Read turkana 1 Ngakiro a Ngirwa 15 Bible Online

1 Ngakiro a Ngirwa 15 - turkana bible

1 Ngakiro a Ngirwa 15

¹Abu Daudi toduk ngakais keng lore a Daudi.[25] Tosubak ngesi tani ni iwaakinio asaduku a Achamunet ani erumor kimukok eam.

²Sodi tolim ngesi tama, “Emam nabo ngitunga ngiche ilepilepete asaduku a Achamunet mati Ngilawi lukolong aseuni Ekapolon Akuj atamar kesi eliworosi ilepilepeenete, toliworos esubete etich keng jik.”

³Abu Daudi tochun Ngisirael daang Yerusalem, esaki yaut asaduku a Achamunet ni asubakini ngesi kotere asaduku ngina.

⁴Ani erumor tochun ngalesea a Aron ka Ngilawi.

⁵Ani a Ngilawi, bu Uriel lo emachar a Koas. Apolokinit ngesi ngitunga a emachar keng 120.

⁶Alomachar a Merari, bu Asaya lo apolokinit ngitunga a emachar keng 220.

⁷Alomachar a Gerichon, bu Yoel lo apolokinit ngitunga a emachar keng 130.

⁸Alomachar a Elisapan, bu Chemaya lo apolokinit ngitunga a emachar keng 200.

⁹Alomachar a Eburon, bu Eliel lo apolokinit ngitunga a emachar keng 80.

¹⁰ Ani alomachar a Usiel, bu Aminadab lo apolokinit ngitunga a emachar keng 112.

¹¹Tanyarau Daudi ngimurok a Akuj lu anyaritae Sadok ka Abiasar ta Ngilawi lukan-kapei anyaritae Uriel, ka Asaya, ka Yoel, ka Chemaya, ka Eliel ta Aminadab.

¹²Tolimok ngesi Ngilawi tama, “Esi iraakasi ngikapolok a ngimacharin a Ngilawi. Kitosegas esi ka Ngilawi luche, sodi yaut asaduku a Achamunet a Ekapolon Akuj ana erai Akuj a Ngisirael kiwaakis ni asubak ayong.

¹³Erai nikolong nyilepolepo esi asaduku akolongit na ekingaren, ngesi kiriraa ngoni Ekapolon Akuj na erai Akuj yok, kainyo kipot nyikisub itemem ka etal.”

¹⁴Apot ngimurok ka Ngilawi kitosegas esakete alemar asaduku a Achamunet a Ekapolon Akuj ana erai Akuj a Ngisirael.

¹⁵ Kilepolepo Ngilawi a ngakito ana ariongakinito losegeta, loger lo adungokinitor Ekapolon Akuj kisitoru nia Musa.

¹⁶Todungok Daudi ngikapolok a Ngilawi atamar toseut Ngilawi ngiche toeoto ka akiram ngagitae ka ngasua.

¹⁷Apot Ngilawi toseut Eman lo arai lokookeng a Yoel, ka eyenet keng Asap lo arai lokookeng a Berekia ta Esan lo arai lokookeng a Kuchaya alo emachar a Merari.

¹⁸Ngitunga ngiche lu aseunio akingarakin kesi akiram ngagitae nakaruok noi kesi Sekaria, ka Yaasiel, ka Chemiramos, ka Yeyel, ka Uni, ka Eliab, ka Benaya, ka Maaseya, ka Matisia, ka Elipeleu, ka Mikneya ta ngasigerea a akai a Akuj ngaarei, Obed Edom ka Yeiel.

¹⁹Ngikaeok lu anyaritae Eman, ka Asap ta Esan, asakitae kituruoto ngasua nanyangayek.

²⁰Sekaria, ka Asiel, ka Chemiramos, ka Yeyel, ka Uni, ka Eliab, ka Maaseya ta Benaya, asakitae tarama ngagitae nakaruok noi.

²¹Ani Matisia ka Elipeleu, ka Mikneya, ka Obed Edom, ka Yeiel ta Asasia, asakitae tarama ngagitae na nyeruosi noi.

²²Ani kona araakar Kenania ekunonoit a aeo, apon ngesi toseunae topolok Ngilawi lukaeok.

²³Berekia ka Elikana, toseunae toliworos ngiketeok asaduku a Achamunet.

²⁴Ngimurok lu anyaritae Chebania, ka Yochapat, ka Nesanel, ka Amasai, ka Sekaria, ka Benaya ta Elieser, apon toseunae tokuta ngaburucho alongaren asaduku a Achamunet.

²⁵Apot ekapolon Daudi ka ngikasukou a Ngisirael ta ngikarikok a ngasigerea toloto nawi a Obed Edom ayaun asaduku a Achamunet. Kidongata kesi kinyiakanasi.

²⁶Tolemut kesi ngimongin ngikan-kaarei ka ngamesekin ngakan-kaarei taara ngakipeyos esakete Akuj kingarak Ngilawi lu elepilepito asaduku a Achamunet.

²⁷Anapit Daudi eworu lokaanikan ajokon, tanapito tani ngikaeok, ka ekarikon kech Kenania ta Ngilawi lu elepilepito asaduku. Anapit Daudi tani akaluwat*g** a emuron.

²⁸Apot Ngisirael daang yaasi asaduku a Achamunet Yerusalem elakara kimariteteete, ekusete ngaburucho ka ngaamwar, kituruyete ngasua, taramito ngagitae.

²⁹Ani na ayaunitere asaduku a Achamunet lore, abu Mikal na arai nakookeng a Saul kingolia alopuke a akai, kingolik ekapolon Daudi idongae toporoporoe kotere alakara. Abu Mikal kimenya Daudi alotau keng.