Read turkana 2 Ngikapolok 4 Bible Online

2 Ngikapolok 4 - turkana bible

2 Ngikapolok 4

¹Tolot apuserut na arai aka atukuor a ache a ngikadwarak nia Elicha tolimok tama, “Ekapolon, atoana lokile kang! Iyeni iyong atamar elipit kolong ngesi Ekapolon Akuj ngirwa daang, nakaneni abu tokona itwaan nikolong aarit ngesi amicha keng arikor talokookang luarei toliworos ngikedalak keng, tatachakin namicha nakolong aari lokile kang.”

²Kingit Elicha aberu ngina tama, “Nyo isaki iyong katosubakinea? Nyooni eyei nawi kon?” Tatachak aberu ngina tama, “Emam ibore eyei mati ebur lodiochichi a akimiet.”

³Tolimok Elicha ngesi tama, “Kape nia ngikidunyet kon kidiau ngiburin lu emam ibore eyei lukaalak lucha ianyuni iyong.

⁴Ani erumor tolomasi iyong ka talokookon kai togolo ekidor, sodi tobukonokis akimiet loburin. Nacha ilelebunor ebur locha ilelebun, kingadaasi.”

⁵Abu aberu ngina tolomasi ka talokookeng tooma kai, togolokis ekidor, sodi tolemut ebur loochi a akimiet, tobukonok loburin lu ainunete ngesi talokookeng.

⁶Ani ilelebete kesi ngiburin daang torumor, tolimok ngesi ngide tama, “Yautu ebur eche.” Tatachak lokookeng epei ngesi tama, “Lota arai lo esal ngolo.” Abu akimiet tojongo akidokuunun.

⁷Tobongo ngesi nia Elicha sodi tolimok Elicha ngesi tama, “Togiela akimiet ngina daang sodi tatachea ngamichae kon daang. Nakaneni idongete ngaropiyae ngache na kitemokinosi iyong ka talokookon iyareta.”

⁸Akolongit apei, tolot Elicha Chunem ni alomit aberu natikabaran. Tanyaraia aberu ngina Elicha nawi keng sodi kisumuj. Napei ngina jik, toliwor na elosio Elicha Chunem, kimujeene anawi a aberu kangina.

⁹Tolimok aberu ngina lokile keng tama, “Iteni dir, itwaan nia Akuj ni ebuneene nege jiik erai ni italeuno.

¹⁰Atodukokisi ikai nidiochichi lowae lo alokidiama akai yok ewaakisi ekitanda, ka emeesa, ka ekicholong ta ataa, sodi toliwor iboyeene ngesi kaneni esaa daang lo ebunio aanyun ngoni.”

¹¹Akolongit apei, tobongo Elicha Chunem sodi todoka kai, dio alomar kai nikeng esaki akiangar.

¹²Tolimok ngesi ekasuban etich keng Geasi tama, “Kape tanyarau aberu ngin.” Ani ebuni aberu,

¹³tolimok Elicha Geasi tama, “Kingit ngesi ibore ni esaki atosubakinea ayong ngesi tatachakin lochan daang lu aanyu ngesi ani kingarakinea ngoni. Kori robo esaki ngesi ayong atolot nia ekapolon kori ekarikon a ngasigerea atolimok kesi tosubakineta ngesi ibore idio niajokon.” Tatachak aberu ngina ngesi tama, “Eyei ayong ibore daang ni asaki ani kirukitor ka ngitunga kang kane.”

¹⁴Kingit Elicha Geasi tama, “Ani nyo tokona asubakinea ayong ngesi?” Tatachak Geasi ngesi tama, “Emam cha ngesi ikoku nisapat dir, tarai emojongit lokile keng.”

¹⁵Todungok Elicha ngesi tama, “Tanyarau bu nege.” Bu aberu ngina towo anakituk a ikai a Elicha,

¹⁶ sodi tolimok Elicha ngesi tama, “Ngirwa lu ikote lu tokona lugu ekaru lo moi, idaki iyong ikoku nisapat a ngakan kon a ilope.” Tachalu aberu ngina tama, “Ayoro ekaapaan lo, nyikingal ayong. Irai iyong itwaan a Akuj!”

¹⁷Nakaneni abu aberu ngina kidou ikoku nisapat ngirwa lu ekote ngulu ekaru lo atupit ngolo, loger lo alimunitor Elicha.

¹⁸Ani kepolou idia, tolot achekolongit nia ayei apakeng. Arukito apakeng ka ngikalemak ngamanat.

¹⁹Kikalou idia atipei tanyara apakeng ebala, “Epipil akou! Epipil akou!” Tolimok apakeng ekasuban etich keng tama, “Tadaka idia nia itiokeng.”

²⁰Tadaka ekasuban etich idia nia itiokeng. Tadak itiokeng ngesi anakejen tanang naparan lotingilan, esaa lo atoanea.

²¹Tadaka ngesi idia nikai a Elicha, kiteperik lokitanda sodi torotok togolok ekidor.

²²Ani erumor tanyarau lokile keng tolimok tama, “Tolimok ekasuban etich atamar toriku esikiria nege. Asaki ayong alosit nia Elicha alo erai emuron a Akuj. Abonguni ayong atipei.”

