Read turkana 1 Ngakiro a Ngirwa 10 Bible Online

1 Ngakiro a Ngirwa 10 - turkana bible

1 Ngakiro a Ngirwa 10

¹Apot Ngipilisti kitijikis Ngisirael alomoru a Giliboa. Taarae Ngisirael lukaalak kaneni.

²Nakaneni todolo Ngipilisti kesi, sodi taara talokookeng a Saul nguuni lu anyaritae Yonasan, ka Abinadab ta Malikichua.

³Torirau ejie alodiyete Saul, togumugumaasi ngesi ngimalea a ngimoe towana noi.

⁴Tolimok Saul esorokit lo atingit ngiboro keng lujiet tama, “Tout ekileng kon kichumea ayong, nyeeponeta Ngipilisti lu eraakasi ngibukui lugelayek lugu kechuma ayong sodi katokianatar.” Nakaneni toem esorokit ngolo asubakin ngakiro nguna. Abu Saul tolem ekileng keng a ilope kimasakin ngesi lokileng kichumi bon.

⁵Ani ingolikini esorokit ngolo atamar atoana Saul, kimasakin ngesi dang lokileng keng a ilope totoaka aapei ka Saul.

⁶Eger ngolo atoaketa Saul aapei ka talokookeng luuni daang, sodi tasalu apolou keng.

⁷Ani iirarete Ngisirael lu ayakasi nadipo a Yesireel atamar amatarosi ngasigerea a Ngisirael, nabo atoaka Saul ka talokookeng, apot kesi toisikis ngirerea kech tamataros. Sodi pot Ngipilisti toloma lorerea ngulu.

⁸Ani akolongit na atupit ngina, toloto Ngipilisti akibut ngiboro a ngitunga alu atoakito. Toriamut kesi ngawat a Saul ka talokookeng luuni eperete alomoru a Giliboa.

⁹Totubosi kesi akou a Saul nabo talachut ngiboro keng lujiet, sodi tomeasi ngitunga lowaitin daang a akwap a Ngipilisti alimokin ngitunga kech ka ngakujo ngakiro naajokak anikech nguna.

¹⁰Kiwaakis kesi ngiboro kech lujiet kai apei a ngakujo kech, sodi kinenekis akou kai a akuj kech enyaritae Dagon.

¹¹Ani iirarete ngitunga a ere a Yabech alo eyei Gilead ngakiro na asubeta Ngipilisti Saul,

¹²tonyout ngikiliok lukajwok toloto alemun ngawat a Saul ka talokookeng, yaasi Yabech. Tonukakis kesi kwap echoke, torono akimuj a ngirwa a ngikan-kaarei.

¹³Atoani Saul ani awounea akiwap ngakiro a Ekapolon Akuj. Angeri ngesi ngakiro na adungokinit Ekapolon Akuj, tasak ngesi atamar kedodeanakis ngikaram ngakiro na adikino esubakinosi,

¹⁴ towou akingitun ani a Ekapolon Akuj. Kotere ngakiro nguna, taar Ekapolon Akuj ngesi, kitiliwo Daudi lokookeng a Yese ekapolon.