Read turkana 1 Ngakiro a Ngirwa 14 Bible Online

1 Ngakiro a Ngirwa 14 - turkana bible

1 Ngakiro a Ngirwa 14

¹Tomea Iram lo arai ekapolon a Tiro ngitunga nia Daudi, etingito ngakito a ngichekereng. Ayakasi ngikadukok lu adukete a ngakito ka lu adukete a ngamoru, lotunga ngulu.

²Abu ekapolon Daudi toyen atamar etiliwo Ekapolon Akuj ngesi ekapolon a Isirael, nabo apia apolou keng kotere ngitunga keng.

³Kiut Daudi ngaberu ngache alo Yerusalem, touriu ngide lusapa ka lupesur lukaalak.

⁴Ngide auriuni ngesi alo Yerusalem kesi Chamua, ka Chobab, ka Nasan, ka Solomon,

⁵ka Ibiar, ka Elichua, ka Elpelet,

⁶ka Noga, ka Nepeg, ka Yapia,

⁷ka Elichama, ka Beeliada,[23] ta Elipelet.

⁸Ani iirarete Ngipilisti atamar etiliwor Daudi ekapolon a Isirael kadaang, tolot ajore a Ngipilisti akirem ngesi. Sodi tonyou Daudi kisiriamia kesi.

⁹Todolut Ngipilisti nadipo a Repaim toremo neni.

¹⁰Kingit Daudi Akuj tama, “Etiji Ngipilisti a? Kisidwangi iyong ayong kesi a?” Tatachak Ekapolon Akuj tama, “Ee, kitijik! Kesidwangi ayong iyong kesi!”

¹¹Sodi kitiji Daudi kesi alo Baal Perasim, kidwang. Tolim tama, “Kotere Akuj, ejukun ayong alokiding ajore a ngimoe loger a akaale.” Apon neni tanyarae Baal Perasim.[24]

¹²Ani ematarosi Ngipilisti, toisikis ngakujo kech nasubuna kaneni, todung Daudi atamar kinomae.

¹³Nipei bore ngini, apot Ngipilisti tobongosi nabo nadipo a Repaim toremo nabo.

¹⁴Ani ingisi Daudi Akuj nabo, tatachak ngesi tama, “Nyiitijik kesi kane, kiloda kitijik kesi alowae aloche, alodiyete ngikito lube ta lokimieta ngul.

¹⁵Ani iirari iyong erue a ngakejen alokidiama ngikito, kitijik iyong kesi kainyo kengarenikini ayong iyong edwang ajore a Ngipilisti.”

¹⁶Tosubak Daudi ngakiro na adungokinit Akuj. Kotere ngakiro nguna, kirita ngesi Ngipilisti tobongosi alo Gibeon tananga Geser.

¹⁷Tokeikin ekipur a Daudi wadaang, sodi kitubul Ekapolon Akuj ngibukui daang kotere Daudi.