Read turkana 2 Ngikapolok 3 Bible Online

2 Ngikapolok 3 - turkana bible

2 Ngikapolok 3

¹Ekaru lo a ngitomon ka ngikan-kauni lo araakar Yeochapat ekapolon a Yuda, abu Yoram lo arai lokookeng a Aab toliwor ekapolon a Isirael alo Samaria a ngikaru a ngitomon ka ngiarei.

²Tosech ngesi ani a Ekapolon Akuj, nakaneni pearono akisech keng noi loger ana ka apakeng kori ana itiokeng ana anyaritae Yesebel, kainyo aukori ngesi ekisikwaane losek asubakini apakeng kilipere Baal.

³Tani ikoni neni, abu ngesi kitosech Ngisirael loger a Yeroboam lokookeng a Nebat, lo awouni apalikin akisech.

⁴Ameat Mecha lo arai ekapolon a akwap a Moab ngamesekin. Ekaru daang, abukonokini ngesi ekapolon a Isirael echur a ngimesekin aluuchik alukiliok 100,000, nabo ainanakini ngajul a ngamesekin ana araakasi 100,000.

⁵Ani etoani Aab lo arai ekapolon a Isirael, tonger ekapolon a Moab ngakiro a ekapolon a Isirael.

⁶Tonyou ekapolon Yoram atipei alo Samaria tochunak ngasigerea keng daang.

⁷Tomea ngesi itwaan nia ekapolon Yeochapat alo arai ekapolon a Yuda ebala, “Anger ekapolon a Moab ngakiro kang. Isaki iyong erukosi ka ayong etijwoto ngesi a?” Tatachak ekapolon Yeochapat ngesi tama, “Asaki ayong erukosi ka iyong. Kirai ngoni ngipei. Ikote ngitunga kang lukon, ikote ngangolei kang nakon.

⁸Erot ali kitori ngoni kilosi ejie?” Tatachak Yoram ngesi tama, “Kiwapi ngoni erot lokooyen, lo itori nariet a Edom.”

⁹Abu ekapolon Yoram torotokis ka ngikapolok a Yuda ka Edom. Ani akolongit na ngakan-kaarei eloose kesi, tadaunos ngakipi kech, tongopa ngakipi emaase ngasigerea ka ngibaren lu ewapito kesi.

¹⁰Tachalu ekapolon Yoram tama, “Oitiakoi kare! Kipoto Ekapolon Akuj ngoni luuni kijalak ekapolon a Moab!”

¹¹Kingis ekapolon Yeochapat tama, “Eyei ekwadwaran nege lo epedori akisuruor Ekapolon Akuj a?” Tatachu epei a ngasigerea a Yoram tama, “Eyei Elicha lokookeng a Chapat nege. Arai kolong ngesi ekasuban etich a Elija.”

¹²Tolim Yeochapat tama, “Erai ngesi emuron a Akuj loa iteni dir.” Apot ngikapolok luuni ngulu toloto nia Elicha.

¹³Kingit Elicha ekapolon a Isirael tama, “Nyo isakea iyong kengarak ayong iyong? Kape nia ngikadwark alu kolong aanyununete apakon ka itiokon.” Tatachak Yoram tama, “Mam, Ekapolon Akuj kipoto sua luuni kijalak ekapolon a Moab.”

¹⁴Tatachak Elicha tama, “Ekong jik tani Akuj Namerikanyer na eyari, na erai ngesi asubi ayong etich keng. Arai nyaarima ayong ekapolon Yeochapat lo ipupokina ka iyong, pekamisik ayong ngakiro kon.

¹⁵Tanyarakinae ayong ekaeon tokona.” Ani erami ekaeon agita keng, min agogongu a Ekapolon Akuj nia Elicha,

¹⁶sodi tolim tama, “Ebala Ekapolon Akuj kona, ‘Tobokakisi ngichileta wadaang a etau a angolol kana.

¹⁷Tani pekingolikis esi ekuwam kori akiru imarukuunit, ilelebunosi ngakipi lotau a angolol kana, tamata esi ka ngibaren kus, ta ngibaren lua eegos.’ ”

¹⁸Torubak Elicha iruoro ebala, “Ebeben ani a Ekapolon Akuj asubakin ngakiro nugu. Idwangete esi tani Ngimoab kotere ngesi.

¹⁹Ilemarete esi ngirerea kech luajokak lu edukitoe ngawasea. Itubete esi ngikito kech daang lua ageor, tonuka ngileleae daang, ka akinyasun ngamanat daang toburuchiasi a ngamoru.”

²⁰Ani ataparach nache esaa lopalem ipeyoore akipeyos, toleleut ngakipi alowae a Edom, toburuchiasi ngalup.

²¹Ani iirarete Ngimoab atamar eponito ngikapolok luuni akirem kesi, apon tanyaraunae ngitunga daang lu epedorete akiting ngiboro lua ejie, napei aluuchik tanang luapolok, sodi kiriwokinae kesi lokukuoru.

²²Ani ekienyunete Ngimoab ataparach nache, kingolikis ngakipi imakinit akolong itusubunit erengak ngaakot.

²³Tachalut kesi tamasi, “Erai ngaakot! Kejwoto ngikapolok luuni ngulu make taaras! Potu apana inaa atangatasi ngiboro!”

²⁴Ani enangete kesi inaa, apot Ngisirael kitijikis kesi kiritasi. Torubakis Ngisirael irisito Ngimoab taara

²⁵ka akinyasun ngirerea kech. Ani esaa lo itorioto kesi mana naajokon, alemuununi itwaan daang amoru tachakak mana tanang eburuchiarete ngamanat naajokak daang. Apot kesi tani tonuka ngileleae daang ka akitub ngikito a ageor. Ani esal, arai ere a Kir Eres bon abu kidong nyeukoro ngamoru keng. Nakaneni apot ngitunga lu agumanarete ngamoru a ngapirae kiriama ere ngolo toremo.

²⁶Ani eyeni ekapolon a Ngimoab atamar kedwang ngesi alojie, toriko ngikiliok ngamiae ngakan-kaarei lukajwok a ngilengea, tasak akimingaar toped ngajorei tosii tolot nia ekapolon a Siria.[4] Abu ngesi tokuruwo akikokin neni.

²⁷Abu ngesi torwakin lokookeng loapolon lo adikino ilunyokin nados keng toliwor ekapolon, sodi kipeye ngesi anawas a ere, ipeyokinit akuj a Ngimoab. Tobul[5] Ngisirael sodi torotokis alore, tobongo nakwap kech.