Read turkana 1 Ngakiro a Ngirwa 12 Bible Online

1 Ngakiro a Ngirwa 12 - turkana bible

1 Ngakiro a Ngirwa 12

¹Alomit Daudi Sikilag, nikolong alosi ngesi na amataror ani ekapolon Saul. Apot ngasigerea nakaalak nakajwok toloto ni ayei ngesi.

²Araakasi ngasigerea nguna ngaka ekitela a Benjamen alo arai ekitela a Saul. Apedorete kesi agumanar ngimalea a akau ka akibaarior ngamoru a ngakan ana alokedieny ka teten.

³Ngikarikok kech kesi Ayeser, totupak Yoach. Araakasi daang talokookeng a Chemaa alo abunit alo Gibea. Ngikarikok a ngasigerea kesi Yesiel ka Pelet, lu araakasi talokookeng a Asimapes, ka Beraka, ka Yeu lua Anasos,

⁴ka Ichimaya lo abunit alo Gibeon, lo arai asiger na ayenikinitae tarai epei a ngikarikok “Alutomwon-uni”, ka Yeremia, ka Yaasiel, ka Yoanan ta Yosabab lo abunit alo Gedera,

⁵ka Elusai, ka Yerimos, ka Bealia, ka Chemaria, ka Chepatia lo abunit alo Arip,

⁶ka Elikana, ka Ichia, ka Asarel, ka Yoeser ta Yachobeam lo a emachar a Kora,

⁷ka Yoela ta Sebadia, lu araakasi talokookeng a Yeroam, lu aponito alo Gedor.

⁸Eraakasi lugu ngirora a ngasigerea ana eyenikinitae tojwoko, ana apote alokitela a Gad toloto kimorikinos ka ngasigerea a Daudi na ayakatar ni eriwokinitae awas anariet. Aperikinito kesi ejie a ngaupwala ka ngakwaaras. Adedeng ekote ngingatunyo, topiraka loger a ngimakatae alu a ngimoru.

⁹Eser arai ekarikon kech, Obadia ngesi lo a ngiarei, Eliab ngesi lo a nguuni,

¹⁰Michimana ngesi lo a nguomwon, Yeremia ngesi loa ngikan.

¹¹Atai lo a ngikan-kapei, Eliel lo a ngikan-kaarei,

¹²Yoanan lo a ngikan-kauni, Elisabad lo a ngikan-koomwon,

¹³Yeremia lo a ngitomon, Makibanai lo a ngitomon ka epei.

¹⁴Ngasigerea nugu ngache na a ekitela a Gad, araakasi ngikapolok lu aweikinito ngasigerea abunget apei, taraakas luche ngasigerea naachik na aweikinito ngasigerea amiat apei.

¹⁵Elap lo ekingaren a ekaru a epei, ngirwa lu elelebunor angolol Yorudan kipaun ngakipi, apot kesi todoka angolol, topetasi ngitunga lu alomito nadipoe na ayakasi kide ka too angolol.

¹⁶Anyounete kolong ngikiliok a ngitela a Benjamen ka Yuda toloto ni eriwokinitae awas, ni ayei Daudi.

¹⁷Tolot Daudi akisiriam kesi tolimok tama, “Ani kiponito esi iraakasi ngipaalon lu isakete akingarakin ayong, kepeyounit ayong esi. Emorikin ngoni! Nakaneni ani kisakete esi akipotokin ayong ngimoe kang tarai nyasaki ayong akiwan esi, eanyuni Akuj kata apaayok ngakiro nguna kirira esi.”

¹⁸Abu Etau a Akuj toloma ni eyei epei kech lo anyaritae Amasai. Amasai ngesi lo aliwor ekisidi ekarikon “Alutomwon-uni.” Abu ngesi tolim tama, “Daudi lokookeng a Yese, kirai sua ngikon! Kiboikinos akaalimon ka ngitunga lu kingarakinito iyong! Ibakit Akuj alowae kon.” Kipeyou Daudi kesi kitiliwo ngikapolok luuchik a ngasigerea keng.

