Read turkana 2 Ngikapolok 24 Bible Online

2 Ngikapolok 24 - turkana bible

2 Ngikapolok 24

¹Ngirwa lu araakar Yeoyakim ekapolon, torem ekapolon a Babilonia lo anyaritae Nebukadinesa akwap a Yuda. Apon kitingakinae Yeoyakim achamun apolou a Nebukadinesa a ngikaru a nguuni. Ani erumor tonger ngesi apolou a Nebukadinesa.

²Abu Ekapolon Akuj tomea ngajorei a Ngibabiloniae, ka Ngisiria, ka Ngimoab ta Ngiamon akitijwore Yeoyakim, kinyasut Yuda, loger losek alimunitor Ekapolon Akuj ani a Ngikadwarak alu araakasi ngikasubak etich keng atamar ekokini neni.

³Asubakinosi nguna ani adungunio Ekapolon Akuj, sodi kitwarakinea ngesi ngitunga a Yuda alongaren keng kotere ngasechesea na asubi ekapolon Manase,

⁴ tarai cha noi kotere ngitunga lupeasechito daang lu aari ngesi. Towou Ekapolon Akuj arimakin Manase kotere ngakiro nguna.

⁵Ngakiro nache daang asubi Yeoyakim, igiritae nakitab na enyaritae Ngakiro a ngikapolok a Yuda.

⁶Totoan Yeoyakim sodi kilunyokin lokookeng Yeoyakin nados keng toliwor ekapolon.

⁷Nyepudoro nabo ekapolon a Misiri ka ngasigerea keng anakwap keng, kainyo abu ekapolon a Babilonia topolok akwap daang nakolong sek arai aka Misiri, napei anangolol a Eupurate tanang lowae lo alokwap Misiri.

⁸Araakasi ngikaru a Yeoyakin ngitomon ka ngikan-kauni na aliworor ekapolon a Yuda. Toliwor ngesi ekapolon alo Yerusalem a ngikaru a nguuni. Anyaritae itiokeng Neuchita, na arai nakookeng a Elinasan alo a ere a Yerusalem.

⁹Kiwap ngesi ekitetemes a apakeng tosechak Ekapolon Akuj.

¹⁰Ngirwa lu araakar ngesi ekapolon kesi aponeta ngasigerea a Babilonia kiriama Yerusalem. Ngikarikok a ngasigerea a Nebukadinesa kesi arikito ngajorei.

¹¹Ngirwa lu eriamitere Yerusalem, bu ekapolon Nebukadinesa Yerusalem.

¹²Abu ekapolon Yeoyakin, ka itiokeng, ka talokaatokeng, ka ngikarikok a ngasigerea ta ngikasubak etich a akai a ekapolon, tajalakinos Ngibabiloniae. Ekaru lo a ngikan-kauni araakar Nebukadinesa ekapolon, abu ngesi toen Yeoyakin torik.

¹³Tolema ngesi ebari daang lo ayei kai a Akuj ka na ekapolon, yaa Babilonia. Tobwangabwanga Nebukadinesa ngiboro lu egolit daang lukolong asubakini ekapolon Solomon toliwor esubere etich alokai a Akuj. Ekokini ngesi neni loger lo adwaritere.

¹⁴ Toen Nebukadinesa ngitunga a Yerusalem torik. Torik ngesi talokookeng a ekapolon a Yerusalem daang ta ngitunga lukajwok daang ngabunge ngatomon. Kitwarak tani ngikunonoi daang ka ngiketiakak ngasua, kimiek ngitunga lukebootok make alo Yuda.

¹⁵Toen Nebukadinesa Yeoyakin torik Babilonia, aapei ka itiokeng a Yeoyakin, ka ngaberu keng, ka ngikapolok keng luuchik ta ngitunga lu ayenikinitae alo Yuda.

¹⁶Kitwarak Yeoyakin ngitunga lukajwok daang toloto Babilonia. Araakasi ngitunga lukajwok ngulu daang ngabunge ngakan-kaarei, ka ngikunonoi abunget apei, imorikina aapei ka ngiketiakak ngasua. Araakasi kesi daang ngitunga lulangir tojwoko.

¹⁷ Kitiliwo Nebukadinesa amae keng a Yeoyakin lo anyaritae Matania ekapolon a Yuda, sodi kiloch ekiro keng toliwor Sedekia.

¹⁸Araakasi ngikaru a Sedekia ngitomwon-arei ka epei na aliworor ekapolon a Yuda. Toliwor ngesi ekapolon alo Yerusalem a ngikaru a ngitomon ka epei. Anyaritae itiokeng Amutal, nakookeng a Yeremia alo a ere a Libina.

¹⁹Tosechak ekapolon Sedekia Ekapolon Akuj, loger losek asechea apakeng Yeoyakim.

²⁰ Tongoik Ekapolon Akuj ngitunga a Yerusalem ka lua Yuda noi, kitwarak kesi alongaren keng.