Read turkana 2 Ngikapolok 7 Bible Online

2 Ngikapolok 7 - turkana bible

2 Ngikapolok 7

¹Tatachak Elicha tama, “Kiira ngakiro na elimunit Ekapolon Akuj! Esaa lo ikoni lo tokona logo moi, ipedorete esi akigiel alo Samaria ngakiloi ngauni a ngakanoi anaajokak, ka ngakiloi ngakan-kapei a erau a aropiyat a apei.”

²Abu emeanara a ekapolon tolimok Elicha tama, “Nyesubakinosi ngakiro nguna tani keyau Ekapolon Akuj akiru atipei!” Tatachak Elicha tama, “Ingolikini iyong esubakin, nakaneni emam akimuj ngina na inyami iyong.”

³Ayakasi ngitunga nguomwon lu adeakasi enomokere nikalapatan a ere a Samaria. Apot kesi tolimonokinos tamasi, “Nyo mono kibooyo ngoni kane tanang kitoaki?

⁴Tani tokona kitama ngoni, ‘Potu atolomasi lore,’ eyei eron a akoro lore, nakaneni kitoaki ngoni kaneni. Kitoaki ngoni erai tani kiboi kane. Potu tokona apana nadakar a Ngisiria. Ibore niaronon epedorete kesi asubakinea ngoni ngesi akiar, nakaneni epedorete karika cha kesi tani akimiekin ngoni kiyari.”

⁵Apot kesi tonyout esaa lo ikaikaakinea toloto nadakar a Ngisiria. Ani enangete kesi lokukuoru a adakar, torukaut emam itwaan eyei.

⁶Esiirarit sek Ekapolon Ngisiria echale lo esibit eka ngasigerea anakaalak aponito a ngangolei ka ngaurukukui na irito ngangolei. Apot Ngisiria tamasi, “Keriku ekapolon a Isirael ngasigerea a Ngiiti, ka Ngimisiri, ta ngikapolok kech, akitijwore ngoni.”

⁷Kotere ngakiro nguna, apot Ngisiria kipungaros atabong ngina kimiekis ngieman kech, ka ngangolei, ka ngisikiria sodi kimiekis adakar loger losek ekoni.

⁸Ani enangete ngitunga luomwon ngulu lokukuoru a adakar, tolomasi loeam kimuja nabo tamata ibore ni ayei neni. Tolemasi ngakwangae, ka egolit, ta ngiworui lu aanyunete, toloto kidaa. Ani erumor tobongut tolomasi loeam eche, tosuba ngakiro napei nguna.

⁹Nakaneni apot kesi tolimokinos make tamasi, “Nyejoikinit ngoni kisubi ngakiro na ikote nugu! Kianyu ngoni ngakiro naajokak, nakaneni nyejoikinit kimunoni. Ani kiwou ngoni alimor tanang nataparach, kirirao ngoni. Tonyoutu atipei atoloto alimokin ngikasubak etich a ekapolon!”

¹⁰Apot kesi torotokis anadakar a Ngisiria tobongosi Samaria, tanyarata ngasigerea na eteete ngidorin tolimokis tamasi, “Kilosit sua nadakar a Ngisiria, nakaneni nyeanyungara itwaan kori nyiirara etoil a itwaan. Eenitae ngangolei ka ngisikiria, nabo idongito ngieman ikote eger lo aisikineta Ngisiria.”

¹¹Tolimosi ngasigerea naketeok ngakiro nguna, sodi tolimokinae ngikasubak etich a ekapolon a Isirael.

¹²Aringa akwap erai akwaar, nakaneni tonyou ekapolon alokitanda keng tolimok ngikasubak etich keng tama, “Kalimokini ayong esi ngakiro na etukito Ngisiria! Eyenete kesi atamar kinyamit ngoni akoro, nakaneni alot kesi akiduk alomoding. Itamito kesi atamar kirotokini ngoni alore atasakasi akimuj, sodi kirumut kesi ngoni kiyari tolemasi ere.”

¹³Tolim epei a ngikasubak etich keng tama, “Ekot ngitunga a ere kalo amunyar. Ikote kesi ngitunga lu atoaka. Kimiekisi atomeasi ngitunga ka ngangolei ngakan na idongito, sodi ataanyutu atamar anukiro kesubakinosi.”

¹⁴Toseut kesi ngitunga ngiche sodi tomea ekapolon kesi todoka ngaurukukui na irito ngangolei, tolimok tama, “Toloto taanyutu ngakiro na asubakinosi ani eyakasi ngasigerea a Siria.”

¹⁵Toloto ngitunga ngulu tananga Yorudan. Wadaang a erot alo ewapito kesi, eteete kesi ngiworui ka ngiboro lu aisikinete Ngisiria na amatarotor. Apot kesi tobongosi kisisakis ekapolon.

¹⁶Tamataros ngitunga a Samaria sodi tomoriakinos ngiboro anadakar a Ngisiria. Apon togielanarae ngakiloi ngauni a ngakanoi anaajokak ka ngakiloi ngakan-kapei a erau, a aropiyat a apei.

¹⁷Aseunit ekapolon a Isirael ekarikon a ngasigerea lo ameanari ngesi toliwor ngesi eweikinit ekidor a ere. Apot ngitunga kipudaasi ekarikon ngolo totoan loger lo adwarea Elicha nasek alositor ekapolon aanyun ngesi.

¹⁸Alimokinit sek Elicha ekapolon atamar esaa lo ikoni ngolo akolongit na atupit ngina, ngakiloi ngauni a ngakanoi anaajokak ka ngakiloi ngakan-kapei a erau, egielanario alo Samaria a aropiyat a apei, loger lo alimunitor Ekapolon Akuj.

¹⁹Nakaneni abu ekarikon a ngasigerea ngolo tatachu tama, “Nyesubakinosi ngakiro nguna tani keyau Akuj akiru atipei!” Abu Elicha tatachu tama, “Ingolikini iyong esubakin, nakaneni emam akimuj ngina na inyami iyong.”

²⁰Ngakiro nguna apot tosubakin anikeng. Totoan ngesi na epudaareta ngitunga alokidor a ere.