¹⁹Apot ngasigerea ngache alokitela a a Manase toloto kibaka alowae a Daudi na alooso ngesi ka Ngipilisti akitijwore ekapolon Saul. Abu ngesi nyiingarak Ngipilisti alojie, kainyo aemito ngikapolok a Ngipilisti abalasi epedori Daudi akipotokin kesi Saul lokolong arai ekapolon keng. Apon Daudi tolimokinae atamar tobongo Sikilag.

²⁰Ngasigerea na Manase nugu kesi nakolong aloose nia Daudi, na abongio ngesi Sikilag. Ngirora kech kesi Adina, ka Yosabad, ka Yediael, ka Mikael, ka Yosabad, ka Eliu ta Silesai. Alo Manase, arai ipei kech daang ekarikon a ngasigerea abunget apei.

²¹Toliworos kesi ngasigerea naachik anajore[21] a Daudi, kainyo araakasi kesi daang ngasigerea nakajwok. Ani ekisidi toliworos kesi ngikarikok anasigerea a Ngisirael.

²²Akolongit daang, aponeenete ngikiliok alomar nasigerea a Daudi, sodi talalaaros ngasigerea keng tarata nakajwok.

²³Lugu kesi eraakasi ngirora a ngajorei ana apote alo Eburon, kibaka alowae a Daudi, akitiliwor ngesi ekapolon, kilunyokin nados a Saul loger lokolong alimunitor Ekapolon Akuj. Ekimar kech ngesi logo.

²⁴Ani a Yuda, ngikiliok lu atingito ngaupwala ka ngakwaaras, araakasi 6,800.

²⁵Ani a Simeon, araakasi ngikiliok lukajwok 7,100.

²⁶Ani a Lawi, 4,600.

²⁷Ngirukitos a Yeoyada alo arai alesit a Aron, araakasi 3,700.

²⁸Ngiyenet a Sadok alo arai esorokit lokajwon, ayakasi ngikarikok ngitomwon-arei ka ngiarei.

²⁹Ani a Benjamen (alo arai ekitela a Saul) araakasi 3,000. (Ngitunga a ekitela a Benjamen lukaalak, ebakito ani a Saul, nyeisikina ngesi.)

³⁰Ani a Epiraim, araakasi 20,800. Araakasi kesi lu ayenikinitae alomacharin kech.

³¹Ani a Too Manase, araakasi 18,000 lu aseunitae tolimokinae atamar toloto kitiliwosi Daudi ekapolon.

³²Ani a Isakar, araakasi ngikarikok 200, erukito aapei ka ngitunga lu apolokinito kesi (ngikarikok lugu kesi ayenete ngakiro na ejoikinit Ngisirael esubakinete ka esaa lo ejoikinit esubakineta).

³³Ani a Sebulun, araakasi 50,000 ngikiliok luajokak lu emunoi, tasadito ejie. Etatamitae kesi ajwore a ngiboro alu ejie kadaang.

³⁴Ani a Naputal, araakasi ngikarikok 1,000, erukito aapei ka ngikiliok 37,000 lu atingito ngaupwala ka ngakwaaras.

³⁵Ani a Dan, araakasi 28,600, ngikiliok lu etatamitae.

³⁶Ani a Acher, araakasi 40,000, ngikiliok lu asadito ejie.

³⁷Ani a ngitela alu alomito kide Yorudan, Reuben, ka Gad ta Kide Manase, araakasi 120,000 ngikiliok lu etatamitae ajwore a ngiboro alu ejie kadaang.

³⁸Tonyout ngasigerea nguna daang esadito ejie toloto Eburon, esakete akitiliwor Daudi ekapolon a Ngisirael. Atukito Ngisirael daang akitiliwor Daudi ekapolon.

³⁹Kiruko kesi ka Daudi kaneni a ngirwa a nguuni, enyamete akimuj ka akimat emuna lo epuritoe lo epeyokineto kesi Ngisirael luche.

⁴⁰Napei alotela alukalonak alomito kwap, lu araakasi Isakar, ka Sebulun ta Naputal, potu ngitunga emeto ngisikiria, ka ngikaala, ka ngangolei ta ngimongin iwokito ngakiria, ka ngameyana, ka ngarinyo a ngamusabib, ka emuna lo epuritoe ta akimiet a ngikito. Taramut kesi tani ngaatuk ka ngamesekin na eario tanyamae. Edodiunito nguna daang eger a alakara a ngitunga kadaang anakwap kangina.