²³Kingit lokile keng ngesi tama, “Nyo isakea iyong alosit akwaar naga? Nyerai akwaar naga Sabato kori na esukukuu alo eanyungarere elap.”[6] Tatachak aberu ngesi tama, “Emam ngakiro.”

²⁴Abu ngesi tolim atamar taramae esikiria, sodi todungok ekasuban etich keng tama, “Toruja esikiria kikomak lokojokon. Wara nyiiapak elote mati kalimok ayong iyong atamar kiapak.”

²⁵Abu ngesi tonyou tolot moru a Karimel, ni alomit Elicha. Kingolik Elicha ngesi ebunit. Ani eringa ebunit anikalonan, tolimok Elicha Geasi tama, “Kingolik a, aberu na akwap a Chunem yaa ebunit!

²⁶Kikomak kingit ngesi ngakiro a eboyor keng, ka lokile keng ta lokookeng.” Tolimok aberu ngina Geasi atamar ejokak ngakiro daang,

²⁷nakaneni tolot ngesi ni ayei Elicha toriedik kijuuru alongaren keng, sodi toting ngakejen a Elicha. Tasak Geasi akijukar ngesi, nakaneni tolimok Elicha tama, “Kimiek. Nyitee iyong atamar eya ngakiro eriebete ngesi noi a? Tarai emam ngakiro keng nakalimoki ayong Ekapolon Akuj.”

²⁸Tolimok aberu ngina Elicha tama, “Ekaapaan, abala kolong ayong iyong nakinae ikoku a? Ikwa kolong peabala ayong iyong nyikisigienok ayong ngakiro na eraakasi alioko a?”

²⁹Torei Elicha tolimok Geasi tama, “Tonyou atipei! Tolema aburo kang tolot. Wara nyiiwo kimala itwaan ni iriameta. Ani kimalae itwaan, wara nyiisak abuakin ngesi emalas. Kape jik tanang kai, sodi toting aburo kang alokidiama idia.”

³⁰Tolimok aberu ngina Elicha tama, “Ekong jik tani iyong, ka Ekapolon Akuj na eyari. Nyakaisikini ayong iyong jik!” Apot kesi luarei tonyout kirukosi.

³¹Kingarenik Geasi tolot toting aburo a Elicha alokidiama idia. Nakaneni peeanga idia, nabo amam ibore idodiunit atamar eyari idia. Sodi tobongo Geasi akisiriamiar Elicha, tolimok tama, “Awou idia akienyun.”

³²Ani edoluni Elicha, toloma alopei nikai nikeng, kingolik idia eperi alokitanda etoanit.

³³Togol ngesi ekidor kilip Ekapolon Akuj.

³⁴Ani erumor kinapakin kidiama idia, kiwaak akituk keng, ka ngakonyen ta ngakan ni ayei akituk, ka ngakonyen ta ngakan a idia. Ani na aperio ngesi alokidiama idia, abu akwaan a idia tomoner.

³⁵Tonyou Elicha torotonok alotooma ikai, ani erumor tobongo kinapakin kidiama idia nabo. Kikarisia idia ngakikarisiaret ngakan-kaarei, sodi tokienyu.

³⁶Tanyara Elicha Geasi tolimok tama, “Tanyarau itiokeng a idia.” Ani elomuni itiokeng a idia, tolimok Elicha ngesi tama, “Lokookon lo.”

³⁷ Tadakakin aberu ngina nakejen a Elicha, tatap ereet keng ngalup. Ani erumor toriko ngesi lokookeng topudo.

³⁸Kolong ngirwa lu ayakar eron a akoro nakwap, tonyou Elicha tobongo Giligal. Esaa lo etatamea ngesi atukuor a ngikadwarak, tolimok ngesi ekasuban etich keng atamar tosipok amot natiapolon lokeno, sodi kikulak akimuj adio.

³⁹Tolot epei kech naroatin agerun ageor. Taanyu ngesi emusabib lo alomoding, sodi tolem ngituol cha daang lu apedori ngesi akiting. Abu ngesi yau ngituol ngulu kipach sodi kitukula erai peeyeni atamar eraakasi nyo.

⁴⁰Kikaatounoe ngituol ngulu tokorakinae ngikadwarak. Ani napei eireta kesi, tachalakis tolimokis Elicha tamasi, “Eyei ekitoe lokaaran!” Apot nyeenyam.

⁴¹Tolim Elicha tama, “Nakinae chene ngakiria ngadi.” Abu kipurupurak namot tolim tama, “Toodokisi kesi nabo akimuj ache.” Nakaneni amam ibore aronon ayei nakimuj ngina.

⁴²Akolongit ache, bu itwaan alo Baal Chalicha. Ainunit ngesi Elicha ngamugati ngatomwon-arei na epounio alorau alo ekingaren elemio ekaru ngolo. Ainunit tani ngakies a ngimomwa alukaapalak. Tolimok Elicha ekasuban etich keng tama, “Tokorak ngikadwarak akimuj naga tanyama.”

⁴³Nakaneni kingit ekasuban etich keng ngesi tama, “Esibit iyong itemokin akimuj naga ngitunga amiat apei a?” Tatachak Elicha ngesi tama, “Nak tanyama kainyo ebala Ekapolon Akuj enyamete kesi kidong tani ache.”

⁴⁴Sodi tokorak ekasuban etich keng kesi akimuj, tanyama kesi kidong ache loger lo alimunitor Ekapolon Akuj.