Read turkana 2 Ngikapolok 6 Bible Online

2 Ngikapolok 6 - turkana bible

2 Ngikapolok 6

¹Akolongit apei, abu atukuor a ngikadwarak alu aweikinit Elicha tolimokis ngesi tamasi, “Ediding noi ni kibooyo ngoni!

²Kimiek atoloto Yorudan akitub ngakito, atodukioto ni kibooyo.” Tatachak Elicha kesi tama, “Kapesi.”

³Kimaima epei kech Elicha esaki kirukosi ka kesi, tacham ngesi alosit.

⁴Apot kesi kirukosi aapei. Ani enangete nangolol a Yorudan, kisiakis akitub ngakito.

⁵Ani na etelitor epei kech akitoe, tachakakin akou a aep nakipi atipei. Tachalu ngesi kingit Elicha tama, “Ekokini ayong ai, ekapolon? Erai aep aka itwaan!”

⁶Kingit Elicha ngesi tama, “Aliwae achakakin?” Kidodik itwaan ngini ngesi ni achakakin, sodi totub Elicha akitoe tachakak nakipi, kisilebulebu akitoe akou a aep.

⁷Todung Elicha tama, “Tolem.” Abu itwaan ngini tokudokin tolem akou a aep.

⁸Kolong na ajioto ekapolon a Siria ka Ngisirael, abu ngesi totuko ka ngikarikok a ngasigerea tama, “Asaki ayong adakar kang tolom nibe ati.”

⁹Nakaneni tomea Elicha itwaan nia ekapolon a Isirael tolimok tama, “Wara nyiitor nibe ati, kainyo edukito Ngisiria kaina.”

¹⁰Abu ekapolon a Ngisirael kichikichik ngitunga lu alomito neni, toliworos erebete kesi ngimoe. Tosubakinos ngakiro nguna ngasubakinet nakaalak.

¹¹Tongo ekapolon a Siria kotere ngakiro nguna. Tanyarau ngesi ngikarikok a ngasigerea kingit tama, “Ngae anikus ibakit alowae a ekapolon a Isirael?”

¹²Tatachak epei kech ngesi tama, “Ekapolon, emam itwaan ibakit alowae keng. Elicha lo erai ekadwaran lo eyei Isirael ngesi elimonokini ekapolon a Isirael ngakiro tani namunonoe na iruoro iyong iyei namaniyat kon na alotooma.”

¹³Todung ekapolon tama, “Tasakutu ani eyei atolot erum.” Ani elimokinio ngesi atamar eyei Elicha Dosan,

¹⁴tomea ngesi ngasigerea nakaalak inaa na adokito ngaurukukui na irito ngangolei. Apot kesi tananga lore ngolo nakwaare sodi kiriama.

¹⁵Ani nataparach nache elilim, tonyou ekasuban etich a Elicha topudo alokai. Taanyunga ngesi ngasigerea a akwap a Siria ka ngangolei kech ta ngaurukukui na irito ngangolei iriemito ere. Tolot ngesi nia Elicha tachalu tama, “Ekapolon, kimunyar ngoni. Kikokini tokona ngoni ai?”

¹⁶Tatachak Elicha ngesi tama, “Elalak lu ibakito alowae yok idwangito lu ibakito alowae kech.”

¹⁷Sodi kilip Elicha tama, “Ee Ekapolon Akuj, tangaa ngakonyen keng sodi kingolik ngesi!” Abu Ekapolon Akuj tangaa ngakonyen a ekasuban etich a Elicha, taanyunga ngangolei ka ngaurukukui a akim irito ngangolei eburuchiarito akook a emukura. Ngangolei nguna ka ngaurukukui kech, eriamito Elicha.

¹⁸Ani isiakinete Ngisiria ejie, kilip Elicha tama, “Ee Ekapolon Akuj, kitumudukan ngitunga lugu!” Kitumudukan Ekapolon Akuj kesi loger lo elipitor Elicha.

