Read turkana 2 Ngikapolok 8 Bible Online

2 Ngikapolok 8 - turkana bible

2 Ngikapolok 8

¹Alimokini sek Elicha aberu nakolong eteyaruni ngesi lokookeng tama, “Tonyou taramakisi ka ngitunga a awi kon toloto toloma wache, kainyo eyauni Ekapolon Akuj eron a akoro min nakwap naga a ngikaru a ngikan-kaarei.”

² Abu aberu ngina kiira ngakiro na alimokini Elicha, towoto ka ngitunga a awi keng toloma nakwap a Ngipilisti a ngikaru a ngikan-kaarei.

³Ani adaunet a ngikaru a ngikan-kaarei, tobongo ngesi nakwap a Isirael tolot alimokin ekapolon atamar katobuakin ngesi akai ka amana keng.

⁴Torukau ngesi ekapolon iruorosi ka Geasi lo arai ekasuban etich a Elicha, ingisit ebala, “Kisisakinae ayong ngakitoodikinet nakailiilok daang na asubaki Elicha.”

⁵Ani eringa Geasi elimonokini ekapolon eger lo eteyarunea Elicha itwaan nikatoan, abu aberu nasek eteyarunio lokookeng tolimok ekapolon atamar asaki katobuakin akai keng ka amana. Tolimok Geasi ekapolon tama, “Ekapolon, aberu ngina ngesi naga, ka lokookeng lo eteyaruni Elicha!”

⁶Ani ingisi ekapolon aberu ngina ngakiro nguna, abu ngesi tama ikote neni. Abu ekapolon tanyarau ekapolon keng loochi tolimok tama, “Tobuak aberu naga ibore daang ni kolong arai ikeng. Ani erumor kiatak tani ngakiaset a ngalemet kadaang ana akoniunete ngamanat ngikaru lukan-kaarei daang lu awositor aberu naga.”

⁷Tolot Elicha lore a Damasko ngirwa lu adeakar Benadad lo arai ekapolon a Siria. Ani elimokinio ekapolon atamar eyei Elicha neni,

⁸tolimok ngesi Asael lo arai epei a ngikapolok keng aluuchik tama, “Tolem ainakinet inaa ekadwaran sodi kingit ngesi Ekapolon Akuj tama, ‘Engalekini edeke a Benadad kori emam?’ ”

⁹Abu Asael kisiwok ngikaala ngitomwon-omwon ngiboro luajokak daang a Damasko, tolot nia Elicha. Ani enangi ngesi nia Elicha, tolimok tama, “Ekapolon Benadad lo erai ekasuban etich kon, ngesi kameunit ayong akingitun anikon kengalekini edeke keng kori kemam.”

¹⁰Tatachu Elicha tama, “Kape tolimok ngesi atamar engalekini dir edeke keng. Nakaneni kedodik ayong Ekapolon Akuj atamar etoani ngesi.”

¹¹Sodi tokienyik Elicha ngesi eriangakina tanang ni erumeta Asael ngileech. Abu Elicha kikalou.

¹²Kingit Asael tama, “Ekapolon, nyo igoror iyong?” Tatachak Elicha tama, “Egoro ayong kainyo ayeni ngakiro naaronok isubea iyong Ngisirael. Inomi iyong ngawasea a ngirerea kech, ka akiriar ngide kech sodi topuwono ngaberu na epotiyete.”

¹³ Kingit Asael ngesi tama, “Ekokini ayong ekasuban etich kon lo ekoni iingok asubi ngakiro naationok ikote nguna ai?” Tatachak Elicha ngesi tama, “Kedodik ayong Ekapolon Akuj atamar iliwor iyong ekapolon a Siria.”

¹⁴Tobongo Asael nia Benadad. Kingit Benadad ngesi tama, “Abala Elicha ai?” Tatachak Asael tama, “Abala engalekini edeke kon dir.”

¹⁵Nakaneni ani akolongit nache, tolem Asael eburangkit kirepak nakipi, tobunea ekapolon Benadad, taar. Abu Asael kilunyokin nados a Benadad toliwor ekapolon a Siria.

¹⁶Ekaru lo a ngitomon ka ngikan lo araakar lokookeng a Aab lo anyaritae Yoram ekapolon a Isirael,[12] abu Yeoram lo arai lokookeng a Yeochapat toliwor ekapolon a Yuda,

¹⁷ngirwa lu araakar ngesi ngikaru ngitomwon-uni ka ngiarei. Topolok Yeoram Yerusalem a ngikaru a ngikan-kauni.

¹⁸Arai aberu a Yeoram nakookeng a Aab. Kona araakatar ngitunga a awi a Aab ngipei ka ngesi, abu ngesi kiwap ngakiro naaronok a ngikapolok a Isirael. Tosechak ngesi Ekapolon Akuj,

¹⁹ nakaneni peasaki Ekapolon Akuj akinyasun Yuda, kainyo echikakinit sek ekasuban etich keng Daudi atamar erubakinete ngalesea keng eraakasi ngikapolok jik.

²⁰Ngirwa lu araakar Yeoram ekapolon, tongero ngitunga a akwap a Edom eger lo apolokinitor ekapolon a Yuda kesi. Kipakaros kesi topolokinos make.

²¹Sodi tonyout Yeoram ka ngasigerea keng toloto Sair, ni eriameta ngasigerea a Ngiedomae kesi. Ani enangi nakwaare, tonyout ngesi ka ngikarikok lu aweikinito ngaurukukui na irito ngangolei, tosiwa. Apot ngasigerea keng kialaros toloto nawiyei kech.

²²Napei ngina jik, tongero ngitunga a Edom lu Yuda. Ngirwa lupei ngulu, tongero ngitunga a ere a Libina dang eger lo apolokinitor ekapolon a Yuda kesi.

²³Ngakiro nache daang asubi Yeoram, igiritae nakitab na enyaritae Ngakiro a Ngikapolok a Yuda.

²⁴Totoan Yeoram tonukakinae nalielin a ngikapolok na eyakasi lore a Daudi. Abu Aasia lo arai lokookeng a Yeoram kilunyokin nados keng toliwor ekapolon.

²⁵Ekaru lo a ngitomon ka ngiarei lo araakar Yoram lokookeng a Aab ekapolon a Isirael, abu Aasia lo arai lokookeng a Yeoram toliwor ekapolon a Yuda.

²⁶Araakasi ngikaru a Aasia ngitomwon-arei ka ngiarei na aliworor ngesi ekapolon. Topolok ngesi Yerusalem a ekaru a epei. Anyaritae itiokeng Asalia, na arai nakookeng a Aab, tarai atatait a ekapolon a Isirael alo anyaritae Omri.

²⁷Ani kona araakar Aasia lokamuran a Aab, abu ngesi tosechak Ekapolon Akuj loger lo asechakineta ngitunga a awi a Aab.

²⁸Abu ekapolon Aasia kimorikin ka ekapolon a Isirael lo anyaritae Yoram, kitijwoto ekapolon a Siria lo anyaritae Asael. Tojikinos ngasigerea anakwap a Gilead, ani enyaritae Ramos. Towana Ngisiria ekapolon Yoram alojie.

²⁹Tobongo Yoram lore a Yesireel akitedek ngajemei keng. Sodi tolot Aasia aanyun ngesi kaina.