Read turkana 1 Ngakiro a Ngirwa 13 Bible Online

1 Ngakiro a Ngirwa 13 - turkana bible

1 Ngakiro a Ngirwa 13

¹Totuko Daudi ka ngikarikok a ngasigerea daang lu aweikinito ngasigerea abunget apei ka lu aweikinito ngasigerea amiat apei.

²Ani erumor tolimok Ngisirael daang tama, “Ani kichamito esi, taraakas nabo ngakiro nugu na echamit Ekapolon Akuj na erai Akuj yok, kimiekisi atomeasi ngitunga ni eyakasi Ngisirael luche ka ngimurok ta Ngilawi ani eyakasi kesi alorerea kech, sodi tolimokis kesi atamar pot eriamariama ka ngoni nege.

³Sodi atonyoutu ngoni atoloto ayaun asaduku a Achamunet a Akuj yok, nakolong kijamuarit ngoni ngirwa lu araakar Saul ekapolon.”

⁴ Tachamut ngitunga daang asubakin kongina ani ajoikinitotor kesi ngakiro nguna.

⁵Abu Daudi tochun Ngisirael daang alowaitin kadaang napei alokukuor a Misiri alowae alo alokuju tanang napak a Amas alowae alo alokwap. Asaki ngesi yaunae asaduku a Achamunet alo Kirias Yearim yaarae Yerusalem.

⁶Toloto Daudi ka ngitunga lore a Baala, ngesi atamar Kirias Yearim lo eyei nakwap a Yuda. Aloose kesi inaa esakete ayaun asaduku a Achamunet a Akuj. Elimokinitae asaduku na a Achamunet ngina ekiro a Ekapolon Akuj Namerikanyer, ana ibooyi alokidiama ngiborei lua ngabeben.

⁷Tolemut kesi asaduku a Achamunet alokai a Abinadab kiwaakis naurukuk na iritae nakitetet. Usa ka Aio eyokiyete aurukuk ngina,

⁸kidongaate Daudi ka ngitunga daang a ngikilinga kech kadaang idodiunito arimatoi ani a Akuj. Aeosi kesi kideese ngiboro lu eeore lu araakasi ngagitae, ka ngiburin, ka ngasua, ka ngichoroi, ta ngaburucho.

⁹Ani enangunete kesi ni edayere ngalemet ani enyaritae Kidon, tadakar emong, sodi kitorwaa Usa akan torwakin asaduku a Achamunet toting.

¹⁰Tongoik Ekapolon Akuj Usa atipei, taar ngesi ani atapea asaduku ngina. Totoan ngesi kaneni alongaren Ekapolon Akuj.

¹¹Kotere ngakiro nguna, anyarae neni Peres Usa[22] tani tokona. Tongo Daudi ani angoea Ekapolon Akuj kirira Usa.

¹²Abu Daudi toem Akuj tolim tama, “Ekokini tokona ayong alemari asaduku a Achamunet ai?”

¹³Sodi towou Daudi ayaar asaduku ngina Yerusalem. Abu kimiek anawi a itwaan ani anyaritae Obed Edom, ani erai ika ere a Gas.

¹⁴ Kiboi asaduku kaina a ngilapio a nguuni. Abu Ekapolon Akuj topia ngitunga a awi a Obed Edom ka ibore ni arai ikeng daang.