¹⁹Sodi tolot Elicha ni ayakasi kesi tama, “Ioliyorito esi. Meere ere lo isakete esi logo. Kiwapakinae ayong katoriko nitwaan ni isakete esi.” Abu ngesi toriko kesi Samaria.

²⁰Ani napei alomareta kesi lore, kilip Elicha tama, “Ekapolon Akuj, tangaa ngakonyen kech kingolikis akwap.” Abu Ekapolon Akuj tangaa ngakonyen kech, kingolikis akwap. Apot kesi toyena atamar kiya Samaria.

²¹Ani eanyungari ekapolon a Isirael kesi, kingit Elicha tama, “Ekapolon, aari a? Aari a?”

²²Tatachak Elicha tama, “Nyiiar. Ikwa iareene iyong tani ngirikon kon lu irumuni iyong alojie a? Nak kesi akimuj na enyamete ka ibore ni emaase, sodi kimiek tobongo lokapolon kech.”

²³Abu ekapolon a Isirael kidorok kesi akimuj natikaalan. Ani imujete kesi erumor nabo tamata, tolimok ngesi kesi atamar tobongosi nia ekapolon a Siria. Napei ngina jik tapalikis Ngisiria aremeenen Ngisirael.

²⁴Ani ekisidi, tangaa ekapolon a Siria lo enyaritae Benadad ngasigerea keng daang kirikaut ere a Samaria kiriama.

²⁵Ani kona eriamere ere, tadaun akimuj alore toliwor egielanario akou a esikiria a ngaropiyae a ngatomwon-kauni. Ani ngachin a ngakurio[10] na arai apotis kech ngagiramea ngamiae ngaarei, agielanario a ngaropiyae a ngakan.

²⁶Alosi ekapolon a Isirael anawas a ere. Esaa ngolo, kikalou aberu ache tama, “Ekapolon yaa, kingarakinae ayong!”

²⁷Tatachak ekapolon aberu ngina tama, “Ani pekingarak iyong Ekapolon Akuj, ekokini ayong kengarakini ai? Eyakasi ngakanoi kori emuna lo epuritoe atingit ayong a?

²⁸Nyo ngichan kon?” Tatachak aberu ngina ngesi tama, “Ngoon akolongit ache, kalimokini aberu naga ayong tama, ‘Yau lokookon atanyama akolongit naga, sodi atanyama lokookang moi.’

²⁹ Kipotu sua edorokisi lokookang atanyama. Ani akolongit nache, atolimok ayong ngesi atama, ‘Yau lokookon atanyama,’ nakaneni kebu ngesi kidaa lokookeng.”

³⁰Ani iirari ekapolon ngakiro nguna, abu tochilichilia ngiworui keng ialolongi. Taanyungasi ngitunga lu ayakasi diyete awas a ere atamar anapit ngesi ngiguniae alotooma ngiworui keng.

³¹Tachalu ngesi tama, “Kimiekisi Akuj kataar ayong erai peketubor akou a Elicha eringa akolong nyedooyoro!”

³²Sodi tomea ngesi itwaan arikun Elicha. Nipei bore ngini, ayei Elicha nawi keng arukito ka ngikasukou ngiche lu aponito aanyun ngesi. Ani eringa itwaan ni ameuni ekapolon nyedoluno, tolimok Elicha ngikasukou tama, “Emeunit ekaaran ngolo itwaan akiar ayong! Tokona, ani enanguni ngesi nege, togolo ekidor nyiimiekis ngesi elomuni. Etupit ekapolon elope ngesi alo diyete.”

³³Ani eringa ngesi nyerumoro alimun ngakiro nguna, todolu ekapolon[11] tolim tama, “Ekapolon Akuj ngesi kiinu ngoni ngichan lugu! Nyo tokona eringa ayong edaritor ngesi esubakini ibore iche?”