngakujo nagelayek.

²⁵Emam ekapolon eche nakanuan lo ekoni ngesi. Asubi ngesi etich a Ekapolon Akuj a etau keng kadaang, ka ngitamen ta ngikilinga, iwapit ngakiro a etal a Musa daang. Nakaneni emam nabo ekapolon eche ekok ngesi napei kolong ngina.

²⁶Angoikinit sek Ekapolon Akuj ngitunga a Yuda anyunyurikina kotere ngakiro na asubi ekapolon Manase. Abu angoit ngina towou atubor.

²⁷Tolim Ekapolon Akuj tama, “Asubea ayong Yuda ngakiro na asubea Yerusalem. Etwarakini ayong ngitunga a Yuda alongaren kang. Angeri ayong Yerusalem lo erai ere lokolong aseuni ayong. Angeri tani akai a Akuj, ni erai ngesi kolong alimuni ayong atamar toliwor ni ilipeenere.”

²⁸Ngakiro nache daang asubi ekapolon Yosia, igiritae nakitab na enyaritae Ngakiro a Ngikapolok a Yuda.

²⁹Ngirwa lu araakar Yosia ekapolon, abu ekapolon a Misiri lo anyaritae Neko, abu torik ajore tanang nangolol a Eupurate, esaki akingarakin ekapolon a Asiria. Tasak ekapolon Yosia akiratakin ajore a Ngimisiri alo Megido, sodi taarae ngesi alojie kaneni.

³⁰Kiwaakis ngikarikok a ngasigerea akwaan keng naurukuk na irito ngangolei, yaasi Yerusalem tonukakinae nalielin a ngikapolok.

³¹Araakasi ngikaru a Yoaas ngitomwon-arei ka nguuni na aliworor ekapolon a Yuda. Abu ngesi toliwor ekapolon alo Yerusalem a ngilapio a nguuni. Anyaritae itiokeng Amutal, na arai nakookeng a Yeremia alo a ere alo enyaritae Libina.

³²Kiwap ngesi ekitetemes kata apaakeng tosechak Ekapolon Akuj.

³³Asaluni apolou keng ngirwa lu arikio ngesi ekapolon a Misiri lo anyaritae Neko alo Ribila. Ayei Ribila nakwap a Amas. Abu Neko kitubuk ngitunga a Yuda echur lo arai ngakiloi 3,400 a akwangat, ka ngakiloi ngatomwon-uni ka ngoomwon a egolit.

³⁴ Kitiliwo ekapolon Neko lokookeng a Yosia lo anyaritae Eliakim ekapolon a Yuda, kilunyokin nados a Yosia. Kiloch Neko ekiro a Eliakim toliwor Yeoyakim. Toriko Neko Yoaas Misiri totoan kaina.

³⁵ Todeku ekapolon Yeoyakim ngaropiyae alotunga, itemem ka etiae a ebari kech. Ekokini ngesi neni esaki taanyunea ngaropiyae na itemokino ebukere echur lo asaki ekapolon a Misiri.

³⁶Araakasi ngikaru a Yeoyakim ngitomwon-arei ka ngikan na aliworor ekapolon a Yuda. Abu ngesi toliwor ekapolon alo Yerusalem a ngikaru a ngitomon ka epei. Anyaritae itiokeng Sebida, na arai nakookeng a Pedaya alo a ere alo enyaritae Ruma.

³⁷Kiwap ngesi ekitetemes kata apaakeng tosechak Ekapolon Akuj.