Read turkana 1 Ngakiro a Ngirwa 11 Bible Online

1 Ngakiro a Ngirwa 11 - turkana bible

1 Ngakiro a Ngirwa 11

¹Pot ngitela daang a Isirael nia Daudi alo Eburon sodi tolimokis tamasi, “Kirai sua ngakoyo ka ngaakot kon.

²Kolong tani eringa Saul erai ekapolon, irikit iyong Ngisirael alojie. Abu nabo Ekapolon Akuj kichikak iyong atamar iliwor ekeyokon a ngitunga keng toliwor ekapolon kech.”

³ Sodi pot ngikarikok daang alo Isirael ni ayei ekapolon Daudi alo Eburon. Kikong Daudi achamakin ka Akuj, kidokakis kesi ngesi akimiet na etal nakou, loger losek echikakinitor Ekapolon Akuj kisitoru nia ekadwaran Samuel.

⁴Tonyout ekapolon Daudi ka Ngisirael daang toloto akirem ere a Yerusalem. Ngirwa ngulu, anyaritae ere ngolo Yebus. Ngiebus lu araakasi ngikulepek a akwap kangina, aringa elomito neni.

⁵Tolimokis Ngiebus Daudi atamar nyelomari ngesi jik tooma ere. Nakaneni tolema Daudi awas nakaagongon a Sion. Kotere ngakiro nguna, apon tanyarae neni, “Ere a Daudi.”

⁶Tolim Daudi tama, “Itwaan ni isiauni taar itwaan a Ngiebus, eliwor ekarikon a ngasigerea!” Abu Yoab lo enyaritae itiokeng Seruya torik ejie, toliwor ekarikon a ngasigerea.

⁷Ani kona alomea Daudi tooma awas, apon tanyarae neni, “Ere a Daudi.”

⁸Abu ngesi kisiriam adukuor napei alowae alo imuleleara tanang lowae lo alotooma. Toduk Yoab ngiwaitin luche a ere.

⁹Toliwor Daudi lokajwon noi kainyo arukito ngesi ka Akuj Namerikanyer.

¹⁰Lugu kesi eraakasi ngirora a ngasigerea a Daudi anakajwok. Ngasigerea nguna erukito aapei ka Ngisirael luche, apot kingarakis ngesi toliwor ekapolon, loger lo echikakinitor Ekapolon Akuj, kiganga kesi apolou keng togogonger.

¹¹Anyaritae asiger na a ekingaren Yachobeam lo emachar a Achimon, lo arai ekarikon “Aluuni”.[19] Kitiji ngesi ngikiliok ngamiae ngauni a akwara sodi taar daang akitijiet apei.

¹²Lo atupit lo a ekingaren aluuni kajwok noi ngesi Eleasar lokookeng a Dodo, lo emachar a Ao.

¹³Ebakete ngesi ka Daudi kitijwoto Ngipilisti alo Pas Damim. Ayei ngesi mana a erau esaa lo esiakineta Ngisirael amatar.

¹⁴Apot ngesi ka ngirukitos keng toweikis Ngipilisti alokiding amana kitijwoto Ngipilisti. Kidwanga kesi Ngipilisti kotere Ekapolon Akuj.

¹⁵Akolongit apei, toloto ngasigerea ngache ngauni anasigerea anatomwon-uni kajwok noi nataaba na ebooyo Daudi, na ayei diyete aburibur anyaritae Adulam. Esaa ngolo, ayakasi ngajorei a Ngipilisti nadipo a Repaim.

¹⁶Ngirwa ngulu, ayei Daudi lomukura lo eriwokinitae awas nakaagongon, tolomite ajore a Ngipilisti Betleem.

¹⁷Abu Daudi kiito awi tolim tama, “Arai bo kainuni itwaan idio ngakipi alokare ana eyei Betleem dang!”

¹⁸Apot ngasigerea nauni kajwok noi kimingakis kitoro kiding adakar a Ngipilisti, tookut ngakipi alokare sodi iinut Daudi. Nakaneni towou Daudi akimat ngakipi nguna, pearai abu tobuko toliworos ngakipeyos ani a Ekapolon Akuj.

¹⁹Tolim ngesi tama, “Nyamasi ayong ngakipi nugu jik! Ikokini ibore ngini akimat ngaakot a ngikiliok kalu alu ajalete ngawat kech tonyout akitu!” Abu ngesi tonger akimat ngakipi nguna. Ngakiro nguna idodiunito atitinyu a ngasigerea anauni kanguna.

