Read turkana 1 Ngakiro a Ngirwa 16 Bible Online

1 Ngakiro a Ngirwa 16 - turkana bible

1 Ngakiro a Ngirwa 16

¹Yaasi kesi asaduku a Achamunet loeam losek asubakinit Daudi, sodi kiwaakis tooma. Ani erumor tolemikis Akuj ngakipeyos na inomio ka na a ekisil.

²Ani kelemu Daudi ngakipeyos kerumor, topia ngitunga a ekiro a Ekapolon Akuj,

³sodi tokorak kesi daang akimuj. Nak ngesi ekile ka aberu daang alo Isirael amugati apei, ka akiring[26] na epeitoe ta ngarinyo a ngamusabib.

⁴Toseu Daudi Ngilawi ngiche akilip Ekapolon Akuj, Akuj a Ngisirael, alongaren asaduku a Achamunet, eeosi ka akikut Akuj.

⁵Toseunae Asap toliwor ekapolon kech, totupak Sekaria. Ngilawi luche aseunitae kesi Yeiel, ka Chemiramos, ka Yeyel, ka Matisia, ka Eliab, ka Benaya, ka Obed Edom ta Yeyel. Ngulu kesi aramito ngagitae. Asap ngesi eturui ngasua.

⁶Ngimurok luarei anyaritae Benaya ka Yaasiel, toliworos ekuseenete ngaburucho alongaren asaduku a Achamunet.

⁷Arai akolongit na ekingaren ngina ainakinea Daudi Asap ka Ngilawi luche etich lo eeotor ipurosi Ekapolon Akuj.

⁸Tobuakisi Ekapolon Akuj alakara, tolimosi ationis keng. Tolimokisi ngibukui ngakiro na asub ngesi.

⁹Toeokisi kipuro Ekapolon Akuj. Tolimosi ngakiro nakatalarak asubaki ngesi.

¹⁰Atalakaros ani kiraakar ngoni ngikeng. Kimiekisi lu ilipito ngesi daang talakaros!

¹¹Kapesi nia Ekapolon Akuj kingarak, sodi kilipa ngesi jiik.

¹²Kitamutu ngakiro nakatalarak asubaki ngesi. Kitamutu ngakitoodikinet nakailiilok asubi Akuj, ka ngakiro a eriras na alimuni ngesi.

¹³Esi ngalesea a Yakobo, alo erai ekasuban etich a Akuj. Esi ngalesea a Isirael, alo aseuni Akuj.

¹⁴Ekapolon Akuj erai Akuj yok. Eraakasi ngitalio keng ngika ngakwapea kadaang.

¹⁵Itamunit[27] Akuj achamunet keng, na kolong adunguni ngesi toliwor aka jik.

¹⁶Achamunet na achamakin ngesi ka Aburaam. Ngakiro na ekongi ngesi ani a Isaka.

¹⁷Achamakinosi Ekapolon Akuj ka Yakobo, tachamakinos jik.

¹⁸ Tolim tama, “Kainakini iyong akwap a Kanaan. Eliwor akwap ngina akon a ilope.”

¹⁹Akidioko ngitunga a Akuj. Araakasi kesi ngipeyok anakwap a Kanaan.

²⁰Atubonorosi kesi anakwapea, tonyout alokapolon a epei toloto nia loche.

²¹ Kiratak Akuj ngitunga nyeeboliatar kesi. Ani kona asakea ayuun kesi, kichikichik ngikapolok ebala,

²²“Nyiiwan ngikasubak etich kang luseuna, nyiitap ngikadwarak kang.”

²³Ngitunga daang, taramakisi Ekapolon Akuj eeos! Tolimosi akolongit daang ngakiro naajokak, na atamar kiyuu ngesi ngoni.

²⁴Tolimokisi ngibukui akibuseanu keng, tolimokisi ngitunga daang ngakiro naationok esubi ngesi.

²⁵Etiono Ekapolon Akuj, ejoikinit ipuroi noi. Ejoikinit ngesi erimae akidwang ngakujo nache daang.

²⁶Eraakasi ngakujo a ngibukui aluche ngasubuna, nakaneni Ekapolon Akuj asubi adis.

²⁷Iriamit ngesi akibuseanu ka ekipur. Ileleba agogongu ka alakara kai keng.

²⁸Kipuruutu Ekapolon Akuj, ngitunga daang anakwap! Kipuruutu akibuseanu keng ka apolou.

²⁹Kipuruutu ekiro a Ekapolon Akuj lo ibus. Yautu akipeyos tolomut kai keng. Toriediko alongaren ngolo italeuno na etakanunea.[28]

³⁰Tamaranik akwap daang alongaren keng! Ewei akwap itirokina wapei, emam kona isiyotoorio.

³¹Talakaros akwap ka kidiama! Tolimokisi ngibukui atamar Ekapolon Akuj erai ekapolon.

³²Toruk anam ka ibore daang ni eyei tooma kon. Talakaros ngamanat ka ibore daang ni eyei nikus!

³³Iremarete ngikito a namoni elakara, na ebunio Ekapolon Akuj apolokin akwap.

³⁴ Tobuakisi Ekapolon Akuj alakara, kainyo ejok ngesi.

³⁵Tolimokisi ngesi tamasi, “Toyuunae sua, Akuj na irai Akayuunan kosi. Tochunakinae sua wapei, toyunae alobukui, sodi atobuakineta sua iyong alakara, epuruutu ekiro kon lo italeuno.”

³⁶Epuruutu Ekapolon Akuj, Akuj a Isirael! Epuruutu ngesi tokona ka jik! Apot ngitunga daang tamasi, “Aamen,” sodi kipuruut Ekapolon Akuj.

³⁷Kitiliwo ekapolon Daudi Asap ka Ngilawi luche kesi eweikinito jik akilip na elipeenere ani ewaakinitae asaduku a Achamunet. Toliworos kesi esubeenete etich kaneni ngirwa daang.

³⁸Obed Edom lo arai lokookeng a Yedusun ka ngikiliok ngitomwon-kauni a emachar keng, toliworos ingarakinito kesi. Osa ka Obed Edom kesi eyokiyete ngidorin.

³⁹Emuron Sadok ka ngimurok luche, kesi aweikinito ni elipeenere Ekapolon Akuj alo Gibeon.

⁴⁰Ataparach ka atabong daang, enomeenete kesi akipeyos na inomio nginerin daang alokeno, itemem ka eger lo igiritae lotal lo etaanyuni Ekapolon Akuj Ngisirael.

⁴¹Arukito kesi ka Eman, ka Yedusun ta daang lu aseunio aeonokin Ekapolon Akuj ipurosi kotere amina keng na nyesaluni.

⁴²Eman ka Yedusun nabo aweikinito ngaburucho ka ngasua ta ngiboro luche lu eturuonokinio na aeore ngieosio a ekipur. Ngitunga a emachar a Yedusun kesi aseunitae kiyoko ngidorin.

⁴³ Apot ngitunga daang toloto nawiyei, sodi tolot Daudi nawi akiruk ka ngitunga a awi keng.