²⁰Abichai lo arai lokaatokeng a Yoab ngesi arai ekarikon a ngasigerea “Anatomwon-uni kajwok”. Etiji ngesi ngikiliok ngamiae ngauni a akwara taar sodi toliwor ngesi lokajwon noi ani eyakasi “Lutomwon-uni.”

²¹Ngesi arai lokajwon noi ani eyakasi “Lutomwon-uni”. Abu ngesi toliwor ekarikon kech, nakaneni pearai ngesi lokajwon noi loger “Aluuni” a ekingaren.

²²Benaya lo arai lokookeng a Yeoyada lo a ere a Kabiseel, arai asiger nakajwon noi. Asubi ngesi ngakiro naationok, aari tani ngikiliok a Ngiamor ngiarei lukajwok. Akolongit apei, ayei ibore ni ekoni eloch nakwap, abu ngesi toloma nadui taar engatuny.

²³Aari ngesi tani itwaan a akwap a Misiri. Arai itwaan ngini nilangir tarai aoyau keng ngamitae ngaarei, totingite akwara nalangir. Kitijik Benaya ngesi a aselej todema akwara anakan keng, taarea.

²⁴Araakasi nguna ngakiro naationok a Benaya alo arai epei “Alutomwon-uni”.

²⁵Arai ngesi lo ayenikinitae anikech, nakaneni peekoni “Luuni”. Toseu Daudi ngesi topolok ngasigerea na eyokiyete ngesi.

²⁶Ngitunga luche “Alutomwon-uni” kesi ta Asael lo arai lokaatokeng a Yoab, ka Elianan lo arai lokookeng a Dodo alo a Betleem,

²⁷ka Chamos lo elelea a Arod, ka Eles lo abunit alo Pelet,

²⁸ka Ira lo arai lokookeng a Ikech alo ere a Tekoa, ka Abieser lo a ere a Anasos,

²⁹ka Sibekai lo a emachar a Ucha, ka Ilai lo a emachar a Ao,

³⁰ka Maarai lo a akwap a Netopa,

³¹ka Isai lo arai lokookeng a Ribai alo ebunit alo Gibea anakwap a Benjamen, ka Benaya lo a akwap a Pirason,

³²ka Urai lo abunit anadipoe ana eyakasi diyete ere a Gaach, ka Abiel lo abunit anadipo a Araba,

³³ka Asimapes lo a ere a Baurim, ka Aliaba lo abunit alo Chaalibon,

³⁴ka Achem[20] lo abunit alo Gison, ka Yonasan lokookeng a Chagee lo a emachar a Arar,

³⁵ka Ayam lo arai lokookeng a Sakar alo a emachar a Arar, ka Elipal lo arai lokookeng a Ur,

³⁶ka Eper lo abunit alo Mekera, ka Aija lo abunit alo Pelon,

³⁷ka Esiro lo abunit alo Karimel, ka Naarai lo arai lokookeng a Esibai,

³⁸ka Yoel lo arai lokaatokeng a Nasan, ka Mibiar lo arai lokookeng a Agiri,

³⁹ka Selek lo a emachar a Amon, ka Naarai lo a ere a Beeros, lo atingit ngiboro a Yoab lu ejie,

⁴⁰ka Ira, ka Gareb, lu araakasi daang ngika emachar a Yatir,

⁴¹ka Uria lo arai Eitit, ka Sabad lo arai lokookeng a Ailal,

⁴²ka Adina lo arai lokookeng a Chisa (arai ngesi lo ayenikinitae alokitela a Reuben. Ayei ngesi ajore keng a ilope na arai ngasigerea ngatomwon-uni),

⁴³ka Anan lokookeng a Maaka, ka Yochapat lo a Misan,

⁴⁴ka Usia lo a Achitera, ka Chama ka Yeiel lu araakasi talokookeng a Osam alo a Aroer,

⁴⁵ka Yediael lo arai lokookeng a Chimuri, ka lokaatokeng Yoa lu aponito alo Tis,

⁴⁶ka Eliel lo abunit alo Maapa, ka Yeribai ka lokaatokeng Yochapia, lu araakasi talokookeng a Elinaam, ka Isima lo a akwap a Moab,

⁴⁷ka Eliel, ka Obed ta Yaasiel lo abunit alo Soba.